1 Dih bhi ndhi mu ji nUrushalima, bhi mu wulkus khi Betafaji khi Betanya, khipe Pang Zaitun/Olives, bhi Jesu lep khi jep kam/shar shiit fhini mu vhil 2 yaghal sat nmu, "Gu mwan gu ya khi la yil ndhi ntighim mu. Kat gun phi rho dih, gu kat meh la nagham ndhi mu sham lang nih ma. Gu fon nih yaghal gu wakji khi nih n'an. 3 Kat meh gwo sat ngun nna, 'A meh lhi deh gun phi shin bih si dih eh?' bhi gu sina, 'Nda nih phi dem shin shiit khi nih yaghal khi bhin lep khi lala.'" 4 Mu mwan yaghal mu kat la nagham fe a wu-bwaghat khibang shi phi-meh phi-lih shi nnar yil fe, bhi mu fon nih. 5 Pak gurum mu khi direm dih bhi mu sat mu muna, "Gun phi shin a meh, phi fon la nagham fe ah?" 6 Mu lap bhilip nmu khipe ndhi Jesu sat nmu si, yaghal niyen fe mu yit nmu del yar fut. 7 Jep kam/shar shiit khimuk wu vhil fe mu wakji khi la nagham fe nJesu yaghal mu shar leh fut khikha fe deh nJesu rap nih dih. 8 Gurum mu bwer mu shar leh fut khikha yar, yaghal pak mu shar a kom tihng mu ndhi mu kwat nmar. 9 Niyen ndhi mu del kam ntighim muk khi niyen ndhi mu mwan ndangkong muk mu phi orr sina, "Hosanna! Gwo ndhi wul nsihm khi Nda Naan a gwo wuretkhinaan. 10 Wuretkhinaan nih khi yil khi nda mu Davit/Dauda! Hosanna wuyon duk-duk!" 11 Bhi Jesu rhi nUrushalima yaghal mwan rhi nbut lihNaan yaghal yighir naa jep bih mu duk-duk. Dih, ndhi bhit fe del gwe jong peh, bhi put yaa khi yil Betanya khi wu pokovol mu si. 12 Ndhi teer bhit bang, ndhi mu wakwul nBetanya, bhi nen lah nnih. 13 Ndhi nih sihng-sihng deh naa tihng kwon ndhi nih khi kom-yim, bhi mwan nphe naa kot ji kat meh la dih oh, bhi ndhi ji dih, bih kat meh bih ma kat a kom-yim fe det ma, nphe ndhi a tar kat la-kon fe ma. 14 Lap bhilip ntihng fe na, "Meh gwo kudi nphe sih la fhi zak ma." Yaghal jep kam/shar shiit khimuk mu khiling. 15 Mu ji nUrushalima, yaghal rhi nbut lihNaan bhi doghom shen niyen ndhi mu serep khi bih khi niyen ndhi mu phi serep fe nbut lihNaan. Viling bih lhi leh khi niyen viling shaghal mu khi pehtong nmhi niyen serep khi bul mu. 16 Dhin ndhi meh gwo khi rhi khi meh bih se'et nbut lihNaan fe. 17 Kam-kam nmu na, "A wu riran ma ndhi, 'Lih-nih khi kot a peh dangphinaan nphe yil mu duk-duk ma'? Dang bhi gu bor khi nih a lhi niyen wat mu." 18 Niyen shiit lihNaan wu nan mu khi niyen man ran mu ndhi mu khiling bih ndhi sat, bhi mu tang yar ndhi du kat tih nih. Nphe ndhi mu lwaghat nih nphe ndhi du gurm fe mu duk-duk mu naa bih fi-poo nphe kam khi muk. 19 Ndhi kansighin taa, bhi mu yit yil fe. 20 Ndhi bhit bang deh mu phimwan khi yil fe, bhi mu tihng kwon si fii sam rhi nse'en muk. 21 Pita diye yaghal sat nna, "Ngu kam, ghi naa! Tihng kwon ndhi ghi lang-poo khikha muk muut." 22 Jesu lap/piring nmu nna, "Gu shinzeen nNaan. 23 An a sat zen ngun ndhi kat meh gurum sat npang si, 'Yaghal khiting yaghal yi sam nbut nkong wuyon si,' bhi kat nok kat gaharshik nbhizung nih si dang bhi shinzeen ndhi bih ndhi ji sat khi taa, bhi a bih ndhi Naan khi shin. 24 Nphe ndhi a si a sat ngun: Duk-duk bih ndhi gu dangphinaan yaghal gu tal, gu shinzeen ndhi gu kat/lap, bhi khi bor a nmuk. 25 Kat gu direm deh gu dangphinaan, a tiit ngun gu kon khi duk-duk meh bih ndhi gu yaa meh gwo khi nih nhok gu, deh Nda gu ndhi nih khitingNaan kon khi shikbis fuk ngun dih duk. 26 Dang bhi kat gu kon khi nih nshak ma, Nda gu ndhi khitingNaan khi kon khi shikbis fuk ma duk. 27 Shin mu ji nUrushalima nkwa. Ndhi Jesu phi mwan nbut lihNaan fe, niyen shiit Naan wu nan mu, khi niyen man ran mu, yaghal daskaham mu ji nder muk. 28 Mu sat nnih, "A khi bal weh ndhi ghi phi shin bih si mu dih eh, shin a weh shin bal nghi nphe shin mu eh?" 29 Jesu sat nmu, "An nphe shin tal khime ngun. Gu sat n'an bhi a sat ngun kot a khi bal weh ndhi an phi shin bih si mu dih oh. 30 Baptisma khi Jon, tong a khitingNaan ah kot nder gurum mu eh? Gu lap n'an." 31 Mu ben khinar sut yaghal mu gaharshik mu na, "Kat mu si na, 'Tong a khitingNaan,' bhi ki sina, 'Bhi a meh lhi deh gu niyang shinzeen nnih dih eh?' 32 Dang bhi kat mu si na, 'Tong a nder gurum mu,' ... ." Mu lwughat gurum fe mu, nphe ndhi gurum mu duk-duk mu shinzeen ndhi Jon a ngu jagham/naa-peh khi kha. 33 Bhi mu lap nJesu mu na, "Mu man ma." Bhi Jesu sat nmu, "An duk nphe sat ngun kot an phi shin bih si mu a khi bal weh oh ma."