1 Khidangkong ndhi Jesu lat bih mu duk-duk nih phi sat nkom khiling khi gurum fe mu, bhi yaghal waya khi yil Kafarnahum. 2 Meh khinshong wuyon gyet nih khi meh kwaram ndhi nih phi ɗem nih bwer, bhi gok yaghal wulkus nmuut. 3 Ndhi khinshong fe khiling kop Jesu, bhi lep nyen nan Yahudawa shin yaa nder muk, deh nnih ji lat khi shuwal kwaram finin. 4 Ndhi mu ji nder Jesu, bhi mu tal phi muk nmhi zen-zen sina, "Nih a gurum wuret ndhi mak peh deh nghi ghi shin bih si nnih dih, 5 nphe ndhi nih phi ɗem yil fun bwer, shin a nih a ngu dhik lihnaan fun nmun." 6 Ndhi a si bhi Jesu mwan nder mu. Dang bhi ndhi wulkus khi lih fe, bhi khinshong fe lep shar nin mu deh nmu sat nnih sina, "Nda Naan, tap bhi ghi shinjel nsak ma, nphe ndhi an a ke/mak ndhi ghi lep kwak ghi nlih nih ma. 7 A nphe ndhi a si deh a naa a ke/mak ndhi a ji nder ghi dih ma nshe, dang bhi kat ghi sat bhilip det bhi kwaram fhin khi kat kagham. 8 Nphe ndhi an a gurum ndhi khi bal duk, khi sojoji mu ndhi mu phi khiling n'an. A sat mhisi, 'Ghi mwan,' bhi khi mwan, bhi yaghal wu kwa, 'Ghi ji,' bhi khi ji, yaghal nkwaram fhin, 'Ghi shin nmhi si,' bhi khi shin." 9 Ndhi Jesu khiling bhisi, bhi bih fe ap poo nnih, bhi yaghal viling nder ɗu gurum ndhi mu phi mwan nder muk bhi sat na, "A sat ngun, ko khi yil Israila bhi sham a kat shinzeen nmhi si ma. 10 Khidangkong ndhi nyen ndhi mu lep mu fe mu wakji nlih fe, bhi mu kat kwaram fe kat kagham gwe. 11 Deh dih leh khidangkong wuni fe, Jesu mwan yaa nmeh yil ndhi mu phi yong a Nayin, yaghal jep kam-kam khi muk mu ki ɗu gurum mu mwan nder muk. 12 Ndhi wul kus khi peh rhi khi yil fe, bhi mu phi mang kum meh gwo shi shin put, ndhi nih a laa wu datni det nmeh mat (ndhi a mat kaa), bhi ɗu gurum mu bwer khi yil fe mu nder muk. 13 Ndhi Nda Jesu naa nih, bhi bih fe bhim nih bhi sat nnih na, "Yhi nok wal si." 14 Bhi del kaa dih bhi bhim shep bi-mang kum fe, yaghal nyen ndhi mu mang nih fe mu dyam shakkat. Sat nnih naa, "Dengma'ar, a sat nghi, ghi yaghal." 15 Gwo ndhi muut fe yaghal tong khi t'hing bhi doghom lap bhilip kuut, yaghal Jesu shin nih nighin muk. 16 Bhi lughut yak mu duk-duk, yaghal mu wet nsaam sim Naan, mu phi sina, "Baga ngu jagham taa nnaar mu" yaghal "Naan lang yit nkaa gurum fhin mu." 17 Bhilip bih peh-taa ndhi Jesu shin si mwan ka'at-peh duk-duk khi yil Yahudiya khi jep songsoghol yil mu shighir-ka'at. 18 Jep kam nder Jon (Yahaya) mu sat bih ndhi mu taa duk-duk si nnih. 19 Bhi yaghal Jon (Yahaya) yongpeh njep kam fhin mu vhil bhi lep mu shin yaa nder Jesu nphe sat sina, "A ghi a gwo ndhi npeh wul wul ah kot mu tap phi meh gwo wu kwa eh?" 20 Ndhi mu wul kus khi Jesu, bhi nyen a mu na, "Jon (Yahaya) ngu shin Baptisma lep mun nder ghi sat na, 'A ghi npeh wul ah kot mu tap phi meh gwo wu kwa eh?'" 21 Nbiit wuni fe bhi lat khi shwal khi gurum mu bwer khi nyen ndhi riin wubis taa khidel mu, yaghal nyen wu vwagham mu bhi mu naa peh. 22 Jesu lap yaghal sat nmu na, "Khidangkong ndhi gu yak yar fuk, gu sat nJon (Yahaya) bih ndhi gu naa khi ndhi gu khiling. Nyen wuvwagham mu phi kat naa-peh, khibhil mu phi mwan-mwaan, t'hiloghom mu kat lat khi loghom fut, komdwaghar mu khiling-peh, gurum wu ɗwam mu yighil, yaghal nyen jeel mu phi khiling bhilip Naan. 23 Gwo ndhi nyang yit shinzeen n'an waa phi bih mu ndhi a shin bih khi kat wuret." 24 Khidangkong ndhi jep lep khi Jon (Yahaya) mu wak, Jesu doghom sat bhilip nɗu gurum mu nkaa Jon (Yahaya), "Gu pwat gu yaa ndem npeh naa a meh eh? A kom dem ndhi piip nih phi dung nih ah? 25 Dang bhi a meh ndhi gu mwan nphe naa fe eh? A gwo ndhi lep leh wu leen a ? Gu naa, nyen ndhi mu lep leh ndhi nih khi shagal yaghal mu khi tong nbut bhilong mu a lih long khi yil mu. 26 Dang bhi gu mwan nphe naa a meh? Ngu jagaham a? Asiwai, a sat ngun, shin met ngu jagaham/ngu naa peh shi kaa. 27 A nih ndhi mu ran-ran khi kaa muk, 'Gu naa, an nphe lep khi ngu lep fhin nnih taa ntighin ghi, ndhi nih nphe dak yarkaam fhik deshes ghi dih.' 28 A sat ngun, khi naar gurum ndhi shirop mu beeh mu, bhi meh ndhi yon ma Jon (Yahaya) dih ma. Khi ndhi asi bhi gwo ndhi nih a wukat khitingNaan bhi nih a wuyon met nnih." 29 (Ndhi gurum mu duk-duk mu khiling bih si, khi nyen shak shaghal wap mu, bhi mu ser mu na Naan nih a wu bang, nphe ndhi mu shin baptisma nmu a khi baptisma nmu Jon (Yahaya). 30 Dang bhi Farisiyawa mu khi nyen ndhi mu man waar khi Israilawa a wuret mu nyang nook khi Naan nphe mu, nphe ndhi Jon (Yahaya) shin baptisma nmu ma.) 31 "Bhi a khi meh, dak eh, ndhi a kam nyen dighinyil ndhi mu dih khidetsi eh? Mu a khipe me si eh? 32 Mu deh a khipe jep mu phi shap khinaar lhituk, ndhi yak petong yaghal mu phi yong shak mu sat si na, 'Mu taa bel ngun, bhi gu nyang tam-tam. Mu mang tam walmuut, bhi gu nyang err.' 33 Nphe ndhi Jon (Yahaya) wul nhi nih phi si borodi ma, yaghal shu mwos ma, bhi gu sat gu lhi, 'Nih khi riin wu bis.' 34 La gurum wul nih phi sih-sih khi shwa-peh, bhi gu lhi, 'Gu naa, ni a ngu bhilak shin a damwos, a shaar nyen shak shaghal wap mu khi nyen shikbis mu!' 35 Dang bhi mu phi man sen khi Naan a nbut bih wuret ndhi put nbut fe." 36 Bhi nmeh khinaar Farisiyawa fe mu yong-peh nJesu nnih ji sih-sih ki jin. Khi dnagkong ndhi Jesu rhi dighinlih Farisiyawa fe, bhi yaa petong nphe sih-sih. 37 Dih bhi a meh mat shi ndhi nih khi yil fe ndhi nih a mat shikbis. Ndhi kaat Jesu khi tong khi phe sih-sih nlih Farisiyawa fe, bhi ji khi meh wang gam khi moor ndhi taghas fe nbhi khi ret. 38 Bhi yaghal dar ndangkong Jesu kus khi kwak muk, nih phi wal, bhi yaghal lok kwak muk khi yitmwa fhit, bhi yaghal pwas nih khi shoop-kaa dih, yaghal bhim kwak muk khi phi dih yaghal tighir moor ndhi khi taghas wuret fe. 40 Jesu yaghal lap bhi sat nnih na, "Simon, an khi meh nphe sat nghi." Bhi lap nna, "Ghi sat dak ngu kam-kam." 41 Jesu na, "Meh ngu shin ka'at shaghal nih khi nyen ka'at mu vhil. Nmeh mu nih khi ka'at nka shaghal yagurum yit yakgurum khi paat, yaghal nmu wu kwa fe a ka'at shaghal yakgurum vhil khi sar. 42 Ndhi kwat fe la-po nmu, bhi kon khi nih nmu. Nphe ndhi asi, a ndhi neh khi naar nyen wu vhil si mu nphe dem ngu shin ka'at si bwer eh? 43 Simon lap nnih na, "A naa a khi peh ndhi a gwo ndhi mu kon khi ka'at khi muk wuyon si." Jesu yaghal sat nnih, "Ghi tok dyel ret-ret wai." 44 Jesu yaghal viling naa mat fe bhi sat nSimon, "Ghi naa mat si. A rhi lih ghi. Ghi shin am n'an nphe vwang kwak nih ma, dang bhi nih lok kwak nih khi yitmwa fhit yaghal pwas khi shoop-kaa dih. 45 ghi bhim kwak nih khi phi-ghi ma, dang bhi ndhi an khi yar rhi fhin det bhi wet a phi bhim kwak nih khi phi-dih. 47 Nphe ndhi asi a sat nghi, shikbis khimuk, ndhi mu bwer, a wu khi-kon khi nih - nphe ndhi dem an bwer. Dang bhi gwo ndhi mu kon khi shikbis khi muk nlaanih, dem khi muk a lee zak det." 48 Bhi Jesu sat nmat fe, "Shikbis fii a wu kon." 49 Nyen ndhi yhe mu khi tong ndershak mu doghom bhis bhilip nshak mu na, "A we si ndhi khi mak npeh kon khi shikbis eh? 50 Bhi Jesu sat nmat fe, "Shinzeen fii bhirip/bar yhi. Yhi mwan shaghap."