1 Yaghal taa ndhi gurum mu pwat mu phi neer Jesu phi khilling bhilip Naan nphi muk bhi Jesu khi dar phi kong Gennesaret. 2 Yaghal naa shii mu vhil mu phi eet pwat mphe dyan phi kong fe. Nyen yak sherep fe mu pwat nbut fe gwe mu phi vwang teng yaksherep fhut. 3 Jesu rhi nbut nmeh shii fe ndhi a nmhi Simon, bih yaghal sat nnih kon teng sherep fe nbut am khi peeh ndhi jong khi khiting ma. Bhi yaghal yaa peh tong dih nbut shii fe nih phi kam bhilip Naan ngurum mu. 4 Khi ndangkong ndhi lat lap bhilip, bhi sat Siman (bitrus) , "Ghi tung shii fe shin kam ntighim am yaghal ghi kon teng sherep fe deh nghi ghi yak sherep mu dih." 5 Simon (Bitrus) yaghal lap nnih nnna Nda, mu poor sherep nnaar lipar khi peh daar ma, bhi mu yaa meh sherep ma, dang bih a shin bih ndhi ghi sat, bhi a kon teng fhin nbut am fe." 6 Khi dangkong ndhi mu shin asi, bhi mu t'hil sherep bwer, ndhi lhi nteng sherep khi mu te'eh. 7 Bhi yaghal mu yong meh nyen yak sherep nkwa mu ndhi mu nbut meh shii wu diik deh nmu ji mu baam dun dhi. Ndhi mu ji bhi mu bhi mu ghiring shii fe duk-duk vhil khi sherep ndhi lhi nshii fe mu put taa nbut dyalang am nphe tighin khi sherep fe. 8 Ndhi Simon Bitrus naa a si, bhi pittaa ntighin Jesu, na, "Ghi yit an dih, nphe ndhi an a ngu shikbis, Nda naan." 9 Nphe ndhi bih fe shin bih app'poo nih khi nyen ndhi mu nder muk, nphe yon khi sherepn ndhi du yak. 10 Nnaar mu bhi a Yakubu khi Yohanna, ndhi mu a jep Zebedee, ndhi mu a shar shak khi Simon. Jesu sat nSimon, "Tap nbhi ghi lughut ma, nphe ndhi yaghal khidetsi, bhi ghi peh deh a ngu yak gurum mu." 11 Khi dangkong ndhi mu pwat khi shii fe mu khiting, bhi mu yit bih mu duk-duk deh mu mwan nder muk dih. 12 Par meh biit ndhi nih nmeh yil fe, bih meh gurum ndhi loghom yaa nih nhi dih. Ndhi naa Jesu, bhi puttaa khi yit nih yaghal dang phi muk na, "Nda, ghi dem bhi ghi vwang loghom fe shin put nsisan." 13 Jesu yaghal d'hel sar nih bhi bhim nih, na, "An phi dem fe. Ghi bang." La-la bhi loghom fe yit nih dih. 14 Jesu yaghal sat nnih deh nnih nok sat meh gwo ma, bhi sat nnih na, "Ghi mwan yarkaam fhik, ghi mwan ghi nin kasak ngu shiit Naan bhi yaghal ghi shin zughum npeh deh nghi ghi bang dih, khipe ndhi Musa gyet sat den si, nphe deh nnih deh a langting dih nmu si." 15 Dang bhi sim muk mwan duk-duk shipe-shipe nphe shiit ndhi shin, yaghal dwu gurum mu ji khi shak nphe khilling kam khi muk yaghal lat khi gok khi mu. 16 Tong khi yaghal bhi lagham wayaa khi peh ndhi khi gurum mu ma nphe dangphinaan. 17 Yaghal taa nmeh biit ndhi nih phi kam-kam, bhi Farisiyawa khi nyen kam waar mu khi tong dih ndhi mu tong pwat khi jep peh mu dik-dik khi yil Galili wuyon khi Judiya, yaghal khi yil Urushalima duk. Bal khi Naan nih nder muk nphe lat khi gok gurum mu. 18 Deh dih det bhi meh nyen mu wul, mu mang meh gwo ndhi kut khi del karram, yaghal mu bong yarkaam ndhi mu khi del khi nih ndighin deh mu den nih ntighim Jesu dih. 19 Bhi mu kat yarkaam ma npeh yon khi gurum mu, nphe ndhi a si bhi mu khaa khi del lih fe bhi mu ep fung nbut gak fe bhi yaghal mu den nih shinsam khi del karram fini, mu den nih shin sam khi naar gurum mu, shin ji ntighim Jesu. 20 Ndhi Jesu naa shinzeen khi nyen si mu, bhi Jesu sat naa, "Ngu gok si, a kon khi shikbis fhik." 21 Bhi nyen attaura khi Farisiyawa mu doghom tal bih ndhi ni sat, muna, "A weh a si ndhi nih phi tihkok khi sihm naan a si eh? A weh khi bal kon khi shikbis eh kat ba a Naan nmhishin ma eh?" 22 Dang bhi Jesu, ndhi man bih ndhi mu phi leng nbut du gwe, bhi lap nmu na, "A meh lhi deh gun phi tal-tal nkaan wuni nbhizung gu eh? 23 A ndhine bes sat eh, 'Shikbis fhik a wukon' ah kot a sina 'Ghi yaghal ghi mwan-mwan?' 24 Nphe ndhi gu man ndhi La Gurum nih khi baal khi yil nphe kon khi shikbis, a sat nghi, 'Ghi yaghal, ghi mang kerem fhik ghi waa khipang.'" 25 Lala bhi yaghal ntighim gurum mu bhi mang kerem ndhi ye khi teer khi kaa fe. Bhi waa lih nin, nih phi plang Naan. 26 Duk-duk gurum mu app'po bhi mu plang Naan. Lughut gam nbut mu, muna, "Mu naa bih fiipo shini." 27 Khi dangkong ndhi bih si mu taa, Jesu put nbhisi bhi naa meh ngu shak wap ndhi sim muk a Levi npetong nbit nyen shak wap mu. Bhi sat nnih na, "Ghi yaghal nder nhi." 28 Bhi Levi yaghal mwan nder muk, yit bih mu duk-duk ndangkong. 29 Yaghal Levi den sihpeh wuyon-yon nmhi retyit lih nih nphe Jesu. Nyen shak shaghal wap mu bwer mu dih khi gurum nkwa mu ndhi mu neer petong fe mu phi sih-sih. 30 Dang bhi Farisiyawa mu khi nyen ran-ran mu phi gwagshik ntighim shar shiit khi Jesu mu, muna, "A meh lhi deh ghi phi sih-sih khi shu am a wukhime khi nyen shak shaghal wap mu khi nyen shikbis mu eh?" 31 Jesu lap nmu na, "Nyen ndhi a wukagham mu phi wal ngu en ma; a nyen ndhi mu nkagham ma. 32 A wul a nphe yongpeh nnyen wu bang mu deh nmu tang kon khi shikbis fut dih ma, dang bhi a nphe yongpeh nnyen shikbis mu deh nmu tang kon khi shikbis fut dih." 33 Bhi mu sat nnih, "Nyen shiit Naan ndhi mu phi mwan nder Jon mu phi tong khi neen khi dangphinaan, yaghal nyen mwan nder Farisawa mu phi shin fe duk. Dang bhi nyen shiit Naan nmak mu phi sih-sih khi shu am." 34 Jesu sat mu na, "Meh gwo mak lhi nyen shiit khi miskwaam nok sih-sih si ndhi nih miskwaam fe kudhi nder mu a? 35 Biit fe nwawul ndhi mu khi mang nih miskwaam fe del khini, bhi mu khi tong khi neen." 36 Yaghal Jesu sat simbhilip mu a si. "Meh gwo khi teeh pak leeh wupo nlani yaghal bam leeh wusighir khi ni ma. Kat shin asi, bhi khi teeh leeh wupo fe, bhi pak leeh wupo ndhi nlani fe khi kaat nbut leeh wushighir fe ma. 37 Meh gwo khi dhik mwos wupo nbut shim den mwos wusighir ma. Nphe ndhi kat shin a si, bhi mwos wupo fe khi teeh shim fe, yaghal mwos fe khi kon, yaghal den mwos fe khi tihkok. 38 Nphe dhi asi, a tiit nphe dhik mwos wupo fe nbut shim dhik mwos wupo. 39 Meh gwo khi sham khi ndangkong shu mwos wusighir bhi nih phi dem wupo, nphe ndhi si na, 'Wusighir fe met ma.'"