1 Yaghal Jesu, ndhi nhi gam khi Riin khi Naan, ndhi tong nkong Jordan waji, det bhi Riin khi Naan mang nih yaa khi nhi nɗem, 2 dhi nbut teer yakgurum vǝl bhi sharfom ji nphe gwam nhi. Nih si meh bih ma nbut teer fe mu bhi nen lah nhi khi dangkong. 3 Sharfom sat nih na, "Kat ghi a La Naan, bhi ghi viling pang si mu dhe ni bor a nmorong (bredi)." 4 Jesu lap nnih na, "A wu ri-ran, 'gurum ba khi bhirip a khi nmorong (bredi) det ma. 5 Yaghal sharfom bhin shin mang nhi shin ka khiting dong-dong si, yaghal nin kop nkan mu dik-dik dhi mu dhi khi dighinyil si nnhi lala. 6 Sharfom sat nih na, "An nphe shin yon nghi khiding nka kop si mu khi ret khi mu, nphe dhi mu shin mu nnan, yaghal a shin nduk meh gurum ndhe an phi ɗem fe. 7 Nphe dhi asi, kat ghi dhigyil an, bhi nih nphe kot a nmak." 8 Bhi Jesu pring nni sina, "A wu ri-ran, 'Ghi nphe dhigyil a Nda Naan fhik, yaghal ghi shin shiit a nih det." 9 Bhi yaghal sharfom mang Jesu shin ya nJerusalem yaghal den nih khiting dong-dong si nka lihnaan, yaghal sat nni na, "Kat ghi a La Naan, bhi ghi kon sak shin sam nyil, 10 Nphe di a wu ri-ran, 'Nhi nphe lih jep lep fini mu tap khi ghi,' 11 yaghal, 'Mu khi mang ghi ya nsar du, yak ba ghi ngap shii ghi khi ka pang." 12 nbut pring bhilip nnih, Jesu na, "Mu bhilip asi, 'Tap ghi kam Nda Naan fhik." 13 Dhi sahrfom lat kam Jesu, bhi del yaghal yit nhi dhi nphe biit nkwa. 14 Bhi Jesu yaghal bhin waya nGalilee nbut bal khi Riin Naan, yaghal bhilip dhi nka muk mwan shipe ɓwer kwang yil dhi mu kus-kus. 15 Bhi yaa sat bhilip khi Naan nbut lihnaan yaghal gurum mu khiding mu saam nih. 16 Mwan yaa nNazareth, peh ndhi yon a dih, yaghal nbut yaar ndhi a a ɗi-ɗen, bhi rhi lihnaan nteer wu pokovol bhi yaghal khiting nphe tang ran khi dighil bal-bal. 17 Mu shin Vilipnaan mu ran khi Ishaya ngu jagham (gu naa peh khi kaa) nnih. Bhi ep vilipnaan fe yaghal kat peh dhi mu ran, 18 "Riin Khi Naan nhi nka nih, nphe dhi pwas moor an nphe sat bhilip wuret nyen wu pya mu. Lep an nphe sat nnyen wu-dyaan mu ndhi an nphe taghat mu, yaghal nphe shin yit nyen wu vwagham mu, nphe shin nook nnyen ndhi mu trang mu, 19 nphe sat bhilip mu nbut yii wuret mhi Naan. 20 Yaghal oghot vilipnaan fe, shin ngu yha fe, bhi ya petong. Gurum mu duk-duk ndhi mu lihnaan fe mu lhi yit khi ka muk. 21 Yaghal ya sat bhilip khi mu na, "Shini bhi ndhi mu ran nbut vilipnaan si gam gwe nkom gu." 22 Gurum mu duk-duk ndhi mu dhi mu lap bhilip wuret khi ka muk yaghal bih fe deh a bhi ap'po mu nphe bhilip ndhi mu phe pwat nphimuk, yaghal mu tal, "Mhisi ani a la Yusufu ma?" 23 Bhi sat mu na, "A zen gun npe sat sim bhilip si an, 'Ngu dak gok, ghi dak kasak. Meh bhi dhi mu khilling ghi shin khi yil Capernaum, ghi shin duk khi yil fhik.'" 24 Bhi yaghal sat na, "A sat zeen ngun, tong mu khi lap meh ngu jagham khi yil finin ma. 25 Nphe ndhi a sat zeen ngun shirop-ka gyet mu bwer khi yil Israel nteer mu Elijah, ndhi mu oghot khitingnaan npe yii kun khi tar pehme, yaghal nen taa khi yil fe. 26 Dang bhi mu lep Elijah shin ya nder nmeh mu, kat ba a Zarephath ndhi Sidon ma, meh matka shi. 27 Khisher nyen loghom mu gyet nteer mu Elisha ngu jagham, dang bhi meh gwo kat kagham ma kat ba a Naaman ngu Syria ma. 28 Tughurnung yak gurum ndhi mu nlihnaan fe duk-duk ndhi mu khilling bih si mu. 29 Mu yighil, yaghal mu shen nhi khi yil fe, yaghal mu mang nhi mwan khi phi gohot pang khi yit yil, nphe kon nhi shin sam yil. 30 Bhi rhi nnaar mu del ya me peh wukwa. 31 Yaghal del sam nCapernaum, meh yil nbut yil Galilee, yaghal ya kam-kam mu par biit wu pokovol. 32 Bih fii-po nka kam khi muk, nphe dhi lap bihilip khi bal yon-yon. 33 Ndhi nhi nbut lihnaan bhi meh gwo shi dhi khi riin wubis, yaghal wal khi dighil wubal sina, 34 "Ah! A meh ka'at mun khi ghi eh, Jesu ngu Nazareth? Ghi ji a nphe Ghi wul a nphe tyo mun a? A man-ghi a Wubang Khi Naan." 35 Jesu byal riin wubis fe, sat na, "Ghi nok lap bhilip si ghi put nbut muk!" Ndhi riin wubis fe mang gwo fe kon nyil nnaar mu, bhi put nbut muk, bhi shin shwal meh ni ma. 36 Bih fe fii-po ngurum fe mu duk-duk yaghal mu ya lap bhilip nka khishak. Mu na, "A meh nkan bhilip meh asi eh? Nhi phi nin bal nka riin wubis mu bhi mu pwat." 37 Bhilip khi ka muk yaghal mwan shipe-shipe njep song-soghol yil mu. 38 Yaghal Jesu yit lihnaan fe bhi rhi nlih Simon. Dhi nbhisi bhi kut khaa nshik nighin mat simon, bhi mu dang phimuk nkop muk. 39 Bhi yaghal dar nkaa muk bhi shen kut fe, bhi kut fe yit nhi. Dih det bhi yaghal shin ya shin shiit nmu. 40 Ndhi puus ya taa, gurum mu ji khi duk-duk nyen ndhi mu khi gok dik-dik nder Jesu. Lhi sar nmu nka duk-duk khi mu yaghal gok fe mu lat. 41 Riin wubis duk mu pwat nbut gurum mu bwer, mu phi er sina, "Ghi a La Naan!" Jesu byal riin wubis fe mu nnot yit nmu nphe lap bhilip, nphe dhi mu man ndhi a ni a Kristi. 42 Ndhi biit bang, bhi mwan khi peh ndhi ji lagham dhi. Ɗu gurum mu tang kop muk bhi ji mu kat nih khipe ndhi nhi dhi. Mu daar yak khi nyit dun dhi. 43 Bhi sat nmu na, "A tiit deh an a sat bhilip wuret nka khitingnaan si ngokshi yil mu dhi, nphe dhi a wul a nphe ni." 44 Bhi yaghal deltighim khi sat bhilipnaan nlihnaan mu duk-duk ndhi mu khi yil Judiya.