Ep fe 23

1 Khiding gurum ndhi mu yighil khiting, yaghal mu ji khi Jesu ntighim Bilatus. 2 Mu ben bih wubis khi del muk, mu sat na, "Mu kat gwo si phi tihkok khi sim yil fun, nih phi sat na tap gurum mu khi'n shin/kwat wap fut nKaisa ma, yaghal nih phi sat nna jin shi khashin a Kristi, a long." 3 Bilatus tal shi phimuk na, "A ghi a Long Yahudawa mu ah?" Jesu pring nnih yaghal sat nna, "A ghi ghi sat a si." 4 Jesu sat nniyen bhilipnaan wu nan mu khi du gurum mu khiding na, "A kat meh lahar ndhi gwo si khi nih ma." 5 Dang bhi mu phi lhi tiit, mu sat na, "Nih phi kar gurum mu, nih phi kam khi yil Judiya duk-duk, she khi la yil Galili shin waji npeh si." 6 Ndhi Bilatus khiling ndhi si, bhi tal kot gwo fe a ngu Galili. 7 Ndhi man ndhi jin a lah ntighim Hiridus, bih lep khi Jesu nder Hiridus, ndhi nih shi khashin nih a Urishalima nbut teer wuni fe mu. 8 Ndhi Hiridus naa Jesu, bhi retyit muk, nphe ndhi nih phi dem naa nih nteer ndhi mu del jong-jong/sing-sing si. Nih sham khiling meh bih khi del muk yaghal nih phi langyit nphe naa bih fiipoo ndhi khiling nih phi shin fe. 9 Hiridus bih mu bwer phi Jesu, dang bhi Jesu pring meh bih nnih ma. 10 Niyen bhilipNaan wu nan mu yaghal niyen ran mu direm, mu ya rwang mu phi sat bih ndhi ret ma khi del/kha muk. 11 Hiridus nih khi niyen tap phi peh mu/soja mu fhilip Jesu yaghal shin mu tet nih. Yaghal mu rwan leh wuret nnih yaghal shin mu ba/lep khi nih shin ba nder Bilatus. 12 Nphe ndhi Hiridus mu khi Bilatus mu yak shar khi shak par bhit fe (deshe puus ndhi si bhi tong mu khi fwom nderhsak). 13 Bilatus yaghal yong niyen shiit Naan wu nan mu khi daskaham mu yaghal du gurum mu, 14 yaghal sat nmu na, "Gu ji khi gwo si n'nan khipe gwo gurum ndhi nih phi kar gurum mu deh nmu mu rwang dih, bhi gu na, an, khidangkong ndhi a shin tal mu shi phi muk, a kat nih khi meh lahar khi del bih ndhi gu lhi shin ma. 15 Hai, shin Hiridus duk, nphe ndhi lep nih shin baa nder mu, shin gu naa, mu kat meh bih ndhi shin ndhi wal ndhi mu khi tih nih ma. 16 Nphe ndhi a si an a dhil kom mu, yaghal a bwot nih." 17 Bhi Bilatus naa ret ndhi ji bwot meh gurum ndhi nih nlihkwoo nYahudawa fe mu nphe bhit retyit ndhi a shi yii-shi yii. 18 Bhi yaghal mu ep dighil du bal-bal khishak, mu na, "Ghi baa khi gwo ndhi si, yaghal ghi bwot Barabbas!" 19 Barabbas a meh gwo ndhi dok mu den nih nlihkwoo nphe khabal khi tarshik nmeh yil khi tih-kha. 20 Bilatus shin sat bhilip mu, phi dem yeh kot khi bwot Jesu. 21 Dang bhi mu yighil khi orr, mu na, "Pwas nih khi del shep, pwas nih khi del shep." 22 Nih shin sat nmu nyit wukun na, "A meh lhi a si eh, gwo si shin a bih wubis ndhi neh ngun eh? A a kat/naa shin meh bih ndhi khi lhi nphe tih nih ma. Nphe wuni fe bhi khidangkong ndhi a dhil kom muk, bhi a bwot nih." 23 Dang bhi mu lhi tiit-tiit khi orr du, mu phi wal nphe deh nmu pwas nih khi del shep dih. Orr khi mu fe ba seet en Bilatus. 24 Bhi Bilatus ba dem deh nmu pwas nih khi del shep fe dih. 25 Nih bwot gwo ndhi mu phi dem fe ndhi dok mu den nih nlihkwoo nphe rwang khi tihkha. Dang bhi shin Jesu nmu khipe ndhi mu phi dem fe si. 26 Ndhi mu phi del khi nih, mu ya meh gwo shi ndhi a Siman ngu yil Cyrene, ndhi waa bhini a nmwan, yaghal mu den shep pwas fe khika muk nnih mang, deh nih mwan khider Jesu dih. 27 Du gurum fe mu, khi shorop mu ndhi bih fe shwal nmu shin mu err nphe muk, mu phi mwan ndangkong muk. 28 Dang bhi ndhi viling naa mu, Jesu sat nna, "Jirap Urishalima mu, tap gu err nphe nih ma, gu err nphe khasuk khi jep fuk mu. 29 Nphe ndhi gu naa, puus fe mu nji ndhi mu khi sat mu na, 'Wuretkhinaan kat zang ndhi mu sham bak jep ma khi shorop ndhi sham mang gam ma, yaghal yughur ndhi jep mu sham shu fe ma.' 30 Bhi mu khi doghom sat npang wu nan mu, 'Gu pwatdik khi del mu,' yaghal npang wu diyen mu, 'Gu oghot mu.' 31 Nphe ndhi kat mu phi shin bih si ndhi ting mu kudih nbarak, bhi a meh nphe taa kat fii eh?" 32 Pak gurum wukwa mu, wat ndhi mu vhil si, mu del khi mu nphe mwan tiyo mu. 33 Ndhi mu ji mu wul khi peh ndhi mu khi yong nih a "Peh Eska," bhi mu pwas nih khi del shep, yaghal wat si mu-nme khi sar sih yaghal wukwa fe khi sar kul khi muk. 34 Jesu sat nna, "Nda, ghi kon khi nih nmu, nphe ndhi mu man bih ndhi mu phi shin fe ma." Bhi yaghal mu kon peel, mu koo leh khi muk khi naar sut. 35 Gurum fe mu diram mu phi naa-peh bhi daskaham khi yil fe mu phi tet nih, mu phi sat mu na, "Nih bar gokshi gurum mu. Yit nnih bar khashin, kat nih a Kristi nmhi Nda Naan, ndhi mang a nih fe." 36 Niyen tap phi peh/soja mu mu tet nih duk, tong mu ji kus khi nih, mu phi shin am lahting nnih, 37 yaghal mu sat muna, "Kat ghi a Long khi Yahudawa mu, bhi ghi bar kha sak." 38 Mu ran meh ran shi ndapkha mu ndhi sat nna, "Gwo si a Long Yahudawa mu." 39 Nmeh khinaar wat ndhi mu pwas mu khi del shep duk fe fhilip nih na, "A ghi a Kristi fe ma? Ghi bar khasak yaghal ghi bar mun." 40 Dang bhi gwo wukwa fe byal nih, nna, "Ghi phi lughut Naan ma, ghi man ndhi mu phi dhil kom nghi a wukhime khi nih duk ma? 41 Wu mun dhil kom fun nih khi yar, nphe ndhi mu shin simshik fe wai. Dang bhi gwo si shin meh wubis ma." 42 Bhi sat nna, "Jesu, ghi leng khi an kat ghi rii khitingnaan fik." 43 Jesu sat nnih na, "An phi sat zen nghi, shini si ghi nphe kot a wukhime khi an khitingnaan." 44 Dih det wai bhi puus lang khinaar, yaghal peh kwoo/tiip khiding khi lah yil wu ni fe mwan waji nnep puus wu kun 45 ndhi puus doghom taa. Det bhi labule lihnaan bak naar vhil tong khiting sam rhi. 46 Ndhi Jesu wal khi dighil wuyon, bhi sat na, "Nda, ghi lap seen nih ghi den nsar ghi." Ndhi sat a si, bhi muut. 47 Ndhi meh gu tap peh/soja wuyon naa bih ndhi taa, bhi saam sim Naan, sat nna, "A zen gwo si a gwo wu bang khi Naan." 48 Ndhi du gurum ndhi mu ji khishak deh nmu mu naa bih ndhi nphi taa dih deh mu naa bih ndhi mu phi shin fe dih, bhi wu wak mu phi nas yughur du. 49 Dang bhi duk-duk niyen ndhi mu man nih, khi shorop ndhi mu mwan yighil khi dangkong muk nGalili, mu direm pan nsing, phi naa bih si mu. 50 Det bhi meh gwo ndhi mu khi yong sim muk a Yusufu, ndhi a meh-meh nbut niyen nan khi yil fe mu. Nih a gurum sim shin nih a ngu shin wuret nder Naan. 51 Gwo si she niyang nook ndhi ye niyen nan fe mu mang khi bih ndhi mu shin. Nih a ngu Arimathea ndhi khi yil Judiya; yaghal shin nih phi tang kat Naan khiting. 52 Gwo si, mwan kat Bilatu, bhi tal nphe lap kum Jesu. 53 Nih sam khi kum fe, bhi maar nih khi meh nkan leh wuret, yaghal den nih nbut tughun wum/khisher ndhi mu ook nih shi but pang, ndhi mu sham den meh kum dih gwe ma. 54 Gyet a par Bhit/puus Dakshik, yaghal Bhit Dikyil nNaan/Bhit wu Pokovhil yaa bang. 55 Shorop fe mu, ndhi ye mu phi mwan khidangkong Jesu yaghal nGalili si, mu mwan mu naa tuhum wum fe khi wum fe duk. 56 Mu bhin wakji, yaghal mu dak shita mu khi moor. Bhi Par Bhit wu Pokovhil bhi mu nook sut nbut waar ndhi mu mang den.