Ep fe 22

1 Dih bhi Sih-peh nmhi Bredi ndhi nbhi khi rok, ndhi mu phi yong a ïdi si wulkus. 2 Bhi niyen shiit Naan wu nan mu khi niyen ran mu twaat peh ben yar ndhi dun nphe pet deh ndun du tih Jesu dih, nphe ndhi mu phi luwaghat gurum mu. 3 Bhi yaghal sharfom/shetan del nbhizung Yahuza Iskaryoti, ndhi nih a nmeh nnaar mu sar po vhil fe. 4 Yahuza mwan nder niyen bhilipNaan wu nan mu khi niyen ndhi mu phitighim yaghal mu ben yar ndhi nih khi yaa sar Jesu shin nmu. 5 Retyit mu, yaghal mu na du shin shaghal ngwar. 6 Lap yaa, yaghal tang pong ndhi ji kat deh njin shin nih nmu khipe ndhi du gurum mu kot dih ma. 7 Bhit nmhi sih Beredi ndhi wen nbih wurok wul, ndhi mu khi tih tihm Ïdi a tiit deh nmu shin bihzughum khi nih dih. 8 Jesu lep Bitrus/Pita yaghal Yohana, nna, "Gu mwan gu dak peh sih Ïdi nmun, deh nmun mu sih dih". 9 Mu tal shi phi muk mu na, "Ghi phi dm deh nmun mu dak peh fe a ne eh?" 10 Nih pring nmu na, "Gu khiling, kat gu del khi yil fe, bhi meh gurum ndhi nih khi dhilang am khi kat gun. Gu mwan nder muk khi gu rho nlih ndhi nih nphe rhi dih. 11 Bhi gu sat ngulih fe gu lhi, 'Ngu kam sat nghi na, "Lih kha'at mhizep den dih a ne eh, peh ndhi a sih Ïdi khi jep kam fin mu a ne?'" 12 Nih khi nin meh dighinlih wuyon ndhi mu dak nih nlih ndhi khiting. Gu dak peh a dih. 13 Ndhi a si bhi mu mwan, bhi mu kat bih mu duk-duk khipe ndhi sat nmu si wai. Bhi mu dak sih Ïdi fe. 14 Ndhi puus fe wul/gam, bhi nih tong a wu khime khi jep kam/shar shiit fin mu. 15 Bhi sat nmu na, "Tong an khi rhikhit wuyon nphe sih Ïdi ndhi si khi gun deshe a shu jel dih. 16 Nphe ndhi an phi sat ngun, an nphe shin sih fe zak ma, nphe ndhi bhilip si khi gam a khitingNaan dang si." 17 Bhi Jesu mang la daa shu am, yaghal ndhi shin plang, bhi sat nna, "Gu lap ndhi si, yaghal gu kho khi naar suk. 18 Nphe ndhi a sat ngun, " An nphe shu am lah-ting si zak ma, kat tingNaan taa/wul ma." 19 Bhi yahal masetedi, yahal ndhi shim plang, bhi trap mwo, bih set nnaa, "Nda si a shohop san ndhi mwo shin ngun. Tong gu shin a si npe kikder suk khi an." 20 Ni mang la daa wule khipe wuye sii shin nmwo khidangkong sii lipar bhi set nnaa, "Daa wule rih atuwarshik ndhi nbut tikim fun, ndhi a kon npe gu. 21 Dang bhi gu naa peh a wuret. Gwo ndhi nphe seet khi an nih nder nih khipe petong sih-sih si. 22 Nphe ndhi La Gurum khi muut a khipe ndhi mu dak den gwe si. Dang bhi jel dih ngwo ndhi nphe seet khi an!" 23 Mu doghom tal phi shak kot a weh nnaar du ndhi nphe shin bih wuni fe oh. 24 Bhi jaghar yaghal khinaar mu kot mu phi naa a weh a wuyon khi mu oh. 25 Nih sat nmu nna, "Long mu ndhi khinaar niyen ndhi mu man Naan ma a mu a wu nan khi mu, yaghal niyen ndhi mu khi bal nkaa mu bhi mu phi yong mu phi wuret ngurum mu. 26 Dang bhi yak khi kot a si khi gun ma. Nphe wuni fe bhi, gwo ndhi a wuyon khi del gu bhi khi deh a khipe wuleh si nnaar gu, yaghal gwo ndhi khi yon deh a khipe lah ndhi nih phi shin shiit ngun si. 27 Nphe ndhi a weh a gwo ndhi a wuyon eh, a gwo ndhi khi tong daat khipe sih a kot a gwo ndhi nih shin shiit ngun ye? A gwo ndhi khi tong daat khipe sih ma a? Khi ndhi asi an khinaar gu si bhi an a ngu shiit ngun. 28 Dang bhi a gun ndhi mwan fuk a wu khime khi an nbut kamnaa ndhi sharfom/shetan nih phi ji khi nih n'an. 29 A shin petong ngun khi yil, khipe ndhi Nda nih shin petong n'an si, 30 deh ngun gu sih yaghal gu shu khidel peh sih-sih fin khi peh ndhi an nphe tong dih, yaghal gun tong khi petong long gun phi tok diyel nkan khi Isarila mu pokovol. 31 Siman, Siman, ghi tap, sharfom dang deh nnih kat yar fik, deh nnih fii ghi khipe alkama si dih. 32 Dang bhi a dangphinaan npeh ghi, yak shinzeen nfik tep. Khi dangkong ndhi kat viling zak, bhi ghi shin tukurdwan n'emnighin ghi mu." 33 Pita/Bitrus sat nnih nna, "Nda, dak san nphe mwan nderghi shin yaa nlihkwoo khi muut." 34 Jesu pring nnih, "An a si nghi, Pita/Bitrus, deelko nih nphe tokshik npuus wuni ma, bhi ghi nphe shishik ndhi ghi man an ma yit kun." 35 Bhi Jesu sat nmu na, "Dok ndhi a lep gun shin pwat kihbang nnot nlah daam shaghal, khi shang/lau nmhi bihshak mu ma, nnot kohop, bhi gu kat meh bhi wen gun mhi?" Mu pring nnih mu na, "Meh bih wen ma." 36 Bhi sat nmu na, "Dang bhi khidetsi, gwo ndhi nih khi la daam, bhi mang pan, gwo ndhi nih khi shang/lau nmhi jep bishak mu duk. Gwo ndhi nih khi shik ngwam ma bhi seet khi leh lep fin deh nnih seet nmeh dih. 37 Nphe ndhi an a sat ngun, bih ndhi mu ran khi del nih a tiit deh nnih gam dih, 'Mu mang nih a khipe ngu tap khi waar ma si.' Nphe bih ndhi mu sat khi del nih ni phi gam." 38 Bhi mu sat mu na, "Nda, ghi naa! Shuk ngwam mu vhil mu si." Nih sat nmu na, "Mak/kiye asi." 39 Khidangkong sih-lhipar, Jesu del, khipe ndhi tong khi shin gwe si, mwan nPang Olives, yaghal shar shiit khi muk mu shinder muk. 40 Ndhi mu rho dih, bhi sat nmu na, "Gu dangphinaan yak sharfom khi kam gum." 41 Nih del sing peh khi Mu ma, bhi kurum yaghal dangphinaan, 42 bhi sat nna, "Nda, kat ghi dem, bhi ghi shang tighin si shin ba nkaa nih. Dang bhi a dem fin ma, dang bhi yit nbih ndhi ghi phi dem taa." 43 Bhi yaghal naa meh la/ngu lep khi Naan shi tong khitingnaan sam, shin bal/tukurkaham nnih. 44 Ndhi nih nbut bhizung tihkok, bhi dangphinaan a wuret, yaghal peh-baan khi muk bor deh a khipe tighim khi muk wuyon phi kon nyil niik-niik si. 45 Ndhi yaghal khiting Khidangkong ndhi dangphinaan si, bhi ji nder shar shiit fin mu, bhi kat mu phi sam fut det nphe bhizung tihkok ndhi mu nbut fe, 46 yaghal tal phi mu na, "Kan gun phi sam a anang ye? Gu yighil gu dangphinaan yak nsharfom khi nkam gun naa." 47 Ndhi kudi phi lap bhilip, det bhi, du gurum mu ji a wu khime khi Juda, me-meh nbut shar shiit/jep kam khi muk mu, nih taa ntighim mu. Nih ji dar kus khi Jesu bhim phi muk khi nmin, 48 dang bhi Jesu sat nnih na, "Juda, ghi nphe seet khi la Gurum shi bhim phi muk khi nmak a?" 49 Ndhi niyen ndhi mu kus nder Jesu mu naa bih ndhi nih phi taa/mwan dih, bhi mu sat mu na, "Nda, mu gos mu khi shuk ngwam fe a? 50 Bhi nmeh khinaa mu gap kom meh kwerem/kwaram khi meh ngu bhilipnaan wuyon fe, yaghal gap kom ndhi nkwang sar-sih si. Jesu sat nna, " Ndhi si mak/kiye asi!" 51 Nih yaghal bhim kom fe, bhi shin waji bam den dih ngwo fe. 52 Jesu sat nniyen Naan wu nan fe mu, khi niyen phitighim lihNaan mu, yaghal daskaham mu ndhi mu ji nphe yaa nih na, "Gu wul a nder wat wuyon, khi shuk ngwam yaghal dughul mu a? 53 Deh ndhi dok a wet tong nder gu nlihNaan, bhi gu lang sar khi del nih ma. Dang bhi yaghal khidetsi, yaghal gu kat bal nmhi kwoo." 54 Ndhi mu dhil nih karat, bhi mu del khi nih, yaghal mu ji khi nih lih ngu bhilip Naan wuyon. Dang bhi Pita/Bitrus tong mwan ndangkong mu nsing. 55 Khi dangkong ndhi mu bhil wus khinaarkom yaghal mu tong nyil ndershak, Pita/Bitrus tong khinaar mu. 56 Meh kwerem/kwaram ndhi a mat naa nih ndhi yaa pehtong nyit wus, yaghal naa nih nyit bhi sat nna, "Gwo ndhisi ye nih nder muk duk." 57 Dang bhi Pita/Bitrus shishik, nna, "Mat si, a man nih ma ko." 58 Deh dih leh bhi meh gwo wukwa naa nih, yaghal sat nna, "Ghi a nmeh nbut mu duk." Dang bhi Pita/Bitrus sat nna, "Gwa, a an ma." 59 Khi dangkong 'awa' khime del bhi meh gurum nkwa shin tiit-tiit yaghal sat nna, "Nphe nmhi zen gwo si nih a ye nih a wukhime khi nih, nphe ndhi nih a ngu yil Galili." 60 Dang bhi Pita/Bitrus sat nna, "A man bih ndhi gwo si nih phi sat fe ma." Det bhi, khipe ndhi nih phi sat fe si det bhi meh delkoo tokshik. 61 Ndhi Nda viling, bhi shikhir naa Pita/Bitrus, bhi yaghal Pita/Bitrus she khi khikder shin nih khi bhilip Nda, ndhi dok sat nnih nna, "Deshe delkoo tokshik dih shini bhi ghi shishik ndhi ghi man an ma yit kun." 62 Pita/Bitrus put khibang yaghal wal taa nwal bis-bis. 63 Bhi gurum mu ndhi mu phi kaan Jesu mu tet nih shin mu naas nih. 64 Mu oghot/vuhum yit muk khi meh teel leh shi yaghal mu sat nnih, mu na, "Ghi kos khi mhi! A weh shit ghi eh?" 65 Mu sat bih mu bwer ndhi nin ndhi mu niyang yit Jesu, mu phi tihkok khi sim muk. 66 Ndhi peh phi saan/bhit phi bang, bhi daskaham khi yil khi gurum fe mu shak kha sut khishak, niyen bhilipNaan mu khi niyen ran mu. Mu lap nih den ntighim shin kam khipe tokdyel 67 yaghal mu sat nnih mu na, "Kat a ghi a Kristi, bhi ghi sat nmun." Dang bhi sat nmu nna, "Kat a sat ngun, gun nphe shin zen ma, 68 yaghal kat a tal shi phigu, gun nphe lap tal fe an ma. 69 Dang bhi yaghal khidetsi shin kam ntighim, bhi La Gurum nih ntong khi sar wu sih nbut bal/yon khi Nda Naan." 70 Mu khiding mu sat mu na, "Bhi ghi a La Naan a?" Jesu sat nmu na, "A gun gu sat ai khi phigu." 71 Mu sat mu na, "Kan mun phi deh ntang a meh langtihng ndhi ne zak ye? Nphe ndhi mun shikasun mu khiling bih ndhi nih sat shi phi nih."