Ep fe 21

1 Jesu naa peh khiting yaghal naa niyen bihlong mu phi lhi zughum nbut daam lih shaghal. 2 Bhi naa meh mat kha shi wu piya nih phi den nini mu vhil. 3 Bhi sat nna, "A sat zen ngun, mat kha si wu piya den zughum met nmu duk-duk. 4 Mu duk-duk mu shin zughum fut a nbut ndhi mu khi nih bwer. Dang bhi nih mat kha si, nbut shoor khimuk, bhi den duk-duk bih ndhi nih khi nih." 5 Ndhi pak gurum mu lap bhilip nka lihnaan fe, khi dak nih ndhi mu shin khi jep pang-mhiwong yaghal zughum mu, bhi sat nna, 6 "Dang bhi nphe bih mu ndhi gun phi naa mu si, bhit nih nwul ndhi pang khime nphe deh khika mhiniye ma ndhi khi deh nnot nteh kon." 7 Bhi mu tal phi muk, mu na, "Ngu kam, bih si mu nphe taa a pehnang eh? A meh nphe kot deh a langting kat bih si mu nphe taa eh?" 8 Jesu piring na, "Gu tong khi seen yak mu khi nbang gun. Nphe ndhi gurum mu bwer nphe wul nbut sim nih, mu phi sina, 'A an a nih,' yaghal, 'bhit fe wul kus.' Gu nok mwan nder mu si. 9 Kat gu khiling kop liyak mu khi ruwang mu, gu nok luwaghat si, nphe ndhi a tiit deh nbihsi mu taa dang si, dang bhi lat fe khi taa la-la ma." 10 Bhi sat nmu na, "Yil wu yon nphe yaghal khi der yil wu yon, yaghal kop khi der kop. 11 Mu khi kat sikhin khi yil mu nan-nan, yaghal nen khi yil shipeh-shipeh khi gok mu. Bih lhi lughut mu khi bih naa khi yit mu nphe tong khitingnaan. 12 Dang bhi deshe bih si mu dih, mu khi lhing sar khika gu yaghal mu shinjeel ngun, mu bwot gun nsar lihnaan mu khi lihkwo mu, mu khi mwan khi gun ntighim long mu khi daskaham yil mu nphe sim nih. 13 Khi bor a pong nphe nin langting fuk. 14 Nphe ndhi asi gu den nbhizung gu ndhi ngu dak meh bih piring phimu dehshe bhit fhe dih ma, 15 nphe ndhi a shin bhilip ngun npoo khi se'en, ndhi khi lapo nsharfom fuk mu duk-duk nphe niyang gun kot a jaghar gun. 16 Dang bhi nda gu khi nighin gu mu, emnighin gu mu, yaghal wumi gu khi shar gu mu nphe niyang gun, yaghal mu khi tiyo pak gu mu. 17 Gurum mu duk-duk mu khi nyang gun nphe sim nih. 18 Dang bhi meh shop khime nkha gu nphe tihkok ma. 19 Nbut moghor fuk bhi gu kat se'en gu. 20 Kat gu naa niyen liyak mu neer Urushelima, bhi gu man ndhi tihkok khi nih wulkus. 21 Bhi niyen ndhi mu Judiya mu sho khi khikha pang mu, yaghal niyen ndhi mu nnaar yil fe mu yit peh fe dih, yaghal gu nok yit nniyen ndhi mu khi yil fe mu ro dih si. 22 Nphe ndhi bhit wuni fe mu a bhit piring wubis nshak, nphe deh nbih ndhi mu ran duk-duk mu gam dih. 23 Khi rap niyen ndhi mu khi ghiring khi niyen ndhi mu khi jep jiw nbhit wuni fe mu! Nphe wula wuyon khi kot khi yil fe, khi tughurnung khi Naan nkha niyen si mu. 24 Mu khi tiyo mu khi shuk ngwan yaghal mu ir mu shin a kwerem mu shin yaa khi yil mu duk-duk, yaghal Niyen ndhi mu man Naan ma mu khi daghas yil Urushalima, wul ji ngam khi bhit nmhi Niyen ndhi mu man Naan ma. 25 Langting khi nin nbut puus, nbut taar, yaghal nbut zar mu, yaghal khi dighinyil. Yil mu khi deh jeel, khi luwaghat khi dighil am kong wu yon wu khi biyal. 26 Mu khi kat daas ndhi mu phi duwam khikiw nsar lughut khi leng khi bih mu ndhi nphe taa khika dighinyil si. Nphe ndhi bal khi tingnaan mu khi sikhin. 27 Bhi mu khi naa Laa Gurum phi tong wawul nbut libhin khi bal yaghal ram wu yon. 28 Dang bhi kat bih si mu ya taa, gu yighil khiting yaghal gu ap kaa gu, nphe ndhi bar fuk yaksi wulkus." 29 Jesu sat meh simbhilip nmu, "Gu naa ting kwon, khi ting mu duk-duk. 30 Kat mu yaa pel, bhi gu naa nkasuk yaghal gu man ndhi lughun wulkus. 31 Shin asi duk, kat gu naa bih si mu phi taa, bhi gu man ndhi yil khi Naan wulkus. 32 A sat zen ngun, niyen bhit ndhi si mu khi lat/del ma kat bih si mu taa ma. 33 Khitingnaan khi dighinyil mu khi lat/del, dang bhi bhilip fin mu khi sham lat/del ma. 34 Dang bhi gu naa khasuk, yak ba gu den bhizung gu nbut bal khi mwos ndhi khi tih gun si, khi luwaghat khi petong khi yil si, det bhi bhit fe khi okhot gun a khipe gwak si. 35 Nphe ndhi khi taa khi gurum mu duk-duk ndhi mu phi tong khi dighinyil si. 36 Dang bhi gu wet ntong khi en gu, phi dangphinaan deh ngun gu kot khi bal ndhi khi lih ngun gu makha bih si mu ndhi nphe taa, yaghal gu direm ntighim La Gurum." 37 Asi bhi par bhit mu ndhi nih phi kam nbut lihnaan, yaghal nlhipar bhi put khibang yaghal tong dih nPang nmhi Paat mu. 38 Gurum fe mu duk-duk mu pwat khi-peh nbhit-bang nphe khiling nih nbut lihnaan.