Ep fe 20

1 Wul par meh bhit, ndhi Jesu nih phi kam-kam ngurum mu nbut lihnaan shin nih phi kam bhilip wuret, bhi niyen shiit Naan wu nan mu khi niyen ran-ran mu ji nder muk khi daskaham mu. 2 Mu lap bhilip nnih mu na, "Ghi phi shin bih si mu a khi bal weh? Kot a meh weh shin bal si nghi eh?" 3 Lap nmu nna, "An nphe tal meh bih phi gu duk. Gu sat bih n'an 4 nkha baptisma khi Jon. Dok tong a khitingnaan a kot a nder gurum mu eh?" 5 Mu ben nnaar shak, mu na, "Kat mu lhi, 'A khitingnaan,' bhi khi si na, 'Bhi a meh lhi deh gu shinzeen nnih ma eh?' 6 Dang bhi kat mu lhi, 'A nder gurum mu,' bhi gurum mu duk-duk mu khi fiya mun khi pang, nphe ndhi khi man ndhi Jon gyet a ngu jagham." 7 Nphe ndhi a si bhi mu lap mu na du man peh ndhi tong dih wul ma. 8 Jesu sat nmu na, "An duk nphe sat ngun kot an phi shin bih si mu a khi bal weh ma oh." 9 Bhi sat simbhilip si ngurum fe mu, 'Meh gwo shi kop tihng mu nmar, yit dih nsar niyen dak fe mu, yaghal del ya nmeh yil wu dik nphe teer vhil. 10 Ndhi bhit wul bhi lep meh kwerem nder niyen dak tihng fe mu, nna niyo lep khi lah-tihng fe njin. Bhi niyen dak tihng fe mu bwap nih, yaghal mu shen shin baa khi sar nfii/nnot meh bih. 11 Bhi shin lep khi kwerem wukwa bhi shin mu bwap nih duk, mu shin khakul nnih, yaghal mu shen nih shin wa khi sar nfii/nnot meh bih. 12 Shin lep khi gwo wu kun bhi shin mu shin shuwal nnih, yaghal mu kon nih shin put. 13 A si bhi nih ngu nmar fe sat na, 'A shin a meh eh? I lep khi lah nih ndhi an phi dem fe. Pak bhi mu khi shin yong nnih.' 14 Dang bhi ndhi niyen dak tihng fe mu naa nih, bhi mu ben khi naar sut, mu na, 'Ndhisi a nih a lah ir kop fe si. Mu tih nih, deh kop fe deh a nmun dih.' 15 Mu kon nih shin put nbut mar tihng fe yaghal mu tih nih. Nda ngu mar fe khi shin a meh nmu eh? 16 Khi wul yaghal tiyo niyen dak tihng fe mu, yaghal shin mar fe nniyen wukwa mu." Ndhi mu khiling, mu sat mu na, "Naan mang ba khi nih!" 17 Bhi Jesu naa mu, yaghal sat nmu nna, "A meh a phishi bih ndhia wu ri-ran: 'Pang ndhi niyen dhik lih mu niyang a nih bor a pang kuk lih eh a'? 18 Meh gwo ndhi phita khi kha pang fe bhi khi tirep diyen-diyen. Dang bhi kat phita a khi kha meh gwo, bhi khi byaghas nih." 19 Asi bhi niyen ran fe mu khi niyen shiit Naan wu nan fe mu bhi mu diye yaa nih par puus wuni fe, nphe ndhi mu man ndhi sat simbhilip a khi kha du. Dang bhi mu lwaghat gurum fe mu. 20 Ndhi mu ak nih a wuret, bhi mu lep khi niyen ndhi mu khi taanaan khi peh niyen wu bang mu si nphe tong ak nih, deh nmu mu kat lahar nbut bhilip khi muk dih, deh nmu den nih khi sar yon khi bal nmhi ngu phitighim yil fe dih. 21 Mu tal phi muk, mu na, "Ngu kam, mu man ndhi ghi phi bhilip yaghal ghi kam-kam wuret, yaghal meh gwo mak viling en ghi ma, bhi ghi phi kam kam a zen khi kha yar Naan. 22 Nih nbut yar nmhi waar deh nmun mu kwat wap nCaesar dih a, kot hai eh?" 23 Dang bhi Jesu man se'en khimuk, yaghal sat nmu na, 24 "Gu nin shaghal fe an naa. A riin khi sim weh khi ka fe ye?" Mu na, "A mhi Caesar." 25 Sat nmu na, "Bhi gu shin bih ndhi a nmhi Caesar nnih, yaghal bih ndhi a nmhi Naan, bhi gu shin nNaan." 26 Mu man kat meh lahar nbut bih ndhi bhilip nnaar gurum mu ma, dang bhi ndhi piring bhilip khi muk fii-poh nmu bhi mu deh nnot bhilip/poh. 27 Ndhi pak Sadiyawa mu ji nder muk, nmu ndhi mu shin zen nyaghal ntuhun ma, 28 mu tal phi muk, mu na, "Ngu kam, Musa gyet ran nmun na kat emnighin meh gwo muut, yit mat nih dih, shin nih nnot nlah, bhi gwo fe khi lap mat kum emnighin nih fe deh nnih kat lah nkum emnighin nih dih. 29 Gyet meh emnighin shak shi mu dih pokovol bhi wu sheh fe lap mat, bhi muut nnot lah, 30 shin wu vhil fe asi duk. 31 Wu kun fe lap mat fe, bhi wul nwu pokovol fe duk yit meh jep mu ma, shin muut. 32 Khi dangkong bhi mat fe muut duk. 33 Par bhit yaghal ntuhun bhi khi bor/deh a mat weh? Nphe ndhi mu pokovol fe gyet nih a mat mu." 34 Jesu sat nmu, "Jep dighinyil si mu mu phi lap shorop shin mu phi shin shorop ndiyak. 35 Dang bhi niyen ndhi mu khi phishii nphe kat yahal ntuhun nnaar niyen wu dyuwam mu khi sham lap shorop ma shin mu shin mu ndiyak ma. 36 Shin mu dyuwam ma zak ma, nphe ndhi mu deh nkhit khi jep lep khi Naan mu shin mu a jep Naan, nphe ndhi mu a jep yighil ntuhun mu. 37 Dang bhi niyen wu dyuwam mu ndhi mu yighil khi mu, Musa duk gyet nin, khipeh ndhi gyet a dem si, ndhi yong Nda Naan nmhi Abraham khi Naan nmhi Isaac khi Naan nmhi Jacop. 38 Khidetsi, nih a Naan nmhi niyen wu dyuwam mu ma, nih a nmhi niyen se'en mu, nphe ndhi duk-duk mu nphe wakya a nder muk." 39 Pak niyen ran fe mu na, "Ngu kam, ghi piring bhilip si a wuret." 40 Nphe shin mu mak tal meh bhilip phi muk ma. 41 Jesu sat nmu na, "Shin anang deh mu na Kristi fe a lah Dauda dih ye? 42 Nphe ndhi Dauda shi kashin sat nbut Vilipnan ran nmhi Psams, Nda sat Nda nih, 'Ghi tong nsar nih wu sih, 43 deh an a lih nsharfom fik mu bor bih daghas khi kwak/shii fik.' 44 Nphe ndhi a si Dauda yong Kristi a 'Nda', bhi bor a lah Daudu anang eh?" 45 Sat shar shiit fin mu nyit gurum mu duk-duk na, 46 "Gu tap niyen ran mu, ndhi mu phi dem mwan nbut leh wu kwan mu, yaghal mu phi dem nmu tal dun khi yon nnaar lihtuk, shin mu phi dem tong ntighim nbut lihnaan, khi tong ntighim khi peh sih-peh. 47 Yaghal mu khi wet a wet det lih shorop-kha mu, yaghal tong mu dangphinaan khi pehlat ma nphe sim. Gurum mu khipe niyen wuni fe mu kat nyangyit wu yon.