Ep fe 18

1 Bhi kam sim bhilip nmu nka yar ndhi mu khi tong dang Naan, khi yar ndhi yak nshi-shik mu khi waam ma, 2 si na, "Khi meh yil shi bhi meh ngu tok diyel ndhi nih phi lughut Naan ma shin khi shin yon ngurum mu ma dih. 3 Dih khi yil fe bhi meh mat kaa dih, bhi khi tong wul nder gwo fe, na, 'Ghi baam an ghi gap diyel nmun khi sharfom nih.' 4 Nbut teer mu bwer bhi nih phi dem baam mat fe ma, dang bhi khidangkong bhi sat nkashin na, 'Duk khi ndhi tong a lughut Naan ma kot a shin yon ngurum ma oh, 5 dang bhi nphe ndhi mat si khi yit an a nook ma, bhi a baam nih nphe gap diyel fe nnih, yak ba khi tughur an khi wet khi wul khimuk ma.'" 6 Bhi Nda Naan sat nna, "Gu khiling bih ndhi ngu tok diyel-dung si sat. 7 Khidetsi Naan khi gap diyel wuret niyen fin ndhi taghat mu ndhi mu phi err nnih npuus khi lhipar ma a? Khi shimkur nphe mu a? 8 A sat ngun si na nih nphe gap diyel mu a wuret la-la. Khi ndhi a si duk, kat La Gurum wawul, bhi khi kat shinzeen mu khi yil si a?" 9 Bhi shin sat simbhilip npak niyen ndhi mu naa khipe ndhi dun a niyen wubang yaghal tong mu byas gokshi gurum mu, 10 "Gurum mu vhil mu mwan nlihnaan nphe dangnaan-mei a Farisiyawa yaghal wukwa fe a ngu lap shaghal wap. 11 Ngu Farisiyawa dar khiting yaghal sat bih si mu nkashin, 'Nda Naan, a plang ghi nphe ndhi an a khipe gokshi gurum mu ma-wat mu, niyen ndhi mu nnot bang, niyen tileet mu-kot a khipe ngu shak shaghal wap si ma.' 12 An phi din san nsih-sih yhit vhil nbut teer pokovol. An phi shin kaa nmhi bihlong fin duk-duk ndhi an phi kat fe.' 13 Dang bhi ngu shak shaghal wap fe, dar khiting sing-sing/jong-jong, bhi ep yit nih khitingnaan ma duk, dang bhi nung bhizung nin, bhi sat nna, 'Nda Naan, ghi naa jeel nih, an ngu shikbis.' 14 A sat ngun, gwo si waya khi pang lihnih nbut bhizung piya met ngwo ndhi si, nphe ndhi meh gwo ndhi mang khashin a meh bih bhi mu khi sam khi nih, dang bhi meh gwo ndhi sam khi kaa nih bhi mu khi shin yong nih." 15 Gurum fe mu tong mu ji khi jep du mu nnih, deh nnih bhim mu dih, bhe ndhi shar shiit khi muk mu naa, bhi mu mu biyal mu. 16 Bhi Jesu yong mu shin ji ndershin, nna, "Gu yit njep wu diyen mu ji nder nih, yaghal gu nok tong dang/shen mu si. Nphe ndhi khitingnaan a nmu nkan mu wuni fe. 17 A sat zen ngun, meh gwo ndhi khi lap khitingnaan khipe la wuleh si ma bhi khi sham kat del dih ma." 18 Meh miskaham tal phimuk, na, "Ngu kam wuret, a shin a meh deh an a kat tingnaan diye?" 19 Jesu pring nnih na, "A meh lhi deh ghi yong an a gwo wuret dih eh? Meh gwo a wuret ma, kat a Naan khime det ma. 20 Ghi man war fe mu-ghi tap tileet, ghi nok tihkaa, ghi nok wat, ghi nok dar langting dung si, ghi shin yong nda ghi khi nighin ghi." 21 Miskaham fe sat na, "Duk-duk bih si mu bhi an phi shin fe mu tong yaghal ndhi pegyet an a dengmaar." 22 Ndhi Jesu khiling wuni fe, bhi sat nnih na, "A bih khime ndhi wen nghi. A tiit nghi ghi seet khi bih mu duk-duk ndhi ghi khi nih yaghal ghi koo nniyen wu piya mu, bhi ghi den shirem/kat bihlong khitingnaan- bhi ghi ji, ghi mwan nder nih." 23 Ndhi miskaham fe khiling bih si mu, bhi bhizung muk tihkok a leh ma, nphe ndhi nih khi bihlong bwer. 24 Ndhi Jesu naa nih, deh kat ndhi bhizung muk tihkok bhi sat na, "khi laa-po deh nniyen bihlong mu rho khitingnaan! 25 Nphe ndhi khi kot nwak deh rakumi del put nbut nfung yir tan-leh met ndhi ngu bihlong khi rhi khitingnaan." 26 Niyen ndhi mu phi khiling fe muna, "Bhi a meh weh nphe kat bar eh? 27 Jesu lap nmu nna, "Bih ndhi lapoh ngurum mu khi lapoh khi Nda Naan ma." 28 Pita nna, "Dang bhi, mun mu yit bih fin mu duk-duk yaghal mu mwan nder ghi." 29 Jesu bhi sat nmu nna, "A sat zen ngun, meh gwo dih ndhi khi yit lih nih, kot a mat nih, kot a emnighin nih mu, kot a nda khi nighin nih mu, kot a jep nih mu oh, nphe shiit khitingnaan, 30 ndhi khi nok kat bih mu bwer nbut dighinyil si ma, shin nbut yil ndhi nih nji, se'en nmhi tai-tai." 31 Khidangkong ndhi khat wu sar po vhil fe mu nder nih, bhi sat nmu nna, "Gu naa, mun mwan ya nUrishelima, bhi bih ndhi niyen jagham mu ran nkha La Gurum nphe gam. 32 Nphe ndhi mu nphe shin nih nniyen ndhi mu man Naan ma, yaghal mu khi tet nih, yaghal mu shin khakul nnih, shin mu bwak zel khi del muk. 33 Khidangkong ndhi kat mu bwap nih, bhi mu khi tih nih yaghal Khidangkong teer wu kun bhi khi shin yaghal." 34 Mu man kha bih si mu ma, yaghal mu sok bhilip si nmu, bhi shin mu man kha bih ndhi mu sat si ma. 35 Bhi deh dih, ndhi Jesu wulkus khi yil Jeriko, bhi meh gurum shi wu vughum khi tong phi yarkaam phi dang-dang, 36 bhi ndhi khiling du gurum mu phi del, bhi tal kot a meh phi taa oh. 37 Mu sat nnih muna a Jesu ngu Nazaret phi del yar. 38 Bhi gwo wu vughum fe fwa orr bal-bal, nna, "Jesu, La Devit, ghi najeel nih." 39 Niyen ndhi mu del ntighim dang si mu shen phi gwo wu vughum fe, mu sat nnih mu na gwar nok bihp. Dang bhi shin bak orr nih bal-bal met wuye si, "La Devit, ghi naa jeel nih." 40 Jesu dar daghat/shak yaghal lhi nmu mu ji khi gwo fe nder nih. Bhi ndhi gwo wu vughum fe ji kus, Jesu tal phi muk nna, 41 "Ghi phi dem n'an a shin a meh nghi eh?" Wu vughum fe nna, "Nda, an phi dem an a naa peh khi yit nih." 42 Jesu sat nnih nna, "Ghi lap naa-peh fik. Shinzeen fik shin kaham nghi." 43 Berber bhi naa-peh fin wai yaghal mwan nder muk, phi saam sim/dikyil nNaan. Duk-duk gurum, ndhi mu naa bih si, bhi mu saam sim/dikyil naan.