Ep fe 15

1 Par meh puus bhi nyen lap wap mu khi nyen shikbis mu duk-duk mu ji nder Jesu nphe deh nmu khiling meh bih ndhi nih nphe sat fe dih. 2 Nyen Farisiyawa mu khi nyen kam waar khi Musa mu phi lap bhilip ndagham-ndagham nshak, mu sat nna, "Gwo si lap nyen shikbis mu, shin nih phi sih-sih a wukhime khi mu." 3 Jesu sat meh sim bhilip mu na, 4 "A weh nnar gu, kat nih khi tihm mu yagurum paat deh me-meh khime laham, bhi khi yit ndhi mu yakgurum fer khi sar po pokofaar si mu nbut dem, deh nnih mwan tang ndhi laham fe nphe kat fe ting eh? 5 Bhi katdang kat tihm ndhi laham fe, bhi khi mang shoor khi bap nih khi retyit. 6 Kat ji wul khipang, bhi khi yong peeh nshar nih mu khi tinglih mu khishak, bhi khi sat nmu na, 'Gu shin retyit a wu khime khi an, nphe ndhi a kat tihm fini ndhi laham.' 7 A sat ngun khi ndhi a si duk, mu khi kat retyit khitingnaan nphe meh ngu shikbis khime ndhi tihwap, met nyen ndhi ngurum yakgurum fer khi sar po pokofar wuret mu, ndhi mu khi wal tihwap ma. 8 Ma bhi a meh mat ndhi neh ndhi nih khi shaghal azurfa (pang mim bhim) mu sar, kat me-meh khime laham, bhi khi lang wus fitila ma eh, yaghal kum peh ɓang-ɓang deh nnih kat dih ma? 9 Kat kat shaghal ndhi laham fe, bhi khi yongpeh nshar dih mu khi tinglih mu khishak, deh nnih sat nmu na, 'Gu shin retnyit a wu khime khi an, nphe ndhi a kat shaghal fini ndhi laham.' 10 Khi ndhi asi duk, bhi a sat ngun, nyen lep khi Naan mu khi shin retnyit bwer nphe ngu shikbis khime ndhi tihwap." 11 Bhi Jesu sat nna, "Meh gurum nih khi jepdaas mu vhil, 12 bhi lah wu leh fe sat nda du na, 'Nda, ghi koo bhilong fhik nmun deh n'an a kat man dih.' Bhi nda fe koo bhilong fin khinar mu. 13 Khi dangkong meh jep teer mu pong mu, bhi lah wuleh fe thil leeh ndhi nih a nmhimuk duk-duk lhi khishak bhi yaghal yaa yar mwan nmeh yil ndhi jong-jong/sihng-sihng, bhi dih bhi tih shaghal fini duk-duk khika bih wu buu/baan mu. 14 Ndhi shaghal khimuk lat kwet-kwet, bhi meh neen wubis taa dih nyil wuni, bhi yaghal del njeel. 15 Bhi mwan tang shiit phi meh ngu yil fe, bhi gwo fe lep nih nphe tap ledeh mu ndem. 16 Nih phi dem sih pak sih-ledeh mu, nphe ndhi meh gwo phi shin meh bih nnih ma. 17 Dang bhi ndhi en khi lah si waji nnih, bhi leng en nbhizung nih na, 'Nyen shiit nda nih mu a dang ndhi mu phi kat sih ndhi khi mak mu, bhi an si, nphe muut khi neen! 18 A yit peh si deh a waa nder nda nih, yaghal a sat nnih, "Nda, a shin shikbis nNaan, shin a shin shikbis nghi. 19 A kudi khi meh phishi ndhi ghi yong an a lah ghi zak ma; ghi mang an a khipe pak nyen shiit fik si mu.'" 20 Bhi lah wu leh fe yaghal waya nder nda nih. Ndhi kudi jong-jong, bhi nda muk naa nih, bhi najeel khimuk, yaghal taa nna-sih-sih, mwan khi taa khi tok muk shin bhilim phimuk. 21 Lah fe sat nnih na, 'Nda, a shin shikbis nNaan, shin a shin shikbis nghi zak. An si a kudi khi phishii ndhi shin mu khi yong an a lah ghi zak ma.' 22 Nda fe sat nkwaram fini mu na, 'Gu put khi leh lep wuret met doghol/duk-duk lala, gu lep nnih, yaghal gu lep ngan sar nnih nlah nikongsar khimuk, yaghal gu lep kokhop nnih nkwak zak. 23 Gu mwan gu yaa meh randong wu miyar-miyar gu tih. Mu shin retyit khi sih-peh! 24 Nphe ndhi lah nih dok deh a khipe gwo ndhi muut a muut gwe si, bhi khidetsi nih khi seen. Dok deh a wu-lilaham, bhi khidetsi mu kat nih.' Mpeh wuni bhi mu yaa retnyit. 25 Mu phi shin retnyit bhi lah muk wuyon/khishee khimuk deh nmar/ndem. Ndhi waji kus khi lih, bhi khiling bang khi tam. 26 Bhi yong nmeh kwaram nmeh yaga tal bih ndhi mu phi shin fe dih. 27 Kwaram fe sat nnih na, 'A emnighin ghi wawul bhi nda fhik na mu tih randong ndhi miyar-miyar nphe retnyit, nphe ndhi wawul shaghap.' 28 Lah wuyon/kishee si khiling khi tughurnung, bhi nyang rii ndighinlih, bhi nda muk put, yaghl shin moghor nnih. 29 Bhi lah wuyon fe lap sat nda nih na, 'Ghi naa, yii mu bwer si/yii khi yii, bhi an phi wula shin shiit nghi, bhi a sham tep nmeh waar fhik ma, khi ndhi a si bhi ba ghi sham yaa meh lah dhigung ghi shin n'an a shin retnyit khi shar nih dih ma, 30 dang bhi ndhi lah ghi ndhi mwan tihkok khi bihlong fik kishak khi napakhar mu waji, bhi ghi tih randong ndhi miyar-miyar nnih.' 31 Bhi nda muk lap sat nnih na, 'Lah nih, ghi dih a wukhime khi an shibiit-shibiit, nphe wuni bhi bihlong fhin duk-duk a nmak. 32 A nphe ndhi a si bhi ret deh nmun mu shin retnyit, nphe ndhi dok mu naa khipe ndhi emnighin ghi si muut a muut, bhi nih khi seen khidetsi; laham a laham gwe duk, deh khidetsi bhi mu kat nih.'"