Ep fe 13

1 Nbiit wuni, bhi pak gurum mu lap bhilip khi del nyen Galilimu ndhi Pilate riyep tighim khi mu khi bhizughum. 2 Jesu lap sat mu na, "Gun phi leng a khipe ndhi nyen Galili ndhi si mu kih shikbis met ngokshi nyen Galili fe mu nphe dhi mu shu jeel nyar mhi si mhi? 3 Asi ma, a sat ngun. Kat dang gu tihwap ma, bih duk-duk fuk gu dughun. 4 Ma bhi gurum mu sar po pokokun ndi lih wu fiyer-fiyer put-taa khi del mu, two mu, bih gu na a khi bih ndhi a mu nyen shikbis ndhi met ngokshi das mu Nurishalima (Jerusalem) mhi? 5 Hai, a sat. Dang bih kat gu tihwap ma, duk-duk fuk gu dughun." 6 Jesu sat meh sim bhilip, "Meh gurum nhi khi ƙwon nmar fini ɓhi mwan nphe tiling/tal la ƙwon fe ɓhi kat ting fe ni khi la ma. 7 Ɓhi gwo fe sat ngu tap kih ting fe, 'Ghi naa, nphe yii mu kun an phi daar ye a kat ting fe khi laa ɓhi a kat meh bih ma. Gap ghi kon si nyil. A meh lih ɗeh ting fe khi tihkok khi mar ye?' 8 Ngu tap khi ting si lap sat nna, 'Ghi yit ting fe ɗih nyii si ɗhe an a ok bider fe a lih fhip ɗih. 9 Kat la-la shighirsatni ma, ɓih ret, kat la-la ma, gap ghi kon nyil!'" 10 Jesu nih phi kam-kam nme LihNan par biit wu pokovol (sati). 11 Ɓhi, meh mat nɗhi shin yii sar po/ka pokokun khi riin mhi shin khi bal, shopshik muk grong deh kih makpe dar khiting a wuret ma. 12 Ndhi Nda Jesu naa nhi, bih yongpe nhi, sat nna, "Na mat, a shang shwal fih si shin ba." 13 Ɓhi ten sar nih khidel mat fe, bir-bir bhi mat si kat bal bhi yaghal saam sim Nda Naan. 14 Bhi ngu tap phi lihNaan si khilling khi tughurnung nphe ndhi Jesu bar khi gurum par Biit wu pokovol (Sati). Bhi ngu tap khi lihNaan si sat nna, "Ter mu dih peme nphe shin shiit. Gu ji dhe mu lat khi shawal fuk dhi. Ba a par par Biit wu pokovol (Sati) ma". 15 Nda lap sat nnhi nnaa, "Gurum wubis mu! Gun duk-duk phi fhon nagham/zaki ma bih randong khipe bwaghat dhe gu mwan khi nhi khipe shua am par Biit wu pokovol (Sati) ma? 16 A si zak, larep Abraham, ndhi riin wubis bwaghat nih npeh yii sar po/ka pokokun, mu khi fon teng bwaghat fe a par par Biit wu Pokovol (Sati) ma a? 17 Khi dangkong ndhi sat bih si nmu, bhi duk-duk nyen ndhi mu niyang ni mu khilling khi kakul, gokshi ɗuu gurum mu shin retnyit khidel bih fipo ndhi shin. 18 Bhi Jesu sat nna, "Khitingnaan nmhi Naan ni a khipe me si ye? A kam ni a khi me? 19 Nih a khipe la iih mastard ndhi meh gurum mang mwan fuu nmar lughun fini, yon bhi bor a baga ting, bhi yer ndhi mu khitingnaan mu ɗyak lih khikaa sar ting fe." 20 Bhi shin sat zak, "An nphe kam khitngnaan mhi Naan a khi meh? 21 A khipe yiist (yeast) ndhi meh mat mang riyep khi kuyange ass mu kun ndhi riyep khishak khi ass fe duk-duk." 22 Jesu mwan naa jep yil wu dyen khi wu nan khi yarkaam mwan nUrishalima bhi kam-kam mu. 23 Meh gurum sat nni, "Nda, gurum mu a nla'ni nphe kat sen ah?" Bhi nhi sat nmu, 24 "Daar nphe del nphilih ndhi dwat-dwat, nphe dhi, a sat bwer mu phi dem del, dang bhi mu khi kat del ma. 25 Kat ngu lih yaghal bal philih, bhi ghi dar a khibang dhe ghi kwak philih ghi lih, 'Nda, Nda, ghi ep philih nmun del.' Bhi khi lap sat ngun, 'A man gun ma, khi peh ndhi gu pwat dhi ma.' 26 Bhi gu sat gu lhi, 'Mu sihsih bh mu shwuwa am ntighim ghi bh ghi kam-kam nmun khi kaa yarkaam funu.' 27 Bhi khi lap sat, 'A sat ngun, a man peh ndhi gu pwat dhi ma. Gu bwak nder nhi, nyen shiit-shin wubis mu!' 28 Wal khi kot dhi khi arap aghas kat gu naa Ibrahim, Ishaku, Yakubu, khi nyen jagham mu (nyen naa peh shi kaa nmu Naan mu), gun zak bhi mu khi shen gun shin pwat. 29 Gurum mu khi pwat nkwang yit arkaa, sar kansighin, nkwang ndel, khi nkwang sam, bhi mu khi del deh nmu tong khi pe sih-sih ndighin khitingnaan mhi Nda Naan. 30 Gu naa dak, nyen ndhi mu mang kasut khi me phishi ma, mu khi deh a nshe, yaghal nyen ndhi mu mang kasut khi phishi, a mu khi deh ndangkong, nnot phiship. 31 Khi dangkong wuni, bhi pak nyen Faris mu ji mu sat nJesu mu na, "Ghi yit peh si dhi nphe dhi Herod (miskagham) nih phi dem tiih gih." 32 Jesu sat lap nmu nna, "Mwan gu sat baghaldwam si, 'Gu naa, a shen riin wubis mu, yaghal a shin shiit lat khi lat khi shwal shini khi dhidhar, bhi nbiit/puus wu kun bhi a sih kokrong.' 33 Kat a si, a tiit det dhe an a deltighim dhi shini, dhidhar khi putbiit, nphe dhi khi ret dhe mu tiih ngu jagham (ngu naa peh shi ka mhi Naan) nUrishalima ma. 34 Urishalima, Urishalima, a weh mu mu tuwo nyen jagham (nyen naa peh shi ka mhi Naan mu) yaghal mu fya nyen ndhi mu lep khi mu ngun eh. An a phi dem t'hil jep fuk mu a khipe nighin koo ndhi thil jep dhi mu nbider shaap dhi, dang bhi gun phi dem asi ma. 35 Gu naa, lih fuk deh a shinglih. A sat ngun, gun nphe naa an ma, deshe gu sat gu lhi, 'Gwo wuret a gwo ndhi ji dighin sim khi Nda.'"