1 Deh dih, ndhi gurum mu gam mu kaat bhi mu shak sut khishak, ndhi wul ndhi mu phe tereng shak, bhi doghom sat shaar shiit fhini mu nshe na, "Gu tap yisti nmhi Farisiyawa mu ndhi a tahnaan. 2 Dang bhi meh bih a wu si-sok ndhi khi mhin kasat ma. 3 Nphe ndhi a si duk bhi ndhi gu sat nkwoo bhi mu khi khiling khi peh-bang, yaghal bih ndhi gu sham nkom ndighin lih mu khi bhilip kaa khiting lih. 4 A sat ngun shar nih mu, tap nbhi gu lwaghat niyen ndhi mu khi t'hi ghitshik si, bhi khi dangkong wuni bhi mu kudi khi bih shin ma. 5 Dang bhi a taat sar ngun nphe gwo ndhi gu lwaghat. Gu lwaghat gwo, ndhi khi dangkong kat t'hi, bhi nih khi bal nphe kon gurum nwus. Eh, a sat ngun, gu lwaghat nih. 6 Tong mu khi se'et yer mu pa'at nka kabo vhil ma a? Dang bhi nmeh khimeh nbut mu bhi mu bhi en Naan khi mhind khi mu ma. 7 Bhi a shoop ndhi kaa gu bhi a ku-kun. Gu nok lwaghat si. Gun khi phishi gu met nyer mu bwer. 8 A sat ngun, meh gwo ndhi yong sim nih ntighim gurum mu, bhi La Gurum duk khi yong sim muk ntighim jep lep khi Naan mu dih, 9 dang bhi gwo ndhi niyang an ntighim gurum mu bhi a nyang nih ntighim jep lep khi Naan mu. 10 Meh gwo ndhi lap bhilip wubis nkaa La Gurum, mu khi kon khi nih nnih, dang bhi gwo ndhi thikok khi sim Riin Wubang, mu khi kon khi nih ma. 11 Kat mu wakji khi gun ntighim lihnaan, niyen phitighim mu, khi niyen yaa yil mu, tap bhi khi shuwal ngun ma nphe yar ndhi gu lap bhilip nphe pwat khi kaa gu, ma bhi bih ndhi gu sat, 12 nphe ndhi Riin Wubang khi kam bih ndhi gu sat nmu npuus wuni fe." 13 Bhi meh gwo shi nnaar ɗu gurum fe mu sat nnih na, "Ngu kam, ghi sat emnighin nih ko bhilong kop khi nda mu khi an." 14 Jesu sat nnih na, "Gwa, a weh den an ah ngu diyel ma bhi langting nnaar gu eh?" 15 Sat nmu na, "Gu tap khi kasuk nsar leng nmhi tilik mu, nphe ndhi seen gurum kot a bih a nbut bhilong bwer ndhi nih khi nih ma." 16 Bhi Jesu sat simbhilip mu na, "Sih ret nmar khi meh ngu bhilong, 17 bhi shin leng nbhizung nih, na, 'A shin a meh, nphe ndhi an khi peh ndhi a lhi sih ndhi a diip dih ma?' 18 Bhi sat na, 'Bih ndhi a shin a si. A righip me'eh fhin mu deh a dyik wu nan-nan mu, deh an a lhi sih ndhii a diip mu dih khi gokshi bhilong fhin mu dih. 19 A sat nse'en nih "Se'en nih, yhi khi bhilong bwer ndhi yi den nphe yii mu bwer. Yi nook-shik, yi sih-sih, yi shu, bhi yi shin retyit.'" 20 Dang bhi Naan sat nnih na, 'Wu yoghor gurum, nlipar si bhi mu nphe dem se'en ghi, bhi bhilong ndhi ghi dak ghi lhi fe kot a nmhi weh?' 21 A khi peh gurum ndhi tang bhilong lhi nshin bhi nih khi long nder Naan ma." 22 Jesu sat nshar shiit fhin mu, "Nphe ndhi a si a sat ngun, tap bhi gu shin leng nkaa se'en gu ma - bhi ndhi gu sih, ma bhi khi ghitshik - bih ndhi gu lep. 23 Nphe ndhi se'en mah sih, yaghal ghitshik mah leh lep. 24 Gu naa yer mu, mu phi kop-kop ma shin mu phi diip ma. Mu khi meeh ma, bhi Naan phi sih khi mu. Gun khi phishi met yer mu! 25 A weh nnaar gu nphe lughut/leng ndhi nih khi nih nphe se'en nih bhi kiye del se'en nih nlani eh? 26 Kat asi ndhi gu kiye shin meh bih ndhi nlani kaklak ma, bhi a meh lhi deh gu kat leng nphe gokshi fe mu dih eh? 27 Gu diye tingdem mu ndhi phi pwat khi pel wuret - yet ndhi mu beeh dih. Mu phi shin shiit ma, shin mu phi yighir ma. Dang bhi a sat ngun, duk khi Sulemanu khi ram khi muk bhi lep leh wuret khi phe mu si ma. 28 Kat Naan man rughun leh wuret ndem mu khi sal, ndhi khi kot a shini, bhi didar bhi mu kon nbut tanrik, bhi khi kot a nang dhi khi rugun leh ngun, oo gun niyen shinzeen nlani! 30 Nphe ndhi jep yil mu khiding khi dighinyil mu phi tang bih wuni fe mu, bhi Nda gu man man ndhi gun phi dem bih wuni fe mu. 31 Gu she tang a yil khi Naan, bhi gu kat bih ndhi si fe mu. 32 Tap gu lwaghat ma, jep wu diyen mu, nphe ndhi retyit nNda gu npeh deh nih shin yil fhin ngun dih. 33 Gu serep khi bhilong fuk yaghal gu shin niiyen wu piya mu. Gu dak dam-shaghal ndhi khi lat lat ma-gu tang khitingNaan ndhi khi lat lat ma, peh ndhi meh wat khi ji kus dih ma, shin meh njileng khi tikhok khi nih ma. 34 Nphe ndhi peh ndhi bhilong fhik dih, bhi bhizung kot khi deh a dih duk. 35 Yit deh gu shin dambira, yaghal wus fuk mu deh a wu li-lap, 36 shin deh a khipe niyen ndhi mu phi tang ngulih fut ndhi nwawul khipe sihpeh bwaghatdik, nphe deh kat waji kwak phi-lih, bhi mu khi ep nnih nkiyen. 37 WuretkhiNaan a wu khime khi niyen shiit, ndhi ngulih khi wawul kat mmen kat wawul. Zeen a sat ngun, khi shin dambira leh fin wu kun, yaghal lhi mu khi petong, yaghal dak mu. 38 Kat ngulih waji wu vhil nlipar, ma bhi waji nyit wu kun, deh kat mu dak kaa sut, bhi wuretkhiNaan khi kaa niyen shiit wuni fe mu. 39 Shin gu man ndhisi, ndhi kat ye ngulih man pus khi lhipar ndhi wat npeh wul bhi khi yit nnih del njin nlih ma. 40 Gu dak suk duk, nphe ndhi gu man bhit ndhi La Gurum nwawul ma." 41 Pita na, "Nda, ghi phi sat simbhilip si a nmun det ah, kot a duk-duk gurum mu eh?" 42 Nda sat na, "Bhi kan a weh a ngu shin zeen khi ngu tap peh ndhi kat ngulih khimuk den nih a phitighim gokshi niyen shiit mu deh nnih shin sih nmu kat peh mak sih-sih eh? 43 Wuret khi Naan a wukhime khi ngu shiit, ndhi ngulih khimuk khi wawul kat nih phi shin a si. 44 Zeen a sat ngun khi den nih a ngu tap phi bhilong fin mu duk-duk. 45 Dang bhi kat ngu shiit fe sat nbhizung nih, 'Ngulih fin shimkur nphe wawul,' yaghal ya bwap da'as khi shorop ndhi mu phi shiit fe, yaghal sih shin shu bih ndhi khi yukur nih, 46 ngulih khi ngu shiit wuni fe khi wawul nbhit ndhi khi man ma, shin par puus ndhi khi man ma, bhi khi naram nih khi ngaram yaghal den nih nder niyen ndhi mu nnot shinzeen. 47 Ngu shiit, ndhi man bih ndhi ngulih fin phi dem fe, deh niyang dak peh ma bhi niyang shin bih ndhi nih phe dem fe ma, bhi khi shu bwap. 48 Dang bhi gwo ndhi man ma deh shin bih ndhi mak nass, bhi mu khi bwap nih a leh det. Dang bhi meh gwo ndhi mu shin bih nnih bwer, bhi mu phi dem bwer nder mu, yaghal gwo ndhi mu shin bwer nnih, bhi shin mu khi tang bwer nder muk. 49 A wul a nphe bwot wus khi dighinyil, yaghal a sha ndhi ye kot nih phi shan gwe si. 50 Dang bhi an khi baptisma ndhi nphe shin an, ndhi nih phi shuwal n'an kat lat ma! 51 Gun phi leng ndhi a wul a nphe tongshaghap khi dighinyil si ah? Hai, a sat ngun, a wul a khi bakshak bul. 52 Nphe ndhi yaghal khidetsi bhi gurum mu paat dighinlih khime mu khi koshak-kun mu khi niyang wu vhil mu, yaghal wu vhil mu khi niyang wu kun mu. 53 Mu khi koo shak, nda khi niyang lah, yaghal lah khi niyang nda; nighin khi niyang larep dhi, yaghal larep khi niyang nighin dih; nakhii khi niyang mat lah dih, yaghal mat lah mat khi niyang nakhii dih." 54 Jesu nih phi sat ɗu gurum duk na, "Kat gu naa libhin phi yaghal khi sar kansighin, la-la bhi gu sina, 'Fwan nih nphe wul,' bhi khi kot a si. 55 Kat kohom del khi sar bhider, bhi gu sat gu lhi, 'Yak peh khi baan bis-bis,' bhi khi kot a si. 56 Niyen taanaan mu, gu man naa jep bih khi dighinyil mu khi khitingnaan, bhi shin a nang deh gu man naa ndhi nyil ndhi khidetsi ma eh? 57 A meh lhi deh gu tok diyel nphe bih ndhi a wuret shi kasuk ma ye? 58 Nphe ndhi kat gu mwan khi sharfom fuk ntikhim ngu diyel, bhi kat gun khi yar bhi gu daar gu dak dighil shak deshe gu roh nder gu diyel fe dih, yak ngu diyel fe khi shin gun nsar ngu shiit diyel, yaghal ngu shiit diyel fe yak khi kon gun nbut nlihkwoo/turu. 59 A sat ngun, gu pwat dih ma kat gu kwat shaghal fe duk-duk ma."