1 Dih bhi ndhi Jesu phi dangphiNaan meh peh shi, bhi nmeh nbut shaar shiit khimuk sat nnih na, "Nda, ghi kam shi ndhi mu dangphiNaan dih khibih ndhi Jon (Yahaya) kam shaar shiit fhi nin mu si." 2 Jesu sat nmu, "Kat gun npeh dang phi Naan bhi gu lhi, 'Nda, mangye sim ghi kat yon. mangye wuyon fhik sam. 3 Ghi shin sih nmu puus wushini nmu. 4 Ghi kon khi shikbis fun, khipe ndhi mun phi kon khi nih niyen duk-duk ndhi mu shin shikbis nmun si dih. Ghi nok yit mun mu yakhipe ndhi khi gwam mun si." 5 Jesu sat nmu, "A weh khinaar gu ndhi kat nih khi shar, bhi khi mwan nder muk nnaar lhipar, bhi sat nnih, 'Shar nih, ghi baam an khi nghil burodi mu kun, 6 nphe ndhi meh shar wul khidetsi, bhi an khi membih nphe shin nnih sih ma.' 7 Pak bhi shar muk ndhi ndighin lih fe khi sat nna, 'Ghi nok dampeh nan si. Philih a wu oghot gwe, shin an khi jep nih mu, mu yak peh teer. An nphe yaghal a shin burodi nghi ma.' 8 A sat ngun, kat niyang yaghal nphe shin burodi nghi nphe ndhi ghi a shar muk, dang bhi nphe kaakul ndhi ghi wet ghi tit-tiit, bhi khi yaghal shin burodi bwer khipeh ndhi ghi phi dem fe si. 9 Shin a sat ngun, gu dang bih, bhi mu khi shin ngun; gu tang, bhi gu kat; gu kwak-peh, bhi mu khi epp ngun. 10 Nphe ndhi gwo ndhi dang bhi khi lap; shin gwo ndhi tang a wukhime khi kat; yaghal gwo ndhi kwak, mu khi epp nnih. 11 A weh khinaar gu nda mu, ndhi kat laa ghi tal sherep, bhi ghi shin nwoo nnih nkop sherep eh? 12 Kot kat tal ass-koo bhi ghi shin daghar nnih eh? 13 Nphe ndhi asi, kat gun ndhi a wubis gu man shin zughum wuret njep gu mu, bhi shin anang deh Nda gu ndhi khitingnaan khi shin zughum Riin Wubang ngurum ndhi mu dang ma dih ye?" 14 Dih bhi Jesu phi shen riin wubis ndhi tong shaghat/daghat. Ndhi riin wubis fe put, bhi gwo ndhi ye bhilip maa nih fe lap bhilip, bhi bih fe fii-poo niyen ndhi mu dih. 15 Dang bhi pak gurum mu na, "A khi bal khi Beelzebul, miskaham khi riin wubis mu, ndhi nih phi shen riin wubis fe mu." 16 Pak mu kam nih shin mu phi tang ye khi shin meh bih app-poo ndhi tong khitingnaan. 17 Dang bhi Jesu man leng khimu yaghal sat nmu na, "Duk-duk yil ndhi bak shak nkaa demka bhi khi deltighim ma, yaghal lih ndhi bak kaa-sat khi put'taa. 18 Kat Sharfom bak-shini shi kaa-shin, bhi shin anang yil khimuk khi dar dih ye? Nphe ndhi gu lhi a taghat/pwat khi riin wubis khi bal Beelzebul. 19 Kat a shen riin wubis khi bal Beelzebul, bhi niyen mwan nder gu mu phi shen mu a khi sim weh? Nphe wuni, bhi a mu khi deh niyen diyel fuk. 20 Dang kat a taghat/pwat khi riin wubis mu a khi sar nmhi Naan, bhi yil wuret nmhi Naan wul ndergu. 21 Kat gurum wu bal ndhi leh liyak tap phi lih nin, bhi meh gwo nphe mang leh khimuk nwat ma, 22 dang bhi kat meh gwo wu kwa bal met nnih zak, bhi gwo ndhi bal mah fe khi dwan gwat khimuk, yaghal kok bhilong khimuk nwat. 23 Gwo ndhi nder nih ma bhi nih a wukhime khi an ma, yaghal gwo ndhi shak-lhi nder nih ma bhi nih a phi tit fe. 24 Kat riin wubis put nbut gurum, bhi nih phi del peh ndhi wen nnot am nphe tang peh-nok. Kat kat peh ma, khi sat nna, 'A bhin a waya ndighin lih fhin khi peh ndhi a tong dih a wul.' 25 Ndhi kat wawul, bhi khi kat mu kum lih fe ban-bang shin mu dak a wuret. 26 Bhi mwan khi kok riin wubis wu kwa mu pokovhil ndhi mu bal met nnih yaghal mu khi wakji mu twaghat dih. Bhi yaghal gok khi gwo fe khi yaghal bis-bis met nwushe." 27 Ndhi dih, ndhi sat bhilip si mu, bhi meh mat epp dighil dih nkaa ɗu gurum mu bhi sat na, "Wuret nbut mat ndhi laa ghi khi yughur ndhi kang ghi." 28 Bhi sat nna, "Kat asi bhi, wuret nphe niyen ndhi mu khiling bhilip khi Naan bhi mu tap khi nih." 29 Ndhi ɗu gurum mu phi yon, Jesu sat nna, "Gurum ndhi khidetsi a gurum wubis mu. Mu phi tang bih fii-poo, a si bhi mu khi naa meh bih fii-poo ma, kat ba a nkan mu Yunusa (Jonah) ma. 30 A khi peh ndhi Yunusa (Jonah) deh a bih fii-poo nniyen Nineba mu, a si duk Laa Gurum khi deh a langt'hing ngurum dnhi khidetsi mu. 31 Par puus diyel bhi Mat Long ndhi khi Sar Kansighin khi yaghal a wukhime khi gurum ndhi khidetsi mu yaghal gap bis nkaa mu, nphe ndhi tong khi lang yil sing-sing wul nphe khiling nbiman khi Sulemanu, bhi kat gwo ndhi maa Sulemanu npeh-si. 32 Par puus diyel bhi niyen Nineba mu khi yighil a wukhime khi gurum ndhi kidetsi mu yaghal mu khi gap bis nmu, nphe ndhi mu gyet mu thi'wap nphe bhilipnaan ndhi Yunusa kam, bhi gu naa, gwo ndhi met nYunusa nih nbhisi. 33 Meh gwo dih ma, ndhi kat bwot wus pitila, bhi sok nfung ma bhi sip khishak khi kaa fe, khi den a khidighir, nphe deh ngurum ndhi mu phi rho mu naa peh bang dih. 34 Yit ghi a pitila nmu ghit-shik. Kat yit ghi nkagham, bhi ghit-sak kot khi peh-bang. Dang bhi kat yit ghi nkagham ma, bhi ghit-sak khi kot a nkwoo. 35 Nphe ndhi asi, bhi gu tap niyak yak npeh-bang ndhi gun khi khi nkot a kwoo. 36 Kat ghit-suk gam khi peh-bang, khi meh peh wu kwoo dih ma, bhi si-suk duk-duk khi deh a khipe ndhi pitila phi san-peh nkaa gu si." 37 Ndhi lat lap bhilip, bhi meh Farisiyawa sat nnih na gear ji sih-sih a wukhime lih-nih, bhi Jesu mwan dih khi lhi en nin. 38 Bih feh fii-poo ngu Farisiyawa ndhi Jesu vwang shin deshe sih-sih kansighin dih ma 39 Nda sat nnih, "Gun Farisiyawa mu vwang dangkong wang khi bhintis ban bang, dang bhi dhighin fe khi demka khi bhi wubis mu. 40 Gun gurum nnot en mu! Gwo ndhi shin dangkong fe a nih shin dighin fe ma? 41 Gu shin bih ndhi ndhighin nniyen shor mu, bhi bih kot a wubang khiding ngun. 42 Dang bhi rap ngun Farisiyawa mu, nphe ndhi washara ndhi gun phi shin fe khimi leh mar fuk, bhi gu niyang zeen khi dem Naan. Ret ndhi mu shin bih dhi khi zeen khi dem Naan, nnot gu niyang shin gokshi bih mu duk. 43 Rap ngun Farisiyawa mu, nphe ndhi gu dem tong ntighim nlihnaan khi tal peh loghot nnaar nlihtuk. 44 Rap ngun, nphe ndhi gu deh a khipeh tughun ndhi mu lhi membi khi kaa fe ma deh gurum mu phi mwan khi kaa fe nnot nmwan fe si." 45 Meh niyen kam nmhi waar sat nnih na, "Ngu kam, bih ndhi ghi sat fe a filip mun duk." 46 Jesu na, "Rap ngun, niyen kam waar mu! Nphe ndhi gun phi den gurum mu nbut jel ndhi la-poo nphe mang, bhi gun muk phi sham pak jel fe nlani ma. 47 Rap ngun, nphe ndhi gu diyak tukun nniyen jagham mu, bhi gyet a bhikaam fuk mu tiyoh mu. 48 Nphe ndhi gun a langting shin gu dem shiit dhi bhikaam ngu mu shin, nphe ndhi a mu mu tiyoh mu yaghal a gun gu diyak tukun khimu. 49 Nphe wuni fe duk, bih-man khi Naan na, 'A lep khi niyen jagham mu khi niyen shiit Naan mu, yaghal mu shin jel/wula mu shin mu tiyoh pak mu.' 50 A si deh gun ndhi kidetsi, mu khi tal dighil gu nphe tighim nyen jagham mu duk-duk ndhi peh gyet gun phi tiyoh yaghal nshe khi yil, 51 yaghal ntighim Abel shin ji ntighim Zakariya, ndhi gyet mu t'hi khinaar peh-dangnaan khi peh wubang. Eh, a sat ngun, gun ndhi khidetsi mu khi yak a gun npeh nnih. 52 Rap ngun niyen kam waar nmhi Yahudawa mu, nphe ndhi gu mang bih kam man; gun khi ka-suk gu niyang rho, shin gu din niyen ndhi mu phi rho." 53 Nhdi Jesu yit peh fe dih, bhi niyen ran mu khi Farisiyawa mu baghal shak khini khi kaa bih mu bwer, 54 mu phi dar nphe yaa nih khi bhilip khi muk mu.