¹ "A an a thing wuret fe, yaghal Ndah nhi Naan a nhi ah gu tap fe. ² Nhi phi mang duk me sonsokol dhi nbut nhi dhi khi la - la mah, mu khi kwap sar fe muh deh nhi la - la dih. ³ Ghi kot a gurum wupwo gwe npe bhilip naan dhi a sat ngun gwe. ⁴ Yit dhi de ngun gu kot a man yaghal an a muk. Khipe deh sar thing khi la-la mah shikasat sih, tiit deh nhi kot shi-ding fe. ⁵ An a thing wuret, gun a song sar fe. Gwo ndhi kot nnan bhi an wukhime khini, nhi shin la mu bwer, pe ndhi kat ban dhi an bhi gun npe mak shin mebi ma. ⁶ Kat megwo nhi nder nhi mah, bhi mu khi kon khipe song/saar dhi fii bhi mu khi kurmu bhi mu shan mu khi wus. ⁷ Kat ghi deh nder nhi yaghal kat bhilip tong nder nih, bhi dhi tal nder nhi bih mu khi shin ngun. ⁸ Ndah nhi kat yon npe ndhisih, dhi gu la la yaghal nhin dhi gun a jep kam shiit khi Jesu. ⁹ Khipe ndhi Ndah fe phi dem an sih, an phi dem gun duk. gu tong khi dem fhin. ¹⁰ Kat gu den waar fhin bhizung gu, bhi gun npe deltikhim khi kat dem fhin, khipe ndhi a dem waar khi Ndah yaghal nhi ndem an. ¹¹ A lap bhilip sih mu khi gun npe deh retyit kot nkha gu dhi de ret yit fuk gam dih. ¹² Mhi sih a waar, ndhi na gu dem shak khipe ndhi an phi dem gun sih. ¹³ Bah megwo ndhi dhi dem gun met dessih, ndhi khi shin seen nhi npe shar muk mu. ¹⁴ Gun a shar nhi muh kat gu shin bii ndhi a sat ngun. ¹⁵ Ba tong bwer mah ndhi a yong gun a kwaram mu, npe ndhi kwaram man bi ndhi ngu lhih ni phi shin ma. A yong gun a shar nhi mu, npe duk bi ndhi a khiling nder Ndah, bhi an phi sat fe ngun. ¹⁶ Bah a gun gu yong an ma, bhi a an a yong gun yaghal a den gun deh ngun gu mwan gu bee jep mu ndhi yaghal jep fuk mu npe de a wuret. Nhi npe kot asih npe ndhi kat gu tal mebi khi sim Ndah, bhi nhi npe shin fe ngun. ¹⁷ Bhisih mu khiding, a sat ngun, deh ngun gu dem shak di. ¹⁸ Kat yil fe niyang gun, bhi gu man ndhi gyet niyang an dang de she gun dih. ¹⁹ Kat yeh gun a mhi yil sih, bhi yil fe npe dem gun khipe dhi gun a mu muk sih. Npe dhi gun a mhi yil sih ma, bhi yaghal ndhi a yong gun nder nhi, bhi yil fe niyang gun. ²⁰ Gu khidersuk khi bhilip ndhi a sat ngun, 'La phitong/kwaram ba ni met ngu lhi ma." Kat gyet mu niyang an bhi mu npe niyang gun duk, kat yeh mu lap bhilip fhin, bhi mu npe lap muk duk. ²¹ Mu npe shin bi sih mu khiding ngun npe sim fhin, pe de ba mu man gwo ndhi lep an ma. ²² Kat yeh a wul de a lap bhilip khi mu ma, bhi ye mu khi shin shikbis ma, pe de asih bhi mu khi dar nnan npe shin shikbis sih. ²³ Gwo ndhi niyang an bhi niyang Ndah nhi duk. ²⁴ Kat yeh a shin shiit ndhi me gurum shin ma nnaar mu, bhi ye khi kot mu khi shikbis ma, bhi khidetsih mu na, bhi yaghal mu niyang an khi nhi Ndah Naan. ²⁵ Mhisih a wuret npe gam bhilip naan ndhi mu khi ten ran den nwar khi mu, 'mu niyang an ba khi me leng wuret ma.' ²⁶ Kat ngu baam - ndhi an npe lep nhi ji ngun nder Ndah, ndhi ni a Riin mhi zeen, ndhi puut nder Ndah - wul, bhi nhi npe shin langting khi kha nhi. ²⁷ Gun phi shin langting npe dih gun a wukhime khi an tun nshe she.