¹ Tap yak gu yit nbhizung gu yakal ma, gu shin zen Nda Naan, gu shin zen nnan. ² Nlhi Nda nhi lo'ot (rooms) mudhi bwer, kat ye asima ye asat gun, mpe ndhi an mpe mwan dak pe gun. ³ Kat ah mwan ah dak pe ngun, bhinshin an pe wasam de nnan ah lap gun nder nhi dhi, deh pe ndhi an dhi gun kot adhi. ⁴ Gu man yarkam ndhi an ya dhi. ⁵ Toma sat nJesu, "Nda mu man pe ndhi ghi nya dhi ma, shinnang deh mu man yarkam fe dhi ye? ⁶ Jesu sat nhi, "Ana yarkam, ah zen, ah seen ba megwo ndhi khi ji nder Nda Naan kat ba awukhime khi an ma. ⁷ Kat ye gu man an ye gu man Nda nhi duk. Yahal shini shin kam ntikim gu man nhi shin gu nah nhi." ⁸ Filip sat nJesu, "Nda ghi nhin Nda Naan fe nmun, bhi khi mak mun." ⁹ Jesu sat nni, "An a wukhime khi gun npe yii mu bwer bhi har gu man an maa, Filip? Gwo dhi naa an bhi naa Nda fe. Shinang deh gu sihna "Ghi nin Nda fe nmun diye"? ¹⁰ Gu shin zen ndhi an ndhikin Nda, Nda mhi ndhikin nhi? Bhilip ndhi an phi sat ngun, aah sat mu khi bal fin ma, ampe Nda ndhi khitong ndhikin bhizung nhi phi shin shiit fini. ¹¹ Gu shin zen ndhi an nbut Nda, Nda nhi nbut nhi mah bhi gu shin zen mpe shiit fe mu shikasut. ¹² Zen zen ah sat ngun gwo ndhi shin zen nnan khi shin shiit fe mu ndhi ah shin, khi shin shiit ndhi met man ndhi a shin, mpe ndhi an pe mwan nder Nda. ¹³ Duk bi ndhi gu dang khi sim nhi, bhi a shin deh Nda kat yon nbut lah dhi. ¹⁴ Duk mbi ndhi gu tang nder nhi khi sim ndhi ah man bhi ah shin ngun. ¹⁵ Kat gu dem an bhi gu tap war fin. ¹⁶ Bhi ah dang phi Nda, deh nhi shin ngu bam nkwa ngun ndhi, de nhi kot awukhime khi gun tai tai dhi. ¹⁷ Riin mhi zen, yil fe khi nah nhi ma, mpe ndhi kudi phi nah nhi ko man nhi ma. ¹⁸ Ah yit gun mbhisuk; An waji nder gu. ¹⁹ Mpe wuni, dele bhi yil fe kudi khi na an ma. ²⁰ Par puus wumi fe bhi gu man dhi an ndikin Nda nhi, yakal gun nbut nhi, an nbut gu duk. ²¹ Gwo ndhi nhi khi war fin deh tap mu ah wuret bhi anhi ah gwo dhi dem an, kat gwo ndhi dem an bhi Nda nhi khi dem nhi, bhin ah nhin kahsan nhi." ²² Yahuza (Ba ah ndhi Iskariyoti ma) sat Jesu na "Nda shinnang deh ghi mhin kasak mun ba ah nyil fe maye?" ²³ Jesu piring/lap nhi nah "Kat gwo ndhi dem jin bhi tap bhilip fini, Nda nhi khi dem nhi, khi ji nder muk bhi mu tang awukhime khi nhi. ²⁴ Gwo ndhi phi dem an ma, bhi khi tap bhilip fin ma. ²⁵ Ah sat misi mu ngun, ndhi anah wukhime khi gun. ²⁶ Mpe ndhi asi, ngu bam - nhi riin wubang ndhi Nda khi lep khini khi sim nhi, khi kam bi mu bwer ngun, yahal khi kakder gu khi bhi ndhi ah bhilip mu gun dukduk. ²⁷ Ah yit tong shahap ngun, ah shin tong shahap fin ngun. Ah shin nhi akhibi dhi yil phi shin fe ma. Tap bhi gu yit bhizung gu thikok ma tap bhi lukut khi nthi gun. ²⁸ Gu khiling munah asat ngun "An pe del! Bhi awaji nder gu.' Kat gu dem an, bhi bhizung gu khi piya mpe ndhi an mpe mwan nder Nda, mpe ndhi Nda yon met nnan. ²⁹ Khidet si a sat ngun deshe tah dhi, kakder ndhi kat ta bhi gu shin zen. ³⁰ Kudi ah lap bhilip khi gun bwer ma, mpe dhi ngumbi yil si nhi nwul, nhi khi bal khi kah nhi ma. ³¹ Mpe deh yil fe man ndhi ah dem Nda dhi, ah shin abhi ndhi Nda phi dem fe. Mu yikil mu wak mbisi.