¹ "A sat bhilip sih mu ngun yak ba gu pal mah. ² Mu npe shen gun shinput lhi Naan. Bhi puus fe nyar wul dhi gun duk gwo ndhi thi gun bhi nhi npe sihna ji shin a shiit nNaan. ³ Mu npe shin bhi dihsih npe ndhi mu man Naan mah, kot a an eh. ⁴ A sat bhilip sih mu ngun deh kat puus fe wul bhi gun npe khik dersuk dhi a sat ngun gwe. A sat ngun tun nshe she ma npe ndhi dih an a wukhime khi gun. ⁵ Khidetsih, an nyaa nder gwo dhi lep an bhi gu tal, 'Ghi npe yaa aneh yeh?' ⁶ Bhi npe ndhi a sat bi sih mu ngun, bhi bhizung gu thikok. ⁷ Npe dhi asih, a sat zeen fe ngun, ret deh nan a yit gun di. Pe ndhi kat a yit gun ma, bhi ngu baam ni npe wul nmun mah, yaghal kat a mwan bhi an npe lep ni ngun. ⁸ Kat ngu baam fe sam bhi ni npe nhin nyil fe ndhi gap dung shika shikbis, khi kha wuret yaghal gap diyel - ⁹ nkha shikbis, npe deh mu shin zeen nnan ma, ¹⁰ khi kha wuret, npe deh an a wayah nder Ndah, bhi gun npe naa an nkwa ma; ¹¹ yaghal nkha tok diyel, npe ndhi mu gap diyel nyen nan mhi yil sih mu. ¹² An khi bi mu bwer npe sat ngun, bhi gu man mu gwe khidet sih mah. ¹³ Bhi kat Riin mhi zeen wul, ni npe nhin yar ngun khi yarkam zeen, phi ndhi ni npe lap bhilip mhi kha shin mah. Bih ni npe sat bi ndhi ni khiling, yaghal ni npe sat bhit ndhi ni npe wul. ¹⁴ Ni npe saam an, npe ndhi ni npe mang bi ndhi a man yaghal sat ngun. ¹⁵ Khiding bi ndhi Ndah khi nhi bhi a maan. Pe dhi asih, a sat alih Riin nhi npe mang bi ndhi a man bhi sat ngun. ¹⁶ Dih lee bhi gun npe naa an mah, khidangkong la puus bhi gun npe naa an" ¹⁷ Bhi pak jep kam khi shiit khimuk mu tal phi shak, "Nhi phi sat ameh nmun eh, 'Khi de dih lee bhi gun npe naa an mah yaghal khi deh dhi lee bhi gun npe naa an,' npe ndhi an mwan nder Ndah?" ¹⁸ Pe ndhi asih, mu sat naa, "Nhi phi sat ameh assih eh, "Khi de dih lee? Mu man bi ndhi ni phi sat fe mah. ¹⁹ Jesu man ndhi mu npe tal shiphini, bhi yaghal sat nmu, "A bii ndhi gun phi tal nder suk, bii ndhi an phi sihnaa, 'khi deh dih lee bhi gun npe naa an mah, yaghal bhishin khi deh lee bhi gun npe naa an"? ²⁰ Zeen zeen, a sat ngun, gun npe wal ma kot gun shinleng ma, bhi ni npe langyit yil. Gun npe kot khi dokkor bhi yaghal wal/dokkor fuk ni npe villing waji retyit. ²¹ Kat meh mat ni npe laa-laa bhi ni khi dokkor npe ndhi puus khimuk wul, bhi kat laa sam gwe, bhi ni npe khik der sat khi shuwal fe ma npe ndhi villing wayah retyit 'npe ndhi laa fe wul khi yil. ²² Npe ndhi gun khi dokkor, khidetsih, bhi an npe naa gun nkwa, bhi yaghal a ni npe ret nyit gu, bhi ba mongwo mak deh ni mang retyit fe shin ba nder gu mah. ²³ Par puus wuni gun npe tal mebi nder nhi mah. A zeen fe, a sat gun, kat gu tal mebi khi sim Ndah Naan, bhi ni npe shin ngun. ²⁴ Har khidetsih bhi gu tal mebi khi sim nhi mah. Kat gu tal bhi gun npe kat fe deh retyit fuk gam dih. ²⁵ A ten a sat bii sih mu ngun eh ran khi npwo, npe ndhi puus fe ni nyar wawul ndhi an npe lap bhilip khi gun nran khi bhilip mah, nkop fe bhi an npe sat khinar puus nka Ndah Naan. ²⁶ Par puus fe gun npe tal nsim nhi yaghal bhi an npe sihnaa a dang phi naan npe gun mah, ²⁷ pe ndhi Ndah Naan shikashin ni phi dem gun pe ndhi gu dem an yaghal khi ndhi gu shin zeen ndhi a tong a wul nder Ndah Naan. ²⁸ A tong a sam nder Ndah Naan yaghal a sam nyil. Assih, an phi yit yil fe bhi an phi wa nder Ndah Naan." ²⁹ Jep kam khi shiit khimuk mu sat naa, "Khidetssih, gun phi satt bhilip awuret ba gun phi sat bii mu khi sim bhilip mah. ³⁰ Khidetssih mu man ndhi gu maan bi mu khiding, yaghal gun phi dem megwo shin tal ngun mah. Npe dhissih, mu shin zeen ndhi ghi tong nder Naan ghi sam." ³¹ Jesu lap nmu, "Gu shin zeen khidet sih ah? ³² Gu naa, puus fe ni wul, asih, yaghal wul gwe, ndhi mu npe leng gun shikhime ko aweh wayaa lhi fhini, yaghal gun npe an bhisan. Duk khi ndhi asih, an bhisan mah npe ndhi Ndah ni nder nhi. ³³ A ten a sat bhilip gwe ngun khi kha bi sih mu deh ngun gu kat bhizung wu zuhum di. Khi yil fe bhi bi wubis mu di, bhi gu mang mokkor: Asih, a mang kumpiya ka yil fe gwe."