¹ Jaghar mu khi fwom phi tong a neh pwat nnar gu eh? Mu phi tong a nbut dem bih-khiyil ndhi mu phi jaghar nghit-shik gu ma ah? ² Gun phi righit, bhi gu kat ma. Gun phi tihkha khi dwan bih gurum mu, shin gu mak kat fe ma. Gun phi liyak khi jaghar. Gun phi kat ma nphe ndhi gun phi dang ma. ³ Gun phi dang bhi gu kat ma nphe ndhi gun phi tal/dang khi no'ok wubis, nphe deh ngun gu shin shiit khi nih nphe bih-khiyil dih. ⁴ Gun niyen tihleet mu! Gu man ndhi yaa-shar khi dighinyil si a fwom khi Naan ma ah? Nphe ndhi a si meh gwo ndhi phi dem bor a shar dighinyil si bhi den shin a sharfom khi Naan. ⁵ Kot gun phi leng ndhi bhilipnaan sat a nba'an, "Riin ndhi lhi deh nih tong nbut mu si nih phi tihlik bwer ma ah"? ⁶ Dang bhi Naan nih phi nin wuret fhin nmun bwer, a si deh bhilipnaan sat nna, "Naan phi fwom khi ngu dem sihm, dang bhi nih phi shin wuret fhin nniyen nshi mu phi sam khikha sut." ⁷ Nphe ndhi a si bhi gu shin khasuk nNaan. Gu niyang sharfom, bhi khi sii nsar gu. ⁸ Gu ji kus khi Naan, bhi nih khi ji kus khi gun. Gu vwang sar gu, gun niyen shikbis mu, yaghal gu dak bhizung gu, gun niyen kot-kot nu. ⁹ Gu nin bhizung tihkok fuk yaghal gu err! Yit den nshwar fuk bor a wal yaghal retyit fuk bor a bhizung tihkok. ¹⁰ Gu sam khikha gu ntighim Nda Naan, bhi khi shin yon ngun. ¹¹ Emnighin nih mu, gu nok lap bhilip khikha shak si. Gwo ndhi lap bhilip khikha emnighin nih ma bhi tok diyel n'emnighin nih bhi lap bhilip a khikha waar shin tokdiyel nwaar fe. Kat gu tok diyel, bhi gun a niyen shin shiit khi waar ma, gun a niyen tok diylel. ¹² A gurum khime det a ngu shin waar yaghal ngu tok diyel. A nih mak bar se'en shin mak tihkok kh nih. Ghi a weh, ghi ndhi phi tok diyel ntihng-lih fhik eh? ¹³ Khidetsi gu khiling, gun ndhi gu sat gu lhi, "Shinih ma bhi dhidar bhi mu mwan mu yaa nnar-yil si, mu tong dih nphe yii khime, mu shin glong, yaghal mu kat lang-kha shaghal dih." ¹⁴ A weh man bih ndhi khi taa dhidar eh, shin a meh a se'en ghi eh? Nphe ndhi ghi a khipe sighir si ndhi khi put khidetsi det bhi deh le'eh bhi riyem. ¹⁵ Wak bhi, gu sat gu lhi, "Kat Nda Naan dem, bhi mu tong yaghal mu shin bhisi ma bhi ndhisi." ¹⁶ Dang bhi khidetsi bhi gun a phi shit zung gu nphe bih mu ndhi gun phi diye shin fe. Duk-duk shit zung si a bih wubis. ¹⁷ Nphe ndhi a si meh gwo ndhi man shin wuret dang bhi niyang shin fe, bhi shin a shikbis.