¹ Emnighin nih mu, a gurum mu bwer mu khi bor a niyen kam mu ma. Nphe ndhi mu man ndhi mu nphe tok-diyel wu bha'an nmun. ² Nphe ndhi mun phi shin bih ndhi laghar bwer. Kat meh gwo shin laghar nbhilip fhin ma, bhi nih a gwo ndhi yon a wuret, ndhi mak yaa khashin khiding. ³ Khipe ndhi kat mu bwaghat teng nphi bhizing deh nmu khiling nmun dih, bhi mu kiye ndhi mu lhi shishik mu khiding khiling nmun dih. ⁴ Gu diye shii am mu, ndhi mu a wu nan ndhi a kohom wuyon phi bet mu, dang bhi a la shakal wu leh phi lhi deh nnih mwan-mwan yaa meh peh ndhi gu tung fe viling nih dih. ⁵ Shin a si duk, lhiss a bih wuleh nshi-shik gurum, dang bhi nih phi pwat khi bhilip wu nan-nan. Shin gu leng khit ndhi la wus nlani mak shan lighit wuyon. ⁶ Lhiss nih a wus duk, yil mhi shikbis ndhi mu den nnar bhe'ep shi-shik mu. Nih phi tihkok khi ghit shi-shik khiding yaghal bwot wus khikha se'en. Nih shi khasat mu bwot a mhi wus tai-tai khikha muk. ⁷ Nkan long dem mu duk-duk, khi yer, nwooh, khi bih ndhi mu nbut am mu a bih ndhi gurum mak tap mu den. ⁸ Dang bhi nphe lhiss, meh gurum mak tap nih den ma. Nih a bih wubis ndhi khi la-poo nphe yaa den, shin nih khi dau mhi tih-peh. ⁹ Mun phi sa'am Nda Naan a khi nih, shin mun phi fhilip gurum mu a khi nih, gurum mu ndhi Naan dak mu lapshak khi jin. ¹⁰ Lhi wuret khi lang-poo phi tong a nbut lhiss put. Emnighin nih mu, ret ndhi nkan bih si mu khi'n taa ma. ¹¹ Gu sham kat am wu-de'et khi am wu-rok/shang mu pwat but-buut a wukhime ah? Emnighin nih mu, gu kat tihng koon khi la pha'at mhi? ¹² Ma bhi mwos-bul, khi la kwoon mhi? A si zak gu kat a am ndhi khi khi'in khi put khi am wu-rok/shang ma. ¹³ A weh a ngu se'en khi ngu man nnar gu eh? Yit deh ngwo wuni fe nin se'en wuret nshiit fhin nbut sam khi kha mhi bih-man. ¹⁴ Dang bhi kat gun khi tihlik wubis khi tang yong nbhizung gu, bhi gu nok shitzung yaghal dung khikha zen si. ¹⁵ Ndhi si a nbih-man ndhi tong khitingnaan sam ma. Wak bul, bhi a mhi dighinyil si, ndhi wen nnot riin, shin a mhi mhikwarkum. ¹⁶ Nphe meh peh ndhi tihlik khi dem tang-yon dih, bhi jaghar khi shin bih wubis mu khi kot dih. ¹⁷ Dang bhi bih-man ndhi tong a khiting sam nih a wuret nshe, khi ji khi tongshaghap, a rangang ma, khi shin leng gokshi gurum mu, khi naa-je'el yaghal khi la-la wuret, ndhi khi shin bal, yal sat zen. ¹⁸ Mu khi kop tongshap a nbut shiit wuret khinar niyen ndhi mu phi dem tongshaghap.