¹ Emnighin nih mu, tap bhi gu deh a niyen shinzen Nda mu Jesu Kristi, Nda mhi ram, khi bakyit npak gurum mu ma. ² Khi peh a si kat meh gwo rhi nkha'at fuk lep zobe khi leh wuret mu, yaghal gwo wu piya rhi duk khi leh wu rap. ³ Kat gu naa gwo ndhi rwan leh wuret yaghal gu sat gu lhi, "Kambok ji ghi tong si khipe wuret," dang bhi gu sat ngwo wu piya, "Ghi dar pwon si," ma bhi, "Ghi tong shi-kwak nih," ⁴ bhi gun a phi bakyit khinar shak ma ah? gu bwor a niyen tikdiyel khi no'ok wubis ma ah? ⁵ Gu khiling, emnighin nih mu, a Naan shwat/taghat niyen wu piya ndhi mu khi dighinyil si nphe bor niyen wu long nbut shinzen yaghal a mu khi bor niyen kok-kop mhi tingnaan ndhi nih ten den nniyen ndhi mu phi dem nih ma ah? ⁶ Dang bhi gun phi shin je'el wu piya mu! A niyen bihlong mu phi shin je'el ngun ma ah? A mu phi dhil gun shin yaa nlih-diyel ma ah? ⁷ Mu phi fhilip gun khikha sihm wuret ndhi gun nbut fe ma ah? ⁸ Dang bhi, kat gu gam bhilip mhi waar, nbut bhilipnaan, "Ghi dem tihng-lih fhik khipe kha-sak si," bhi gu shin ret. ⁹ Dang bhi kat gu nin bakyit npak gurum mu, bhi gun phi shin a shikbis, yaghal diyel khi waar khi yak gun nphe ndhi gun a niyen paar waar. ¹⁰ Nphe ndhi meh gwo ndhi yaa waar khiding, deh kat pal a nmeh khime det, bhi diyel yaa nih nphe tep waar fe khiding. ¹¹ Nphe ndhi gwo ndhi si na, "Tap bhi ghi shin tihle-et si," shin nna, "Tap bhi ghi thi-kha." Kat gu shin tihle-et ma, dang bhi ghi shin tihkha, bhi den a ngu a ngu del khi kha/tep waar. ¹² Nphe ndhi a si bhi gu lap bhilip yaghal gu shin bih khibih niyen ndhi mu nphe tok-diyel nmu khi waar mhi bar-peh. ¹³ Nphe ndhi tok-diyel khi ji nnot naa-je'el nniyen ndhi mu khi naa-je'el ma. Naa-je'el makha diyel. ¹⁴ Emnighin nih mu, a meh a phishi fe eh, kat gurum nna jin khi shinzen, dang bhi nih nnot shiit eh? Shinzen wuni fe khi bar nih ah? ¹⁵ Khipe ndhi a si, kat meh emnighin wu mis ma bhi wu mat wen nnot nleh shin wen nnot nsih sih par puus wuni fe. Kat meh gwo nnar gu sat nmu, "Ghi mwan shaghap, ghi wup sak shin ghi gam." ¹⁶ Kat gu niyang shin bih ndhi ret nphe shishik ma, bhi a meh a phishi fe eh? ¹⁷ A si duk shinzen shi kha-sat, kat khi bih shi-shin ma, bhi a muut/shiit wu ban. ¹⁸ Khi ndhi a si bhi meh gurum khi sat nna, "Ghi khi shinzen, yaghal an khi shiit shi-shin." Ghi nin shinzen fhik ndhi wen nnot shiit shin, bhi an a shinzen fhin khi shiit shin fhin. ¹⁹ Ghi shinzen ndhi Naan nih dih khime; ghi dar bwer. Dang bhi mhikwarkum mu shinzen duk, yaghal mu phi dam. ²⁰ Ghi phi dem man ah, ngu enn-yin, ndhi shinzen nnot shiit shin bhi a bih wu ba'an/nnot phishi? ²¹ Gyet nda mu Ibrahim nin khashin nphe shiit shin ndhi mang la nin Ishaku nphe shin zughum khi nih ma ah? ²² Gu naa ndhi shinzen khimuk mwan a wukhime khi shiit khimuk, yaghal a nphe shiit khimuk ndhi shinzen yon khiding. ²³ Bhilipnaan gam bih si ndhi sat nna, "Ibrahim shinzen nNaan, yaghal mu kun wuni nnih a nyit shiit wubang," yaghal yong nih a shar Naan. ²⁴ Gu naa ndhi a shiit-shin khi put khi gurum, a nbut shinzen det ma. ²⁵ A nyar wuni fe duk, gyet Rahab ndhi a napaghar a shiit-shin put khi nih, ndhi lap jep-lep mu yaghal lap mu pwat khimu nmeh yar wu dhik ma? ²⁶ A khipe ndhi ghit shi-shik ndhi kat wen nnot riin si bhi a kum, a si duk, shinzen nnot shiit-shin bhi a kum.