¹ Gu ji khidetsi, gun ndhi khi bihlong, gu err shin ba gu fwa orr/ruru nphe je'el ndhi nphe taa khikha gu. ² Bihlong fuk mu wam, yaghal leh fuk mu lah-njelleng. ³ Pang mhiwong fuk mu lah-njelleng. Njelleng ndhi mu lap khi bor a langting nkha gu. Nih nphe sih nan shi-suk a khipe wus si. Gu kok bihlong fuk gu sok nphe teer wu-at mu. ⁴ Gu naa, shaghal khi niyen shiit mu phi wal-shaghal ndhi gu niyang kwat niyen ndhi mu diip sih ngun, yaghal err khi niyen diip fe mu rhi nkom Nda Naan ngu yon ma dau. ⁵ Gu tong a pehtong khiling khi shang ndhighinyil si shin gu den kha gu shiit wu ba'an. Gun nan gu miyar nphe tong naa bhit gos si. ⁶ Gu gap diyel shin gu tih ngu shin wuret. Nih khi niyang gun ma. ⁷ Nphe ndhi a si emnighin nih mu bhi gu tong khi moghor, shin kam nbhit ndhi Nda nwul. Gu naa, ngu mar khi den enn nih khikha diip wuret ndhi khi put nmar. Nih phi tong khi moghor nphe nih, nih phi tap phi fwan wu she khi wu lat. ⁸ Gun duk, gu mang moghor. Gu den bhizung gu bal-bal, nphe ndhi wul khi Nda Naan kus. ⁹ Emnighin nih mu, gu nok gwakshik, khikha shak si, sar yak mu khi tok diyel ngun. Gu naa, ngu tok diyel khi dar phi-lih. ¹⁰ Gu naa meh bih kam, emnighin nih mu, nder shu je'el khi moghor mhi niyen jagham mu, niyen ndhi mu lap bhilip nsihm khi Nda Naan. ¹¹ Gu naa, mu mang niyen ndhi gyet mu moghor a niyen ndhi Nanlhiwuret nmu. Gu khiling moghor khi Ayuba, shin gu man no'ok khi Nda Naan, ndhi nih a nin dem fin yaghal nih a ngu naa-je'el. ¹² Wu ma-mah fe khiding, emnighin nih mu, gu nok tuwarsuk si, khi khitingnaan ma bhi dighinyil, kot ma bhi meh tuwarshik nkwa wu dhik. Wak bhi, yit "E'eh" fuk kot a "E'eh" yaghal "Hai" fuk a "Hai," nsar yak gu ntaa sar tok diyel. ¹³ Meh gurum nnar gu phi shu je'el ah? Yit nnih dangphinaan. Meh gurum phi retyit ah? Ret nnih mang tam saamnaan. ¹⁴ Meh gwo nnar gu a wu gok ah? Yit nnih yong daskaham mhi lihnaan mu, deh nmu dangphinaan nphe muk dih. Yit nmu pwas moor nkha muk nbut sihm khi Nda Naan. ¹⁵ Dangphinaan mhi shinzen khi lat khi shuwal ngu gok, yaghal Nda Naan khi yaghal khi nih khiting. Kat shin shikbis, Naan khi kon khi nih nnih. ¹⁶ Nphe ndhi a si bhi gu tihwap nphe tahkat/shikbis fuk nshak, yaghal gu dangphinaan nphe shak, nphe deh ngun gu kat kaham dih. Dangphinaan mhi ngu shin shiit Naan wubang mu nih khi bal a leh ma nshiit khimuk. ¹⁷ Iliya gyet nih a gurum khipe mun si duk. Gyet dangphinaan khi bhizung khime sar yak fwan khi nwul, bhi fwan niyang wul khi yil fe nphe yii kun khi tar pehmeh. ¹⁸ Bhi Iliya shin dangphinaan nkwa. Bhi fwan wul, yaghal yil fe la-lah. ¹⁹ Emnighin nih mu, kat meh gwo khinar gu tahlemkhi yar zen, bhi meh gurum waji khi nih khi yar, ²⁰ bhi gwo fe leng a wuret ndhi meh gwo ndhi viling ngu shikbis ntahlem khimuk shin waji khi yar wuret bhi bar a se'en muk nsar muut, bhi shin khi oghot/vwang shikbis mu bwer.