1 Gyet a Melkisedek si, long yil Salem, ngu shiitnaan wuyon mhi Naan Wu-Mah-Dau, ndhi kha'at khi Ibrahim tong wah nliyak ndhi ntiyo long meh yil mu bhi lhi wuret khikha muk. 2 A nnih ndhi Ibrahim shin kha-bih nyit khime nbut sar mhi bih khiding ndhi nih khinih. Phishi sihm muk "Melkisedek" a "long mhi shiit wubang." Nkwa sihm muk "long salem," ndhi phishi fe a, "long peh-tong shaghap." 3 Nih nnot nda, nnot nighin, nih khi peh-put ma, nih khi bhit she-lah ma shin nih khi bhit lang-khi se'en ma duk. dang bhi, lapshak khi La Naan si, nphe ndhi nih khi kot a ngu shiitnaan tai-tai. 4 Gu naa nkan ndhi gwo si gyet a baga gurum ma ah. Nda mu Ibrahim gyet shin kha-bih khime nbut sarmu bih mu duk-duk ndhi khat khipeh liyak ndhi wah koghorong. 5 Shin a si, jep ndhi mu a mhi Lawi ndhi mu bhiring niyen shiitnaan/firis mu lap waar nphe tong mu lap kha nder gurum mu, ndhi, nder emnighin du mu, ndhi mu duk, mu a nkan shik Ibrahim. 6 Dang bhi nmeh kwang nkwa, Melkisedek, ndhi se'en muk tong a mhi mu ma, lap kha bih mu nder Ibrahim, yaghal lhi wuret khi kha muk, nih ndhi kot khi bih wu-dhi-den mu. 7 Khi vhit ma ndhi gwo ndhi khi bih met a nih khi lhi wuret nkha gwo ndhi wen nnot bwer. 8 Nphe bhisi, niyen ndhi mu khi duwam mu lat kha-bih, dang bhi nphe ndhisi bhi mu shin langithng ndhi nih khi se'en. 9 Yaghal, nphe bih ndhi a nphe sat si, bhi Lawi, ndhi lap kha-bih si, bhi nih phi shin kha-bih duk n'Ibrahim, 10 nphe ndhi gyet Lawi nih nshi-shik nda nih shi ndhi Melkisidek mu ka'at khi Ibrahim. 11 Khidetsi kat ye shin bih wah-rih a dem a kat khi sar niyen shitnaan mhi Lwai (nphe ndhi a nbut fe ndhi gurum mu lap waar fe), bhi shin mu khi wal kop meh ngu shiitnaan nphe yaghal khi kop Melkisidek, yaghal shin mu khi mang nih den khi kop Aaron zak ah? 12 Nphe ndhi kat mu viling niyen nkaan shiitnaan fe, bhi a tiit deh nmu viling waar fe dih duk. 13 Nphe ndhi gwo ndhi mu phi sat bih si nkha muk put min a nbut se'en wu dyik, ndhi meh gwo sham dar khi kha pang-wap ma. 14 Khidetsi a wu mhi-man, ndhi mu mu lah Nda mu a nJuda, meh nkaan gurum mu ndhi Musa sham yong mu khinar niyen shiitnaan mu ma. 15 Bih ndhi mu sat si khi ruk ma kat meh ngu shiit Naan nkwa yaghal khi bih Melkididek si. 16 Gyet bor ngu shiit Naan fe a nphe waar mhi gurum kaatip ma, dang bhi a nphe bal mhi se'en ndhi khi tihkok ma. 17 Nphe ndhi bhilipnaan shin langtihng nkha muk: "Ghi a ngu shiit Naan/firis wai wait khi kop mhi nkaan Melkisidek." 18 Nphe ndhi waar mu wu sighir si mu bwak khinih nsar ndhi nnot nbal shin khi phishi ma. 19 Nphe ndhi waar fe dak meh bih warrih ma. Dang bhi, shin bih den ndhi mu kat tughurkagham nphe tighim ndhi mu kat ji nder Naan. 20 Ndhisi gyet taa nnot tuwarshik ma. Nmeh kwang, pak gurum mu biring nyen shiitnaan nnot meh tuwarshik. 21 Dang bhi nmeh kwang wukwa, bhi gwo ndhisi, Jesu, bor a ngu shiitnaan khi tuwarshik ndhi shin nphe gwo ndhi sat nnih nna, "Nda Naan tuwarshin shin nih nphe viling bhizung nih ma: 'Ghi a ngu shiitnaan/firis tai-tai.'" 22 A si bhi Jesu shin lap-eh nphe ter dangkong mhi tuwarshik ndhi rests met. 23 Nbut meh kwang, bhi gurum mu bwer mu biring niyen shiitnaan nphe ndhi muut dhin mu nnot ndeltighim. 24 Nmeh kwang wudik, nphe ndhi Jesu deh a wu khaham, bhi nih khi deh a ngu shiitnaan/firis wu tai-tai. 25 Nphe ndhi a si bhi nih khi bal mak ndhi khi bar niyen ndhi mu phi tang Naan khi sar muk, nphe ndhi nih dih khi se'en mhi tai-tai nphe liyak/dar nphe mu. 26 Nphe ndhi nkan ngu shiitnaan wuyon wuni fe lap/ret nmun. Nih nnot shikbis, khi vhit ma, wu bang, mu bwak khi nih nnar niyen shikbis, yaghal mu mang nih a wuyon met nkhitingnaan. 27 Nih wal deh nnih wet ma, khibih gokshi niyen shiitnaan wu nan mu si, nphe shin zughum wapnan shi bhit-shi bhit ma, nphe shikbis nmin nshe dang si, yaghal nphe shikbis mhi gurum mu. Nih shin bhisi a npoo-khime det, ndhi shin khashin. 28 Nphe ndhi waar taghat niyen ndhi mu khi kuk ma a niyen shiitnaan wu nan mu. Dang bhi sihmshik mhi tuwarshik, ndhi wul a khi dangkong waar, shang a meh La, ndhi mu dak warrih ndarri tai-tai.