1 Nphe ndhi a si, bhi mu tap en mu yakba nmeh-gu khi npal nphe rhi khipe ndhi den ndagkong npeh-gu nphe rho nbut peh-nohk mhi Naan. 2 Nphe ndhi dok mu sat bhilipnaan wuret fe nmun khibih ndhi mu sat nmu si duk. Dang bhi bhilip fe kat rhi nkom niyen ndhi mu niyang khat kha nphe shinzen khi niyen ndhi mu shinzen ma. 3 Nphe ndhi mun ndhi mu shinzen a mun nphe kat nohk fe, khibih ndhi sat, "Khibih ndhi a tuwarsan nbut tughurnung fhin si, mu nphe sham rho nbut peh-nohk fhin ma." Shin a si duk, shiit bih mu ndhi dak gyet lat gwe nshe mhi kuk dighinyil. 4 Nphe ndhi sat bhilip nmeh-peh nkha bhit wu pokovhil, "Naan lap-nohk par bhit/teer wu pokovhil khi dangkong shiit mu ndhi shin." 5 Bhi shin sat, "Mu nphe sham rho nbut peh-nohk fhin ma." 6 Nphe ndhi a si, khibih ndhi peh dih nphe deh gokshi yarkaam kudi nphe deh npak gurum mu kat rho khipe nohk khimuk dih, bhi yaghal ndhi Israilawa mu bwer ndhi mu khiling bhilipnaan wuret fe gyet mu kat rho ma nphe shii-khiling kom, 7 bhi Naan shin den bhit nkwa ndhi nna a, "Shinih." Khidangkong bhit/teer mu bwer, bhi lap bhilip khi Davit, khibih ndhi she mu sat gwe nna, "Shinih kat gu khiling dighil muk, bhi gu nok dwas/bal bhizung gu si." 8 Nphe ndhi kat Joshuwa gyet shin peh-nohk nmu, bhi Naan shinba khi lap bhilip khikha bhit wu kwa ma. 9 Nphe ndhi a si bhi mu phi wal Bhit-Nohk wu pokovhil ndhi mu den nphe niyen Naan mu. 10 Nphe ndhi gwo ndhi kat rhi khi pehtong nohk mhi Naan bhi nih shi khashin nohk duk khi shiit fhin, khipe ndhi Naan nohk nmin si. 11 Nphe ndhi a si bhi mu dar deh nmun mu rho khipeh lap-nohk si dih, yak nmeh gwo khi ntah nbut shii-khiling ndhi gyet mu shin. 12 Nphe ndhi bhilip Naan nih khi se'en shin a bih wu bal yaghal akkas met nshuk ngwam ndhi khi pho vhil. Khi biyang peh ba mwan khi mak kho nar tuhup se'en khi riin, shin khi mak beh nar es khi ndor-es. Mak man leng ndhi nbhizung gurum khi nohk muk. 13 Meh bih ndhi mu dak a wu-sisok nNaan ma. Shin bhi, bih mu duk-duk khi sal shin a wu ep nyit gwo ndhi a tiit deh nmun mu shin phishi pehtong fun dih. 14 Nphe ndhi a si, khipe ndhi mun khi ngu shiit Naan wuyon ndhi del nbut khitingnaan gwe, Jesu La Naan, bhi yit deh nmun mu yaa shinzen fun bal-bal. 15 Nphe ndhi mun khi meh ngu shiit Naan wuyon ndhi khi niyang naa-je'el mu nphe tahkat fun ma. Wak bhi, mun khi meh gwo ndhi nbut bih mu duk-duk bhi mu kam nih, dang bhi wen a nnot shikbis det. 16 Yit deh nmun mwan khi tughurkaham mu ji khi peh tong long mhi wuretkhinaan, nphe deh mun mu kat naa-jeel yaghal mu kat wuretkhinaan ndhi khi baam mun par bhit ndhi mun phi tang baam dih.