Ep fe 10

1 Gun a bii ndhi but waar khi Mozis wu gyet warrih mbii wuyon ndhi khi yar wul mah, wuni a bii zeen ndhi Jesu Kristi shin nmun mah shin zuhum wu gyet mu pih lih mmu shin nyii nyii mbut waar wu sihir feh mak vwang nyen ndhi gyet mu tihk pak mbut feh mah. 2 Kat ye gyet nyen feh mu roh mu kat saan khi shi shik du yeh khi mak mu nsar ndhi nyen wap-peh mu kat wurret warrih gwe peh kon khi shikbis khimu. 3 Bii feh shin a-sih mah, shin zuhum feh kat mu shin yii khi yii bhi nih pih lih mmu dye khi shikbis fut nka-nka. 4 Tihim tim khi mhi lilu mu mak vwang shikbis mah. 5 Assih deh Kristi ndhi ni wul dign yil sih bih sat nah, "Gyet gih pih dem a luu mpeh wap peh khi shin zuhum hihi bii mu mah. Yagal gih shin shopshik an peh deh tong a lohot khi gih dih. 6 Shin zuhum mhi shaan bii sih pih ret yit ghi mah, yagal khi kwo shin zuhum feh mu peh kon khi shikbis. 7 Yagal a sat, "An sih a wul peh shin bii ndhi ghi Naan pih dem wai, a khi bih ndhi mu ran khi kah nih but bii ran (takarda)." 8 Kristi sat, "Ghi pih dem shin zuhum khi luu yagal khi bii mu mah khi ndhi mu khi sha'an luu feh khikah pang wap maduk khi gohot shi nkwa peh kon khi shikbis mu ret yit gih mah", peh ndhi a kaan ndhi mu pih shin feh khi yarkaam wu sihir. 9 Yagal gumbi shin sat nah, "An sih a jih peh shin bii ndhi gih pih dem." 10 A khi yarkaam sih deh mu pun mun dih, ndhi mu shin shopshik Jesu Kristi peh kon khi shikbis fun par bit khime det tis. 11 Duk me Pris ndhi khi dar khi peh wap deh wet pih dang shibit - shibit deh tong wet a-sih, a ban det peh ndhi dang feh peh vwang shikbismmu maduk. 12 Yagal nih gumbi ndhi shin kah shin khi zuhum pe kon khi shikbis a khime tak nkan zuhum wu tai tai, yagal tong khi sar wurret khi Nda Naan. 13 Khi wet tong dhi dang par mu lih shar fohom khi muk mu deh bii dagos khi kwak-nih. 14 Peh ndhi zuhum wu khime ndhi gumbi shin sih bhi vwang shikbis khi nyen ndhi nih pih lih mmu kat riin wu piya. 15 Riin mih long nih pih shin langting fun assih, peh ndhi ba sat, 16 "Khi dangkong jep teer sih mu, Nda - ka - mu sat na, "An peh dik phi shi dyel fhin khinar buzung muh shin a ran mu khi kha peh ran shi buzung muh". 17 Yagal shin sat nkwa, "An peh kuddi leng khi shikbis khimu khi bii buzung tikkok khimu zak mah". 18 Kat mu kat bii kon khi nih gweh bhi me bii shin kot dih peh kon khi shikbis zak mah. 19 Peh ndhi assih emnign nih mu, khi bii ndhi mu kat tuhur kaham peh roh khi peh wu-saan khi yar mih tihim Jesu. 20 Yar ndhi a wu poh, wu saan ndhi nih ep mun shi libin sih, ndhi a shishik muk. 21 Peh ndhi mun gwe khi Pris wuyon ngu nah kah gurum Naan mu, 22 bhi mu ji kus, khi buzung khime, khi shin zeen shamshin, khi buzung mu a wubang khi meh wubis ndhi khi lang dhi mah, shi shik mu a wu vwang khi am wurret dye kot kot. 23 Mu yah shin zeen fun a wurret yak khi ndaar, npeh bih ndhi gu den sih a khi go wu ban mah, 24 mun zak tong mu tap ka sun mu shin bii mih dem-shak khi simshik wurret. 25 Yagal mu nok yit kaat kah fun, khi mih pak gurum mu sih, tong mu karshak, mu dil kom shak, a khi des sih wai ndhi bit wawul khi gumbi wulkus gwe. 26 Shaar nih mu wutis, kat mu shin shikbis mu nyang-nyang khi dang kong ndhi mu man zeen ndhi mu nin mun, bhi bii kwat kot dih zak peh kon khi shikbis wunnih mah koh. 27 Me bii khi kot dhi peh kat ntikhim mah, a tok dyel wu baan nih Naan det yagal khi lih nwus ndhi khi shaan shaar fohom fin mu det. 28 Gyet gwo ndhi kih del khi-kah waar khi Mozis bhi mu khi tih nih kat mu kat langting mu vil kashi kun det. 29 Kat asih bih gu dyeh gu kat baan dyel sih khi kot a nang khi kah nyen ndhi mu dahas Lah Naan khi kwak shin mu mang tihim waar khi Naan ndhi kon khi shikbis khi mu? Mu filip Riin mhi shin ret (grasiya). 30 Peh ndhi mu man goh ndhi nah, "An peh ya wahap, An peh kwat nyen ndhi ret deh mu kat dih". Shin a nih Ndah Naan peh tok dyel khi kah gurum fin muh. 31 A baga bii shin luhut kat gurum tah kkah waar mhi Naan ndhi but seen sih. 32 Gu leeng khi bit wugyet mu sih khi dangkong ndhi mu lih wurret mbuzung gu deh gu mohor khi jeel shin gu wet gu ne'eh, 33 Tong mu kwap dung shi pih-guh. Tong mu pyahar ngun khinar kaam, pak bit bhi gun pih den kah guh a khibi nyen ndhi mu pih shin kor khi mu sih. 34 Peh ndhi gun pih nah je-el nyen ndhi mu pih dyan mu shin mu kok bii ndhi gun khini bhi gu lap eh khi buzung piya peh ndhi gu man ndhi gun khi bilong wuyon ndhi wakot khi peh wuyon khiting. 35 Peh ndhi assih gu nok kon tuhur dwan fuk sih, peh ndhi gun peh kat zuhum wunni khi tang kah. 36 Peh ndhi ret deh gu kot khi mohor peh deh khi dangkong ndhi gu shin shiit mhi Naan bhi gu kat bii ndhi a wudden ngun. 37 "Khi deh dih leh, gwo ndhi peh sam sih khi sam, ni peeh wet deh mah. 38 Khides sih ngu shamshiin a shin-zeen khi bhilip nih: Go ndhi ba khi dangkong bhi go wunni khi ret yit nih mah. 39 Mun khinar nyen ndhi mu bwak khi dangkong mah, mun a khinar nyen shin zeen ndhi khi mwan khi mun peh pwan khi seen mu khiding.