1 Nankhilik Galatiyawa mu! Aweh shin bissih ngun assih eh? Nyit gu bhi gun phi naa yad-ndhi mu tih Jesu Kristi ndhi khi kaa shep. 2 Gu sat bi ndhi khime sih ndhi gu lap Riin khi Naan sih a npee shin bii ndhi waar sat ah, kot a npe khiling bhilipnaan ndhi mu kaam ngun bih gu shin zeen eh? 3 Shinnang dee gu yokkor assih diye? Gu she khi Riin khi Naan bhi gun phi dem lat fee a khi mhi kaa suk ah? 4 Duk bii ndhi gu shin sih baam gun ma a? Dhissih nin a mebi ngun. 5 Kot Ndah Naan shin Riin sih ngun khi shiit bii petaa nnar gu npe ndhi gu shin bi ndhi waar sat/nin kot a npee ndhi gu khiling bhilip naan wuret yaghal gu shin zeen diye? 6 Gu naa shiit ndhi Abraham shin ah, khipe ndhi bhilip naan sat naa, "Ni shin zeen Ndah Naan, yaghal npee shin zeen khimuk bhi Ndah Naan lap ni khisar vil vil a gwo ndhi ni khi bhizung piya." 7 Yit di ndee ngun gu khikder suk ndhi jep Abraham mu a gurum ndhi mu khi zeen. 8 Bhilipnaan sat assih ndhi Ndah Naan ni npe wawul khi nyen ndhi mu shin zeen ni ma khi yarkaam nder ni npee shin zeen khi mu. Npee ndhi assih bi bhilip naan ten sat wuret fee nAbraham: "Nyar khi Naan khi shin wuret ngurum mu khiding." 9 Ibrahim shin zeen bhi yaghal lih wuret nnii, bhi duk gwo ndhi shin zeen khipe ni sih bhi khi kat wuret khi Naan. 10 Khiding mu ndhi mu shin zeen nwaar det bhi mu npee shujel, npee di ndhi nran dih "gwo ndhi mwan khiyar ndhi waar sat ma bhi ni khiyar shujel ntikhim Nda Naan." 11 Khidet sih, nin ndhi ba megurum mak shin wuret ma nder Naan nyaar mhi waar, npe ndhi bhilip naan sat na, "a gwo ndhi shin bi wuret ntikhim Naan nyar shinzeen a ni npee kot khi seen." 12 Shin bhin waar ni khi mebi npee shin ngwo ndhi shin zeen ma, duk khi ndhi assih, bhilip naan sat na, "gwo ndhi shin khiding bi ndhi waar dem bhi ni npee kot khi seen." 13 Shin bin dee nmun mu kot njel di, bhi Kristi shujel fee nkop muu, nsaar waar ndhi ni pee ji khi ni, npee ndhi bhilip naan sat naa, "duk gwo ndhi mu bwakat ni nting bhi khi shujel nsaar nNaan. 14 Nda Jesu Kristi shin bhisih ndee wuret khi Naan ndhi ten sat nIbrahim dee ni shin nyen ndhi shin zeen ma nyar mhi Jesu Kristi, npee ndhi nyar mhi zeen bih mun npee kat Riin ndhi Ndah Naan sat. 15 Emnhikhin nhi mu, yit nnan a sat bhilip ngun mhi gurum, kat gurum mu vil mu daar khi kaa mebi, ba megwo mak ndhi khi tep kot khi lih mebi nkwa khi kaa fee ma. 16 Khidet sih, Ndah Naan gam alkawali fhini nIbrahim khi jep khimuk muu. Bhilipnaan ba nin ndhi "jep muk muu" kot bwer ma, npee dhi "jep" ndhi ni phi sat a gurum khime sih, ndhi sim fee a Kristi. 17 Bii ndhi an phi sat fee, bih Ndah Naan gyet sat bhilip khi Ibrahim bhi na ji deltikhim khi ni assih. Waar ndhi mu shin khipe yii derri feer khi yagurum khi saar (430) khidangkong, ba mak ndhi khi tep bi ndhi Ndah Naan gyet sat gwe ma. 18 Npee ndhi kat yee zukkum khi Naan ni a nyar waar bhi ba ni npee dee a alkawali ndhi shin Ibraham ndhi Naan shin zukkum fee. 19 Bhi a mee lih assih eh? Kot assih npee dee alkawali ndhi Naan shin Ibrahim gaam npuus ndhi Ibrahim kat jep mu ndhi Naan khi den, nyar ndhi jep lep khi Naan mu shin. 20 Khidet sih bih jep le mu dok-kol mpe ndhi muu met ngurum khime, shin bhin Naan a khime. 21 21 Npee ndhi assih bih waar niyang alkawali mhi Naan ah? Assiwai maa! Pe ndhi kat waar ndhi mu shin nni npe dee nni shin seen di, bhi wuret khi naan ni npe ji nyar ndhi a bii waar. 22 Bhi bhilipnaan den nlih-kwo bi mu khiding nsar shikbis. Naan shin mihsih dee alkawali ndhi npe pwat khi mhi nzeen ndhi mu khini Jesu Kristi dee mu shin nnyen ndhi mu shin zeen di. 23 Khidetsih, dang dee she shin zeen fhun wul di, bih tong mun a kwaram mhi waar, mu bwakat mun ha shinzeen ndhi kat mun. 24 Npee ndhi assih bhi waar kot a gu naa mun dang she Kristi wul di, dee mu kaam mun khi shinzeen ndhi mun khini. 25 Shin bhin khidetssih bhi shinzeen fun wul, baa mun a saar mee ngu naa mun ma. 26 Pe ndhi gun khiding a jep Ndah Naan mu nyar mhi shinzeen ndhi mun khini nsim mhi Jesu Kristi. 27 Yat-ndhi gun bwer ndhi mu shin baptisma ngun nsim mhi Kristi dak saan khi Kristi. 28 Baa me Yahudawa kot a Greek, ba a me kwaram kot a guyon ma, ba me mis kot a maat ma, npe ndhi gun a bi wukhime khiding nsim mhi Jesu Kristi. 29 Kat gun a jep Kristi bih gun a jep Ibrahim mu ndhi mu a jep-kop khipe ndhi Ndah Naan ten dak den sih.