1 Khidangkong yii sar shika feer bih a wayaa nJerusalem awukhime khi Barnabas yaghal a pan Titus nder nhih. 2 A mwan npee ndhi Ndah Naan niin nnan ndhi ye a mwan. Nbuut mee kat nabiya khi nyen phitikhim mu bih a sat mu yarkaam bhilipnaan ndhi an phi kaam fee nnyen ndhi mu khi man bhilip naan fee ma. Ba a dem de shiit ndhi a shin khi ndhi npee shin kot a wuban det ma. 3 Shaar shiit fhin Titus, duk khi ndhi ni a Girik/Bahelene, ba a mu lih tiit nni npee dee mu puun ni di ma, 4 duk khi ndhi pak mu phi dem yee khikot assih. Mu phi naa a khipe ndhi duun a nyen shin zeen naan sih, mu rhoh nnar mu khipe nyen naa pe nwat mu, dee mu na wuret dhi mun khini nsim mhi Jesu Kristi. Mu phi dem meer khimun a kwaram mu sih. 5 Shin bin npee yit zeen bih bhilip a wuret npee gu, bih mu shin pong nmuu ma ko npee minti khime sih. 6 Bih shin bhin daas ndhi mu phi naa kaa sut khipe nyen phitikhimmu sih - a sat ndhissih npee ndhi baa niin kon shak nnan ma khipe gyet mu dii, Ndah Naan ba a ni phi naa a bi nyit ma, npee ndhi nyen fee mu ba a mu shin me kaar nnan ma. 7 Mee pee wudik, mu naa ndhi Ndah Naan shin shiit nnan npee sat bhilipnaan nnyen ndhi mu man ni ma, khipe ndhi shin nBitrus sih npee kaam nnyen Yahudawa mu. 8 Npee ndhi a bal khi Naan ndhi shin shiit sih nnan npe sat bhilip wuret nnyen ndhi mu man ni mah, khipe yad-ndhi shin shiit nPeter npe shin kaam Yahudawa mu. 9 Nyen phitikhimmu khipe James, Bitrus yaghal Yohana, mu khi man ndhi Ndah Naan shin shiit sih nnan, pee dih assih bhi mu kaat saar khi an yaghal Barnabas, npee ndhi mu khiding a shaar shiit fhum. Mu lap eh ndhi an khi Barnabas mu shin shiit nnar nyen ndhi mu man Naan ma bhi yaghal mu khi naar Yahudawa mu. 10 Khiding bii ndhi mu tal bih ndhi mu khikdersun khimu ndhi mu khi mebii ma nnar mu, npee bi ndhi a tong bwer an phi diye npee shin fee. 11 Shin bin Bitrus mwan yaa nAntioch bih a nyang ni nnar Ka'am, npee ndhi ni del khi kaa. 12 Dang dee she pak gurum mu ndhi James lep muu ji mu rhoh dih bih Bitrus ni phi sih-sih khi nyen ndhi mu lap bhilip naan gwe. Khidangkong ndhi gurum fee mu ji bih Bitrus teer ba khidangkong bih ba deltikhim khi sih-sih fee ma, npee ndhi lukkut tih ni npe ndhi mu phi dem shin puun nmuu. 13 Asih, gohokshi Yahudawa mu ndhi mu shin zeen ndhi lukkut phi tih mu wukhime khi Bitrus har khi Barnabas duk mu yikhil khi mu. 14 Ndhi a man ndhi mu phi mwan a wuret ma khipe ndhi bhilipnaan sat sih, bih yaghal a sat Bitrus ntikhim mu khiding, "gun a jep Yahudawa mu, bhi gun phi tong khipe ndhi gun a nyen man Naan ma sih, ba a khipe Yahudawa ma sih. Gun npee shinang de gu lih tiit nmu dhi mu man Naan ma, mu tong khipe Yahudawa mu sih diye? 15 A zeen, mun a Yahudawa mu npee ndhi mu bee mun ndhi ba a nyen shikbis mhi al'ummai mu ma khipe ndhi mu phi yong mu sih, 16 Bih mu man ndhi gurum ndhi mu den ni khi yar khi Naan nyar shin zeen ndhi nsim Jesu Kristi, ba a npe shin bi ndhi waar phi dem fee ma. Mun maa mu shin zeen Jesu Kristi dee mu den mun nyar mhi Ndah Naan npee zeen fhun nbuut Kristi, ba a npe shin bi ndhi waar ni phi dem ma. Me gurum mak shin wuret nNaan npe ndhi ni shin bi ndhi waar phi dem ma. 17 Kat khipe ndih mu den mun khiyar sih nder Naan npe ndhi mun nbuut Kristi, mu man mun a nyen shikbis khipe nyen ndhi mu man Naan ma (Gentiles) sih - nin ndhi Kristi ni phi nin a jel mhi shikbis ah? Yee khikot assih ma! 18 Kat a yaghal npe dokkom dhik yarkaam waar ndhi a niyang gwe, bih a naa kaa san khipe gwo ndhi tep waar sih. 19 Khipe yad-ndhi waar dii, bih an a wu muut gwe - npe waar shikasat - de an a tong npe Naan, pe ndhi an a muut khi Kristi khi kaa shep. 20 Npee ndhi ba a an a seen ma, bhi a Jesu ni khi seen nbuut ni. Seen ndhi an nbuut fee khidetsih, an a nbuut wuret khi sim mhi La Naan, ndhi ni phi dem an yaghal shin seen ni npee nhi. 21 A niyang npee lap wuret khi Naan ma. Shin bin, kat mu den megurum khiyar mhi Naan khipe waar, bhi nin ndhi Kristi muut npee mebii ma / a baan det.