¹ Nphe ndhi a si gu deh a niyen ɗịng Naan mu, khipe jep shamshin ndhi mu dem mu bwer si. ² Yaghal gu mwan nbut demshak, khibi ndhi Kristi dem mun duk si yaghal shin kha-shin nphe-mu, a bih-zughum wu shang nNaan. ³ Dang bhi tap yak mu khi khiling sihm-bhilip ngah ma bhi meh pehtong rap kot a dem-kha, nphe ndhi bih si mu ret nniyen Naan wubang mu ma. ⁴ Tap gu shin meh bih wu rap, bhilip wu ban, khi sihm-bhilip wubis mhi lhi-shwar- ndhi mu duk-duk khi phi-shi ma. Wak bhi gu shin plang nNaan. ⁵ Nphe ndhi gu man khi meh kot-kot ma, ndhi ngah, ngu rap, ma bhi ngu demkha-ngu dhikyil nnaton-nih khi kok-kop ma khit yil mhi Kristi khi Nda Naan. ⁶ Tap meh gwo khi nbang gun khi bhilip ndhi nnot nphishi ma, nphe ndhi a nphe nkan bih mhisi mu bhi Naan nphe nin bhizung tihkok fhini njep niyan khiling kom mu. ⁷ Nphe ndhi a si, tap gu khat kha khi mu si. ⁸ Nphe ndhi gyet gun a kwoo, danng bhi khidetsi gun a peh-wubang nbut Nda. Gu mwan a khipe jep peh-wubang mu si, ⁹ (nphe ndhi lah-tihng mhi peh-bang nih khi bih wuret mu khiding, shiit wubang, khi zen) ¹⁰ yaghal gu kam bih mu ndhi khi piya bhizung Nda. ¹¹ Tap gu nkhat kha shiit kwoo wu ban, kat a si bhi wak gu woo/ap bhider mu. ¹² nphe ndhi a bih kha-kul deh meh gwo sat jep bih ndhi mu phi shin fe nnabiya. ¹³ Dang bhi kat zah-wus bang peh, bhi khi deh a bih naa. ¹⁴ Nphe ndhi meh bih ndhi mu khi naa bhi boor a peh-wubang. Nphe ndhi a si bhi nna, "Gu miya nsaam, gun ndhi a niyen saam mu yaghal gu yil nnar niyen ndhi mu duwam, bhi Kristi khi sa'an-peh khi kha gu." ¹⁵ Gu ak-peh khir khi pehtong fuk-ba a khipe nanyaghor mu si ma gu deh a niyen se'en mu. ¹⁶ Gu tap khi teer ndhi gun nbut fe nphe ndhi teer fe mu a wubis. ¹⁷ Nphe ndhi a si, tap gu nyoghor ma, ret bhi gu man leng ndhi nih a mhi Nda. ¹⁸ Yaghal gu nok yit nmwos tuwo gun si, nphe ndhi khi lhi deh ngun deh a niyen kahyal mu dih. Wak bhi, gu deh a niyen ndhi mu ghring khi Riin Wubang, ¹⁹ gun phi lap bhilip khi-shak nbut tang Zabura khi tam mu ndhi a mhi riin wubang, tam ndhighil tam ndhi khi righit Nda Naan khi bhizung gu khime, ²⁰ gu wet phi shin plang nphe bih mu khiding, nsihm khi Nda mu Jesu Kristi nphe Nda Naan, ²¹ mu deh a niyen dhikshak nyar ndhi mu shin yon nKristi. ²² Shirop mu, gu sam khi kha gu ntighim da'as gu mu, a khipe ndhi gun phi shin nNaan si. ²³ Nphe ndhi mis a kha khi mat khipe ndhi Kristi nih a kha shik niyen Naan mu si, shin Kristi shi kha-shin a nih a ngu bar nih si. ²⁴ Dang bhi khipe ndhi nih shik niyen Naan mu lap nda ntighim Kristi si, bhi shirop mu duk khi lap nda ntighim da'as du mu nbut bih mu khiding. ²⁵ Da'as mu, gu dem shirop gu mu, khipe ndhi Kristi dem shik niyen Naan mu yaghal shin khashin nphe muk si. ²⁶ Kristi shin kha-shin nphe shik niyen Naan mu deh nnih lhi nnih bor a wubang dih, khidangkong ndhi vang nih bang-bang khi am yaghal bhilipnaan, ²⁷ nphe deh nnih shin nih nkhashin khi raam, nnot rap ma bhi nihrom kot meh bih ndhi khi kot a si, khi deh dih a wubang shin nnot nbhilip nkha fe. ²⁸ A khi yar wuni fe bhi ret deh ndaas mu dem shirop du mu khipe shi-shik du si dih. Gwo ndhi dem mat nih dem kha-shin. ²⁹ Nphe ndhi meh gurum sham niyang shi-shik nih ma, wak bhi khi sih khi nih shin dak nih ret-ret, khipe ndhi Kristi phi sih shin nih phi dak shik niyen Naan mu ret-ret si dih, ³⁰ nphe ndhi mun a behp shi-shik muk si. ³¹ "A nphe wuni fe bhi gurum wu-mis khi yit nda nih khi nighin nih deh bam shi mat nih, yaghal wu vhil fe mu khi deh a nan khime." ³² Zen wu si-sok si a baga bih-dang bhi an phi lap bhilip a nkha Kristi khi shik niyen Naan fini. ³³ Duk-duk khi ndhi a si, a tiit deh khiding nnar gu bhi dem mat nih khipe kha-shin si, yaghal a tiit deh nmat fe loghot ntighim mis dhi dih.