¹ An, nphe ndhi a si, bhi nphe ndhi an a gurum wu bwahgat nphe Nda, a dwak gun nphe mwan khi enn gu wubang nbut mwan ndhi mu yong gun dih si. ² A dwak gun gu tong khi sam-khi kha khi loghot khi moghor, nphe shak nbut dem-shak. ³ Gu dar deh ngun gu den ka'at-kha mhi Riin nbut yakshak ndhi a mhi tongshaghap dih. ⁴ Nphe ndhi shi-shik a khime shin Riin a khime, khipe ndhi mu yong gun a nmeh den-bhizung khime mhi yong fuk si duk. ⁵ Yaghal Nda a khime, shinzen a khime, baptisma a khime, ⁶ shin Naan a khime khi Nda mhi khiding, ndhi nih khi kha bih mu khiding yaghal nih nnaar shin nbut bih mu duk-duk. ⁷ Shin wuretkhinaan shin ji nder mu khime-khime mak nkyet khi zuhum khi Kristi. ⁸ A khipe ndhi bhilipnaan sat si: "Kat kah khi khiting, bhi lapder kwaram mu shin yaa npeh sok, yaghal shin zughum ngurum fe mu." ⁹ A meh a phishi, "Nih kha khiting eh," kat ba sam duk a nkwan-npeh wu jurum khi dighinyil si ma eh? ¹⁰ Nih ndhi sam a nih duk shighir kha rhi dong-dong del khitingnaan mu khiding, ndhe nnih gam bih mu khiding dih. ¹¹ Kristi shin npak mu deh a jep lep, pak mu a niyen jagham, pak mu a niyen kop bhilipnaan shi-peh shi-peh, yaghal pak mu a niyen shiitnaan khi niyen kam-kam mu. ¹² Nih shin leh-shiit si mu a nphe shin bal niyen wubang mu nphe shiit nnot kwat, nphe dhik shi-shik mhi Kristi. ¹³ Nih deltighim khi dhik shi-shin deh nmun duk-duk mu ka'at-kha mhi shinzen khi man khi La khi Naan dih, yaghal deh nmun mu nan bhi mu kat kam-gam ndhi nih a mhi Kristi. ¹⁴ Kristi dhik mun shin-kha yak mu nok deh a jep ndhi mu khi viling/bet mu nnhighin-am shin kam ndangkong khi tighim si, shin mu mang-enn mu khi duk-duk meh kam yaghal khi gwam ndhi a mhi gurum nbut dung khi mu. ¹⁵ Wak a si, bhi gu lap bhilip khi zen nbut dem-shak, deh nmun mu deltighim nkwang mu khiding nbut shi-shik ndhi nih a phitighim/kha fe, nih, Kristi. ¹⁶ Kristi dhik shi-shik fe khiding, yaghal ka'at nih shin yaa nih shi-shak khi duk-duk pa'ar, bhi kat duk-duk tsong-soghol mu shin shiit a wukhime, bhi khi lhi shi-shik yon ndhi kiye dhik sat nbut demshak. ¹⁷ Nphe ndhi a si, a sat shin a tihk yit fe nphe Nda, ndhi a tiit deh yak gu tong khipe Niyen ndhi mu man Naan ma si, nbut yoghor mhi bhizung mu. ¹⁸ Man khi mu a nbut kwoo, mu bwak khi khasut shin-bah nder Naan nphe shiin-khi man ndhi nih nbut mu, nphe bhizung-bal khi mu. ¹⁹ Mu khi khakul ma shin mu shin khasut nshiit wu ba'an, yaghal mu khi wet a phi shiit shikbis mu dhik-dhik det. ²⁰ Dang bhi a bih ndhi gu kam nkha Kristi ma. ²¹ An phi leng gu khiling meh bih khikha muk, shin mu kam meh bih khikha muk ngun, ndhi a zen nbut khi Jesu. ²² Mu kam ngun ndhi gu nok bwak-ya enn gu wusighir wu gyet si, nphe bwak khi wu sighir gurum. A wu sighir gurum fe ndhi nih a wubis nphe gwam-peh mhi dem-shik. ²³ Mu kam ngun deh ngun gu pairing khasuk a wu pwo nbut khi riin ndhi nbhizung gu, ²⁴ yaghal gu rughun/lep gwo wu pwo ndhi mu dak nih nbut lapshak mhi Naan-nbut shin wuret khi bang. ²⁵ Nphe ndhi a si, gu bwak khi dung, yaghal gu sat zen nshak, nphe ndhi mun a shop-shik wu khime. ²⁶ Gu shin tughuernung dang bhi gu nok shin shikbis si. Gu nok yit npuus tah bhi gun nbut tughurnung si. ²⁷ Gu nok shin pong/peh nsharfom si. ²⁸ Gwo ndhi dok phi mwan wat bhi nok wat si. A tiit nnih shin shiit, shiit wuret khi sar nih, deh nnih kat meh bih ndhi khi kho khi niyen ndhi mu khi membih ma. ²⁹ Gu nok yit nbhilip wubis pwat nphi-gu ma. Gu shin shiit a khi bhilip wuret ndhi khi bam nphe dhik gurum det, ndhi khi bam mu, phe deh nbhilip fuk shin wuret nniyen ndhi mu khi khiling gun. ³⁰ Yaghal gu nok tihkok khi Riin Wubang mhi Naan si, nphe ndhi a nphe nbut muk ndhi mu bam/kiyer gun npeh puus bar/wulat. ³¹ Gu bwak khi bhizung tihkok khiding, khi tughurnung, jaghar, khi fhilip shak, khi bih wubis mu duk-duk. ³² Gu najel shak, khi bhizung wuret nder shak, kon khi nih nshak, khipe ndhi Naan kon khi bis fuk nKristi si.