¹ Nphe ndhi a si bhi an, Pol, a an a gwo ndhi mu bwaghat nlihkwoo mhi Kristi Jesu npeh-gu niyen ndhi gu man Naan ma. ² An khi leng ndhi gu khiling shiit kwaram mhi wuret mhi Naan ndhi dok mu shin n'an npeh-gu. ³ An phi ran bih si a nphe ndhi mu nin n'an nsukhun a wu man gwe. A nmhisi a nih a zen wu si-sok khidel bih ndhi dok a ran ngun leh. ⁴ Kat gu tang bih si, bhi gun nmak man nohk nih/nnaa-man nkha zen wu si-sok si khi kha Kristi. ⁵ Nbut gokshi nkan gurum mu bhi gyet mu nin zen si njep gurum mu ma. Dang bhi khidetsi bhi mu wooh nbut khi Riin njep lep Jesu mu khi niyen jagham/naa-peh khikha mu ndhi mu taghat mu nphe shiit si. ⁶ Zen wu si-sok si a nih a Niyen ndhi nnot nman Naan mu duk a niyen kok-kop mu, shin mu a niyen ndhi mu nshik Naan, yaghal mu khi koh bih ndhi mu nphe shin fe nbut Kristi Jesu khi yar bhilipnaan wuret si. ⁷ Nphe ndhi dok a bor a kwaram mhi bhilipnaan wuret fe si a nphe zuhum mhi wuret khi Naan ndhi shin n'an nbut bal shiit khimuk si. ⁸ Naan shin zuhum si n'an, dang bhi a an a wu-sighit/wu-leh nbut niyen wubang khi Naan mu duk-duk. Zuhum si nih a ndhi a kam/sat bhilipnaan wuret ndhi khi bhilong bwer mhi Kristi ndhi gurum khi wal tang fe ma si nniyen ndhi mu nnot man Naan. ⁹ Zuhum khi Naan n'an si a nphe deh n'an a ji khi peh-bang ngurum mu khiding nphe man bih ndhi a nohk Naan dih. Nohk si a bih wu si-sok peh-gyet dih nder Naan, ndhi dak bih mu khiding. ¹⁰ Nohk si deh a wu mhi-man nniyen man Naan mu nphe deh nniyen phitighim mu khi niyen yaa-yil mu nkhitingnaan mu khi man yit se'en wu bwer mu ndhi a mhi Naan dih. ¹¹ Mhisi taa a nphe deh bih mwan ndari nbut nohk mhi tai-tai ndhi shin nbut Kristi Jesu Nda mu si dih. ¹² Nphe ndhi nbut Kristi bhi mun khi fwaan shin mun khi yarkaam tughur-kaham nphe shinzen fun nbut muk. ¹³ Nphe ndhi asi bhi a sat ngun tap nbhizung gu tep/nyok si nphe wu-lah ndhi an phi shu npeh-gu si, nphe ndhi nih a raam fuk. ¹⁴ A nphe mhisi ndhi a kurum khi fhirim nih ntighim Nda, ¹⁵ ndhi pus-sihm nduk-duk niyen fungbong-lih ndhi mu khitingnaan khi dhighinyil. ¹⁶ A dangphinaan nphe deh nnih shin bih ngun, nbut bihlong mhi raam fhin dih, nphe yaa gun dar khi bal nbut Riin fhinin, ndhi nih nbut gu. ¹⁷ A dangphinaan deh nKristi tong nbhizung gu nbut shinzen dih, deh ngun gu kat kuk nbut dem khimuk dih. ¹⁸ Mang yeh gu kat bal nphe man, a wukhime khi niyen shinzen nNaan mu khiding, bih ndhia kahm fe, kuhn fe, fiyer fe, yaghal jong/jurum fe, ¹⁹ shin deh ngun gu man dem mhi Kristi dih, ndhi met nbal man, yaghal deh ngun gu gam khi bih mu khiding ndhi a mhi Naan dih. ²⁰ Khidetsi nder muk ndhi nih a wu mak shin bih mu met bih mu duk-duk ndhi mu tal kot mu diye, nbut bal khimuk ndhi phi shiit nbut mu, ²¹ nder muk a raam nbut niyen Naan yaghal nbut kristi Jesu shin ji nkhan mu duk-duk ndhi kot a tai-tai. Asiwai.