¹ Yaghal nphe-gun si, gyet gun a wu dwam nbut tahkat khi shikbis fuk. ² A nbut tahkat khi shikbis si mu ndhi gyet gun phi tong peh-tong niyen dighinyil mu. Gyet gun phi tong a khipe daskaham niyen bal ndhi mu khiting si, ndhi a riin ndhi nih phi shiit nbut jep shii-khiling mu si. ³ Gyet mun duk-duk mu tong a nnaar niyen si mu, phi shin en but-det mhi nohk mu mhi shikbis, yaghal mun phi shin bih ndhi ghit-shik mu khi nohk mu mang. Gyet mun a wu-den a jep tughurnung, khipe gokshi gurum mu si. ⁴ Dang bhi Naan a gu naa-jel nphe baga dem khimuk ndhi dem mun khi nih. ⁵ Ndhi gyet mun a wu-dwam nbut tahkat fun, bhi nih lhi nmun mu kat se'en a wukhime khi Kristi-a nphe wuretkhinaan deh mu kat bar dih. ⁶ Naan epp mun khiting a wukhime khi Kristi, yaghal Naan lhi nmun tong khishak khi khitingnaan ndighin Kristi Jesu, ⁷ nphe deh nbut teer ndhi mu nji ntighim bhi khi mak nin daskaham bhilong mhi wuret fhin wu bwer mu nmun ndhi khi nin a nbut naa-jel fhini shinji nder mu nbut Kristi Jesu. ⁸ A nphe wuretkhinaan deh mu kat bar dih phi shinzen, yaghal ndhi si tong a nder gu ji ma, a zuhum khi Naan. ⁹ Wuretkhinaan a nphe shiit shin ma yak meh gwo khi nbwap bhizung nih. ¹⁰ Nphe ndhi mun a niyen shiit khi Naan, nbut Jesu Kristi nphe shin shiit wuret ndhi Naan peh-gyet den gwe npeh-mu, deh nmun mwan nbut dih. ¹¹ Nphe ndhi a si bhi gu diye ndhi gyet gun a niyen Man Naan ma nbut shopshik. Mu yong gun a "niyen ndhi mu pun mu ma" nphe bih ndhi mu khi yong a "pun" nhi shop-shik ndhi mu shin/dak a khi sar gurum. ¹² A nphe wuni bhi gyet mu bak naar gu khi Kristi. Gyet gun a niyen Israila mu ma. Gyet gun a mhizep nphe twarshik ndhi mu den npeh-gu. Gyet gu wen nnot npak leng bih ndhi ntighim. Gyet gu wen nnot Naan ndhighin yil si. ¹³ Dang bhi khidetsi nbut Kristi Jesu bhi gun ndhi dok gu deh jong-jong khi Naan bhi mu ji khi gun kus-kus nphe tighim khi Kristi. ¹⁴ Nphe ndhi nih a tongshahap fun. A nih lhi bih ndhi vhil deh a khime. Nbut nan mhi shop-shik muk bhi tih jighir ndhi nih khinaar mu. ¹⁵ A si bhi, bhet waar ndhi a wu den gwe deh nnih dak gwo wu pwo ndighin shin, bhi nphe wuni bhi lhi tongshahap. ¹⁶ Kristi nih shighir lap gurum wu vhil fe mu deh nshi-shik wukhime khi Naan nphe shep kah-peh, ndhi tih jighir fe. ¹⁷ Jesu sam yaghal sat bhilip tongshaghap ngun ndhi gyet gu deh jong-jong shin khi tongshaghap nniyen ndhi mu kus-kus. ¹⁸ Nphe ndhi a nphe Jesu ndhi mun dwas/dau mu kat yar khime nbut Riin mhi Nda. ¹⁹ Nphe ndhi a si, bhi gun ndhi gu man Naan ma gu kudi a mhizep khi niyen yil wudhik mu ma. Deh nphe wuni bhi gun a niyen yil wukhime khi niyen Naan wubang mu khi niyen ndhi mu ndhighin lih khi Naan. ²⁰ Mu dhik gun khidel kur-lih nmhi jep lep khi Jesu mu khi mu khi niyen jagham/naa-peh khikha mu, yaghal Jesu shi khashin a pang-kuk lih fe. ²¹ A nbut muk ndhi dhighin lih fe khiding ka'at khishak yaghal yon deh a lihnaan mhi Nda. ²² A nbut muk duk ndhi mu dhik gun khishak a khipe pehtong mhi Naan nbut Riin si.