¹ Jep mu, gu khiling nda gu mu nbut khi Nda Naan, nphe ndhi a wuret. ² "Shin yon nda ghi khi nighin ghi" (a nih a waar ndhi nshe ndhi khi kwahal nsar), ³ "nphe deh ngun deltighim dih yaghal gu kat tong khi dighinyil bwer dih." ⁴ Nda mu, gu nok tihkok khi bhizung jep gu mu ndhi khi shin tughurnung nmu si. Wak bhi, gu biyal mu yaghal gu kar mu nbut khi yar mhi Nda Naan. ⁵ Kwaram mu, gu shin loghot nniyen phitighim fuk mu ndhighinyil si khi yon bwer khi dam shi-shik, nbut khi zen ndhi nbhizung gu. Gu shin loghot nmu khipe ndhi gu shin loghot nKristi si. ⁶ Gu shin loghot a nphe ndhi niyen phitighim fuk mu phi naa gun ma nphe ret nyit mu ma, gu loghot a khipe kwaram khi Kristi mu si, ndhi mu phi shin nohk Naan nbhizung du si. ⁷ Gu shin shiit khi bhizung gu khime, khipe ndhi gun phi shin shiit Nda Naan si ba a nphe gurum mu ma, ⁸ nphe ndhi mu man ndhi meh bih wuret ndhi gurum shin, bhi nih nphe lap/kat wuret fe nder Nda Naan, kot nih a kwaram ah kot a gwo ndhi a wu-bwot oh. ⁹ Niyen lhi mu, gu shin khi kwaram fuk mu a si duk. Gu nok wuk mu/lhi lughut nmu si. Gu man ndhi nih a ngu lih khi mu khi nmuk nih khitingnaan, yaghal nih khi dem-kha ma. ¹⁰ Nlat fe, gu dyaram bal-bal nbut Nda Naan yaghal nbut yon khi bal khi muk. ¹¹ Gu lep khiding leh liyak ndhi nih a mhi Naan, deh ngun gu mak dar makha nohk mhi sharfom dih. ¹² Nphe ndhi liyak fun a khi nan khi tighim ma. Dang bhi, a khi niyen phitighim mu yaghal riin wubis mu khi daskaham niyen wubis npeh wu kwoo, a khi riin wubis mu ndhi khitingnaan. ¹³ Nphe ndhi a si bhi rwan duk-duk leh liyak mhi Naan, nphe deh ngun gu mak dyaram nbut teer wubis si dih, yaghal khidangkong ndhi kat gu shin bih si mu khiding, bhi gu dyaram bal-bal. ¹⁴ Nphe ndhi a si, bhi gu dyaram bal-bal, khi dangkong ndhi gu bwaghat bwon khi teng zen yaghal gwat mhi dar khi yarkam khi Naan. ¹⁵ Yaghal nphe kohop kwak gu, gu rughun bih ndhi khi lhi gu bess kam bhilipnaan wuret mhi tongshaghap. ¹⁶ Nbut bih mu khiding gu mang gwat mhi shinzen, ndhi khi lhi deh ngun gu mak pit wus khi pas mhi sharfom dih. ¹⁷ Yaghal gu mang tuhunkha mhi bar se'en khi ngwan shuk mhi Riin, ndhi nih a bhilipnaan. ¹⁸ Khi duk-duk dangphinaan khi dang, gu wet ndangphinaan nbut Riin Wubang. Khi bhizung ndhi si, gu wet phi tap peh khi moghor, kat gun phi dangphinaan nphe niyen Naan wu bang mu khiding. ¹⁹ Yaghal gu dangphinaan nphe nih, deh an a kat lep ndhi mu khi shin n'an kat a ep phi nih. Gu dangphinaan deh an a sat zen ndhi a wu sisok nnot nlughut khi kha bhilipnaan wuret fe. ²⁰ A nphe bhilipnaan wuret fe ndhi an a lalep ndhi mu yaa den nbut ngwaghar, peh deh an a sat nnot lughut ma dih, khipe ret ndhi a bhilip si dih. ²¹ Tychicus, emnighin mu, khi kwaram mhi Nda Naan ngu shinzen, khi sat bih mu khiding ngun, deh ngun gu man kaham fhin dih. ²² A lep nih ngun a nphe phishi ndhi si wai, deh gun gu man kaham fun dih, yaghal deh nnih kar gun nphe bal bhizung gu dih. ²³ Tongshahap shin ji emnighin mu, khi dem shak khi shinzen tong nder Nda Naan khi Nda Jesu Kristi. ²⁴ Wuretkhinaan shin ji nkhiding niyen ndhi ndhi mu phi dem Nda mu Jesu Kristi khi dem ndhi khi sham muut ma.