1 Bhi firis wuyon nah, "bhisi mu aah zeen ah?" 2 Stephen nnah , Emnhikin nhi mukhi Nda nhi mu, gu ling kom gu khiling nnan, Nda Naan ndhi nhi a wuyon miin kah shini Nda mu Ibrahim khi yil Bagadaza dang deshe khi waya khi yil Haran dhi. 3 Nhi sat nhi nah 'ghi yakal ghi yit yil fhik dhi khi emnhikin ghi mui, ghi mwan khi yil ndhi a nhin nghi'. 4 "Yakal khi yil Kaldiyawa mu, mwan tong Karan ndhi bikam khimuk muut bhi Naan waji khini khi yil ndhi gun dhi si. 5 Shin mepeh nhi akhibi mumuk si ma, ko nlah nhi. Nda den khini, duk ndhi Ibrahim nhi khi lah ma, bhi na ji shin peh fe ngwar khi dangkong/nkaan khi gwar mu. 6 Nda Naan phi sat nhi asi, nah gurum khi gwar mu khi tong khi me yil leh dangsi, niyen yil fe mu khi den mu ah kwaram, mukhi shin butdet mmu. 7 Nda Naan nah, ji shin diyel ndhi mu phi dhik yil dhi khidangkong bhi mukhi dhik yil nnan dhi mbisi. 8 Bhi Nda Naan gam shwarshik ndhi shin Ibrahim nka pun, mpe wuni bhi Naan shin lah nnhi, lhi sim nnhi ah Ishaku, ndhi gam teer pokokun bhi pun nhi Ishaku nhi ah dah Yakubu, Yakubu bak bhikam/nhingkam fun mu wu sarpwo vhil si. 9 "Mpe nhi bhi thilik yakal mu wu sarpwovhil fe, mu seet khi Yusufu niyen Egypt mu, yakal Nda Naan awukhime khi nhi" 10 ehp nhi nbut jel/wula ndhi nhi shi pwo; Naan shin mbiman enmhipan gurum mu nhi nthikim Pharooh long mhi Egypt, mpe wuni bhi den nhi ah wuyon/Gofna nkah yil Egypt khi lhi nhi khiding. 11 Dhi lah bhi neen tah khi yil Egypt khi Canaan del mbut bhiga jel/wula, Nda mu, mu kat si ma. 12 Ndhi Yakubu khiling muna mukhi sih nEgypt, bhi lep ndah mu, mu mwan ndhi nshe 13 Ndhi mu mwan wu vhil fe bhi Yusufu nhin kashin nemnighin nhi mu, bhi nhi Pharaoh man gurum lhi Yusufu mu. 14 Yusufu lep emnighin nhi mu nah niyoh wak Nda nhi Yakubu deh nhi ji nEgypt dhi awukhime khi nkahan fini mu, gurum yak-gurum kun khi sar duk duk. 15 Yakubu del yah ngypt, bhi muut, nhi khi nda mu mu. 16 Mu kok kum mu shin yah nshechem, mu wum mu ntukun ndhi Ibrahim seet khi shakal nder jep Hamor mu nshechem. 17 "Ndhi bit ndhi mu dem ji rih, bit ndhi Nda Naan dem Ibrahim ji rih, gurum mu gul nEgypt. 18 Mu lep long nkwa mpe pan gurum Egypt mu, long wuni man membi nkah Yusufu ma. 19 Bang gurum fun mu, lhi tiit ndah mu mu lhi jep wudiyen mu mbut wula ndhi mukhi bar ma. 20 Dhi mbisi bhi mu lah Musa; nhi ah wuret nthikim Nda Naan dang deshe mu sih khi nhi mpe tar kun lhi ndah nhi dhi. 21 Ndhi mu den nhi khibang, bhi lahrep Pharoah mang nhi pan khibi lah fhit si. 22 Musa kat kam nbut mbiman ndhi ah mhi gurum Egypt mu, kat sim mpe bhilip khi shiit wunan khimuk mu. 23 "Ndhi yii yakgurum vhil phi lat bhi leng nah emnighin muk mu ji nnhi, nkaan Isarila mu". 24 Ndhi nah mu phi shin jel ngu Isarila, Musa teer dangkong muk yakal yahfom, gwakap ngu Egypt fe. 25 Nhi phi nah khibi ndhi jin phi bam dunsi bhi emnighin muk mu man wuni ma. 26 Dhi daar fe bhi nah gurum mu vhil mu phi liyak bhi dar bhen mu, khinah, 'dasooh, gun ah emnighin shak, gun phi liyak shak ah mpeme?' 27 "Bhi gwo ndhi anhi shin bis emnighin nhi boot nhi shin kam si bhi nah, aweh den ghi ah gu tok diyel nnar mu ye? 28 Kot ghi phi dem thi an khibi ngu Egypt ndhi dhighin ghi thi si ye? 29 Ndhi Musa khiling ndhisi bhi si si mwan mhizep khi yil Midian, bak jep vhil dhi mbhisi. 30 "Ndhi yii yakgurum vhil del bhi lah lep khi Naan ji nhi ndem mpang Sinai, mbut wus ndem. 31 Musa nah wus fe, bhi akp pwo nhi ndhi nhi phi mwan nah fe, bhi khiling dhikil Nda Naan phi sat nah. 32 An ah Naan mhi Nda ghi mu, Naan khi Ibrahim khi Ishaku khi Yakubu, Musa dam khi eep yit mpe nah pe ma. 33 Naan sat nhi nah, ghi shwat kokop nkwak ghi mpe dhi ghi dar dhi ah pe wubang. 34 Anah wula /jel ndhi gurum fin mu phi shu fe khi yil Egypt (Masar). Ah khiling wal khimu an mpe bam mu, khidetsi, ghi ji nnan ah lep ghi shin ya khi yil Egypt (Masar). 35 Musa ndhi mu niyang nhi muna aweh den gwar ah miskakam ma bhi ngu diyel ye? Anhi ah gurum ndhi Naan lep khini ah miskakam khi ngu pwat khi kaa gurum mu Naan lep khini nsar khi lah lep fini ndhi nhin kashin Musa ndem. 36 Musa pwat khimu khi yil Egypt (Masar) khidangkong ndhi shin jep bi phi shi mu khibi nhi nah mu ndhikin Egypt (Masar) nkong ndhi mukhi yong nhi ah Reed ndhikin dem mbut yii yakgurum vhil. 37 "Ah Musa wuni ndhi sat niyen Isarila mu nah Naan khi shin meh ngu jakam naar gu, ngu jakam khi bi ansi. 38 Ndhisi anhi ah gurum ndhi nhi dhi nkur khi riin Naan mu ndhi mu lap bhilip khi lahlep Naan ndem, npang Sinai ndhi giyet nhi ah wukhime khi Nda mu mu, gwo ndhi lap bhilip seen mpe shin mun si. 39 Bhi Nda fun mu niyang khiling nhi, mu bet nhi shinbah nder du, bhin bhizung mu wakya nEgypt (Masar). 40 Nteer wuni fe muh bhi mu sat Aaron, ghi dak naan mu mmun dhi mukhi kam yar mun mpe dhi mu man bi ndhi kat Musa ndhi anhi pwat khimun Egypt (Masar) ma" 41 Bhi mu dak lah-randong nteer wuni mu mu ji khi zukum nkum eh bhi mu khiling khi shang mpe shiit khi sar fut. 42 Bhi Nda Naan vhiling en mu deh mmu dhik yil nzar mu dhi khiting mu dhi. Khi bi dhi ah wu rhi ran ndhikin thikarda niyen jakam mu si. 'Kan gu shin zukum nan khi long mu ndhi gu tuwoh, mpe yil yakgurum vhil ndeem lhi Isarila mu mhi? 43 Gun phi mwan buu khi fungbong Molek khi zar mhi nan ndhi ah Rephan bi mu ndhi gu dak deh ngun gu dhik yil mu dhi. An mpe kok gun del khini del phi Babylon'. 44 Nda mu mu khi terbernacle mhi langting ndem, khi bhi ndhi Nda Naan sat phi lap bhilip Musa si, nah gwar shin nhi khibi ndhi nah nhi dhi si. 45 Dhi leh bhi Nda mu mu nthikim Joshua lap terbanacle wawul khini khi mu ndhi mu lap yil eh. Naan dwan yil fe nsar mu khi yit Nda mu mu. Terbanacle fe deh dhi khi yil eh ji rhi teer mhi Dauda. 46 Ndhi Naan phi dem nhi, bhi tal kotsi ji kat peh tong ngurum lhi Yakubu (Jacob) mu. 47 Bhi bah ah Solomon dhik lhi Nda Naan. 48 Mpe wuni fe Nda ndhi khiting nhi phi tong nlhi mu dhik khi sar ma, khi bhi ndhi ngu jaghak sat si, 49 'Khiting ah petong fhin, bhin yil ah pe lhi kwak fhin. Nda Naan tal nah, ghi mpe dhik ah kaan lhi ndhi nang nan ye. Kot ah dhineh ah peh nook fhin ye? 50 Ah an ah shin bhisi mu khiding khi sar nhi mingha? 51 Gun niyen niyang khiling mu ndhi gun nshol mbhizung (leng) khi kom, shi bit shi bit gun phi niyang riin wubang, gu shin khibi ndhi giyet nda gu mu shin si. 52 Ndaa gu mu shin ah khi ngu jagham ndhi ne mah ye? Mu tiyoh niyen jagham mu ndhi mu nhin ka sut dang deshe wul khi ngu bam dhi, bhi khidet si ah gun gu de ah niyen thikok khi thi kaa, nder muk. 53 Gun gurum ndhi gu lap waar ndhi jep lep khi mu wul khi nhi bhi gu niyang lap yah". 54 Khidet si ndhi niyen diyel mu khiling jep bhisi mu, bhi tukurnung yah mu bhi mu aat akhas du nder Stephen. 55 Nhi ndhi ah wugam khi riin wubang, nah peh khiting bhi nah wuret khi Naan, yakal nah Jesu khi dar nsar dasih khi Naan". 56 Stephen nah, ah nah khiting ehp khi lah gurum khi dar nkwang sar dah sih khi Naan". 57 Dhi mbisi bhi niyen diyel mu dwaghar kom du, yakal mu fwa oor bal bal, mu wak ya khi kah muk khiding. 58 Mu lhi tiit nhi put khi yil fe, mu fiya/shar nhi khi pang. Langting mu zan le fut ndhi khibang nkwak me dengmaar ndhi mukhi yong sim muk ah Saul. 59 Ndhi mu phi fiya Stephen bhi yong sim Naan, nah Nda ghi lap riin nhi. 60 Ndhi kurum nyil bhi bot oor khi bal, nah "Nda, ghi nok ya wubis khi mu si, ndhi sat lat bhi muut.