Ep fe 4

1 Ndhi Pita mukhi Jon mu phi lap bhilip khi gurum fe mu bhi Firistoci mu niyen phitikim philhinaan yakal Sadukiyawa mu thik khiduk mu mpe ndhi mu khiling khi tukurnung. 2 Bi fe shwal mmu mpe dhi Pita mukhi Jon mu phi kam kam ngurum mu munah Jesu muut bah yakal. 3 Mu yak mu, muh bal nlhikwo deh wamang bhit mpe dhi khansikin tah gwe. 4 Gurum mu bwer ndhi mu khiling bhilip fe, mu shin ze'en, yon khigurum ndhi mu shin ze'en mu wul dubu paat. 5 Dhi dhidar fe bhi daskaham khi mu, khi nyen nan khimu mu, yakal niyen ran/lap wap wu kaat khipe khime nJerusalem. 6 "Annas ndhi nhi ah firis wuyon nhi dhi khi Kefas khi Jon yakal Alexander khi nkaan khi firis wuyon fe mu. 7 Ndhi mu lhi Peter mukhi Jon khinar bhi mu tal nder mu muna "Gun phi shiit ah khi bal khi sim khi weh mpe shin bhisi mu ye?" 8 Bhi Pita ndhi riin wubang nhi awukhime khini, piring/lap mu nah, "gun daskakaam mu khi niyen nan mu" 9 Kat gun phi diyel khi mun shini mpe ndhi mu shin wuret ngu gok si bhi kan det, khi ndhi shin ahnang de kat kakam dhi ye? 10 Yit de ngun khi gokoshi gurum ndhi mu Israila mu man ndhi gwo ndhi khi dar ntikim gu si kat kakam khi bal ndhikin sim khi Jesu Khristi mhi Nazareth ndhi gu kah nhi, bhi Nda Naan yakal khi nih (sih kokorong nka muut). 11 Jesu Khristi ah pang ndhi gun niyen dhik lhi gu niyang bhi yakal anih bor a wubal fe si. 12 Me wuret nkwa dhi nder megwo ma, mabhi sim ndhi khiting khi yil ndhi khi shin se'en ndhe tai tai. 13 Ndhi muna tukur kakam khi Pita mukhi Jon deh mandhi khina mu awuban mu ndhi mukhi me man mah, fhi pwo mu ndhi Pita mukhi Jon mu sham tong khi Jesu. 14 Mpe ndhi mu nah gwo ndhi kat kakam fe khi dar ndeer mu, mukhi membi mpe sat nkah fe ma. 15 Khidangkong ndhi mu lhi niyen kop pwo naan, mu yit pe diyel fe dih bhi mu lap bhilip khi sut. 16 Muna, "Mu shin ame khi das si mu ye?" Mpe nvhir bi nhi nah ndhi mu shin si khipe ndhi mu niyang mah mpe ndhi gurum mu man khi yil Jerusalem khiding. 17 Deh mu daam yakba bhilip fe nkhi del thikim nnar gurum mu, mu wuk mu/ta'at sar mu yak mukhi bhin lap sim bhilip khi megwo nka sim ndhi si fe ma. 18 Dhi leh bhi mu yong mu ndhikin bhi mu sat mu muna "niyo nok lap bhilip ma khi kam kam khi sim Jesu si. 19 Pita mukhi Jon mu piring/lap mu muna "ah wuret der Naan, deh mun mu khiting gun met Naan ndhi gu tok diyel nhi diya? 20 Mun mu nok lap bhilip khi ka bi ndhi mu nah khi ndhi mu khiling ma" 21 Ndhi mu ta'at sar nkwa nPita mukhi Jon bhi mu bwot mu. Mu kat me pe ndhi mukhi shin wubis mu dhi ma mpe gurum mu khiding mu shin plang Naan mpe bi ndhi mu shin. 22 Ngu gok ndhi bal si nhi khi yii yak-gurum vhil khi lah. 23 Khidangkong ndhi mu bwot mu bhi Pita mukhi Jon mu mwan nder gurum fut mu, mu mang phi shi bi ndhi mu sat ndun mu . 24 Ndhi mu khiling bhi mu fwa oor, khi leng wukhime muna "Nda Naan, ah ghi ghi dak khiting khi yil, khi am khi bi ndhi nbut fe. 25 Ghi lap bhilip khi riin ndhi nhi ah wubang phi kwaram fhuk Ndaa David. Ame lhi de nkaan gurum Gentiles mu khiling khi tukurnung dhi ye, shin gurum fe mu phi leng bi wuban mu-eh? 26 Ghi lhi, 'Long ndhi khi yil fe mu kaat kah sut khipe khime, daskakam mu kaat ka sut khipe khime. Deh mu shin membi nkah Naan khi Kristi dhi. 27 Bilatu, khi Pentius Pilate a wukhime khi Gentiles khi Isarila mu kaat khiding deh mu tang wubis khi kwaram fik Jesu dhi ndhi ghi lep khinih. 28 Mu kaat mpe deh mu shin bi ndhi sar ghi khi leng fik phi dem shin nthikim dih. 29 Khidet si Nda, ghi laat sar niyen ndhi mu shin mun sih ghi shin bal khi tukur kakam mun de mun mu kop bhilip ndhi nhi amak dhi. 30 Ghi zeen sar ghi mhi lat shwal khika niyen gok mu, binshin ghi nhin bi fe pwo mu ndikin sim wubang khi Jesu. 31 Khidangkong ndhi mu dang Naan, bhi pe ndhi ye mu kaat kah dhi sikhin, bhi riin wubang sam khika mu, mu kop bhilip khinan noot nlukut. 32 Nuhir gurum ndhi mu shin zeen ssi mu, leng khimu ashak, yak mmemu dhi sat nah bi ndhi jin khi nhi a mhin det ma, mukhi bi mu khishak. 33 Khi bagah bal, niyen shiit kop bhilip Naan mu phi shin langting bi ndhi kat dun khi ndhi du nah khi yakal khi Nda Jesu bhi wuret khi naan awukhime khi mu. 34 Membi wen me gwo nnar mu mah, mpe ndhi niyen ndhi mukhi mar, khi long mu, mu serep/sarap khinhi mu wakji khi shakal fe nkham. 35 Mu lhi shakal fe ntikim niyen shiit mu, mu phi mak bal khi mu. 36 Yusufu ndhi mukhi yong nhi ah Barnabas (ndhi mu phi yong nhi a lah tukurdwan) nhi ngu Levite, gurum Cyprus. 37 Set khi mar fini waji khi shakal fe den ntikim niyen shiit mu.