1 Megwo shi ndhi sihm muk a Agaribas sat Bulus sih na, "A shinpe nghi ghi lap bhilip shikasak" Yakhal Bulus del sar ni bhi dokhom lap bhilip npe fwat kashin. 2 "A naa kaasan ndhi Naan dem an ndhi bhilip sih waji a thighim ghi, Long Agaribas, an yakhal a pe fwat kaasan shini de nan a put khi kha nhi nbut bhilip ndhi Yahudawa mu kwap mu lih nkaa nhi, 3 npe ndhi ghi Long Agaribas a wu mhi man khi duk al'adu khi bhilip kuut khi Yahudawa mu; pe ndhi asih bhi a dang shi phi ghi, ghi lang kom ghi khiling an khi mokhor. 4 "Duk duk khi Yahudawa mu man petong fhin di khipee ndhi a yakhal nlaa, petong ndhi she a khi nyen fhin mu yakkal anUrushalima. 5 Npe ter vel bhi mu khi man, inkat mu khisat zeen, a ndhi get an phi mwan a nder nyen ndhi mu phi dhik yil Naan ndhi baa a mhi shap ma yakhal a tong a khipe Bafarisiye sih. 6 Yakhal khi detsih bhi a dar sih nphi dyel npe ndhi an phi den nbuzung nhi abii ndhi Nda Naan khi shin "alkawali" nbhikam bhikam fun mu. 7 "Alkawali" ndhi "Kabilu" ndhi mu sarpovel sih mu den buzung du a ndhi du kat, sar ndhi mu phi dhik yil Naan bit khi lihpar. A peh den bhizung sih, Nda Long deh Yahudawa mu phi tang dyel khi an di! 8 A meh lih deh me gu khi shin ze-en ndhi Nda Naan khi mak pe lih ngwo ndhi muut shin khi bhilip ma dye? 9 Asih wai, an ma gyet a shin zeen a ndhi mak deh nan a shin bii mu bwer npe thikok khi sihm Nda Jesu Banazare di. Yakhal asih, 10 a bii ndhi gyet a shin khi yil Urushalima; khi bal ndhi ngu phithikhim lih Naan shin nan, bhi a yak nyen ndhi mu kus khi Naan a bal nlihkwo, yakhal shin a nyang terr dangkong mu ndhi khi mu gap dyel a ndhi mu khi tyo mu. 11 Di nlih Naan bhi a wet phi shin je-el mu yakhal a lih mu thikok khi sihm Naan; yakhal sar ndhi an phi mang tukhurnung wubis khimu, a bi mu har shin ya khi yil khibang. 12 Khi nkaan nyang yit mhi sih, bhi a wet ya khiyil Dimashku khi bal yakhal shinpe nhi gwo wuyon nhi lih Naan npe yak nyen Naan fe mu, 13 Det bhi khinar puus ndhi an khi yarkam Dimashku, Nda Long, bhi a naa myalak wus tong khithing Naan sam, ndhi saam met npus shikasat. Myalak wus feh neer an shikhirkat a wukhime khi nyen ndhi mu bii an/mwan nder nhi. 14 Khidangkong ndhi duk duk fun mu pwalap nyil, bhi a khiling me dhikhil shi ni phi lap bhilip khi an ndhikil Yahudawa, ni phi sat sih na, "Shawulu, Shawulu, a meh lih deh ghi phi niyang an vhit vhit a sih diye? Khi shuwal nghi in kat ghi nyang kum mak mu. 15 Yakhal a tal, 'Ghi awe yeh, Nda Naan?' Nda Naan yakhal lap nni nnaa, 'An a Jesu ndhi ghi phi nyang yit muk vhit vhit sih. 16 Ama ghi yakhal khiting ghi dar khi kwak ghi, npe ndhi a nin san nghi npe bii ndhisih, de nan a mang ghi npe de nghi ghi shin yon nnan yakhal ghi shin langthing npe bii mu ndhi ghi phi naa an yakhal npe bnii wukwa mu ndhi a nin san nghi. 17 An pe ba'am ghi khi sar gurum fhik mu yakhal khi sar al'ummai ndhi an pe lep ghi shin ya nder mu, 18 de mu app yit du deh mu yit pe wu kwo mu wakya khi pee wu saan yakhal khisar shetan/sharfom shin wakya nder Nda Naan, pe deh mu kat kon khi shikbis fut dhi yakhal mu kat pe nder nyen ndhi mu kat dem khi Nda Naan wa phi shinzeen khi mu man. 19 "Khidangkong ndhi asih, Long Agaribas, bhi a shin ka bal nthikhim riin wuret ndhi tong khi thingNaan sam ma, 20 ama she-she bhi a woo nyen ndhi Dimashku dang sih, yakhal Urushalima yakhal duk duk shikhir kaat khi yil Yahudiya, yakhal khi al'ummai mu duk, a ndhi mu khi tang kon khi shikbis fut mu wakji nder Naan, yakhal mu shin jep bii mu ndhi khi yarkam tang kon khi shikbis fut. 21 Pe ndhi sih bhi Yahudawa mu del an LihNaan yakhal mu tang yarkam tih an. 22 Yakhal di wa rhi bit wushini bhi an phi kat baam nder Naan, pe ndhi asih bhi a dar sih, phi woo fe ngurum wu Naan khi wu dyen, an phi sat me bi ma ban dhi bii ndhi nyen nah peh nthikhim khi riin Naan yakhal Musa mu sat a ndhi ni pe taa, 23 A ndhi ngu baam kaa mu khi shujel, yakhal asih, bhi ni kot a wushe-she ndhi khi yakhal khi dangkong mu'ut fini yakhal khi nin pe saan ngurum fun mu khi al'ummai." 24 Ndhi ni phi ka fwat kashin asih bhi Festas bwot orr sih na, "En ghi villing, Bulus! Man fhik bwer ni phi lih nghi ghi yerr!" 25 Bhi Bulus lap asih, "En nhi villing ma, Festas, gwo wuret, ama an phi sat a zeen fe. 26 Asih Nda Long ni khi man khi bi sih mu, yakhal an phi lap bhilip a khini nohot nlukhuit; pe ndhi a man ndhi me bi sih mu not taa nkom muk ma, pe ndhi duk duk bii sih mu shin mu a wu sihsok ma. 27 Nda Long Agaribas, ghi shin zeen nyen Kafung mhi Naan mu ah? Aman ndhi ghi shin zeen." 28 Long Agaribas sat Bulus na asih, "Ghi phi dang phi nhi lala de nnaan a tong a Kirista diya?" 29 Bulus yakhal lap, "Kot a lala oh kot asih ma oh, bhi an phi dang phi Naan a ndhi baa a ghi det ma ama duk duk khi nyen ndhi mu phi khiling an shini de mu tong khipe yad ndhi an di - ama a wukhime khi sarka sih ma. 30 Yakhal bhi Long yakhal khiting, a wukhime khi Gwapna yakhal Barniki yakhal nyen ndhi mu khi petong nder mu; 31 yakhal ndhi mu phi yit pee feh di, bhi mu sat nshak, "Gwo sih ni phi shin me bi ndhi khi lih mu tih ni ko mu bal ni nlih kwo ma." 32 Agaribas yakhal sat nFestas, "Gwo sih mang kat mu bwot ni in kat ye ba mang bhilip fee wayah khini nthikhim Kaisar ma.