Ep fe 23

1 Bhi Bulus langyit khi kah nyen tok diyel mu yakhal sat nah, "gun emnhighinnhi mu, an phi dikyil a Naan khi enwuret dih shin. 2 Hananiya Firist wuyon yakhal sat niyen dhi mu kus khi Bulus nah nyo shit phi muk. 3 Bulus yakhal sat nih nah gwar a gwo wuba-an, Naan par khi shit gwar zak. Ghi phi bwakhah an a khi khah diyel oh-kot ghi phi lhi deh mu lhi tiit nnan peh diyel yeh? 4 Niyen ndhi mu diyam dih mu lap nah, "ghi npe fhilip Firist wuyon mhi Naan ah? 5 Bhi Bulus nah, "A man nah nih a Firist wuyon mah npe ndhi nih a wuran nah ghi nok bhilip nbi wubis khikah gwo phithighim gurum mu sih. 6 Dhi Bulus nah kwang khime feh a Sadukiyawa mu kwang kwa a Farisiyawa, bhi ehp dhikhil nah emnhighinnhi mu an a gu Farisiyawa, la Farisiyawa zak. Mpe dhi a den puzung nhi khi kah yakhal khi niyen dhi mu duwam bhi mu bhi tok diyel nnan. 7 Dangkong dhi sat asih bhi jakhar yakhal khi nar Farisiyawa khi Sadukiyawa mu bhi khisher gurum mu kok sut vel. 8 Sadukiyawa mu yakhal bhilip nah me yakhal khi wu duwam mu dih ma, me jep lep khi Naan dih khi riin dih ma. Farisiyawa mu dar mut nah bih sih mu dih. 9 Bhi jakhar wuyon yakhal, pak niyen kam mu a Farisiyawa mu yikhil dhiram khiting mu phi jakhar, nah mu nah bih wubis dih gwo sih shin ma, koh sih a meh riin khi Naan khi lah lep khi Naan nih phi lap bhilip eh? 10 Dih jakhar eh yakhal yon, bhi mu phi lughut tap bhi mu yilang Bulus, bhi gwo phithikhim sat mu nah nyo shang nih ber nyo mwan khini khi pe ndhi niyen na yil mu dih. 11 Zang lhipar bhi Nda Naan dar kus khi Bulus yakhal sat nih nah khipe dih gwar cin tuhurkhaham gwar shin langting finih Urushalima bhi gwar khi shin asih Roma zak. 12 Dar per sa'an bhi Yahudawa mu khat phi du mu tuwarsut nah du shin meh bih mah, du shuu meh lah mah, du thi a thi Bulus det. 13 Niyen dih mu ben bih sih mu met gjurum ya gurum vel. 14 Mu yakhal mu mwan nder Firist wuyon yon mu khi niyen phithimmu nah, mu tuwar sun mun peh bhim meh bih khi muk mah, mu thi a thi Bulus det. 15 A peh wuni feh bhi mu sat mu nah nya mwan der gu thikhim niyen nah yil mu deh mu ji khi nih dih khipe ndhi dun phi dem lap bhilip khi gwar sih, bhi mun mu thi nih deh she ji rhi dih." 16 Lah khi emnhighin Bulus khiling nah mu phi tang kop muk peh thi bhi yakhal la-la mwan bhilip Bulus. 17 Bulus sat meh gwo wuyon mhi lyak nah gwar mang lah fe mwan khinih der gu phithikhim deh gwar khiling bih dhi nih peh sat eh dih. 18 Bhi gwo feh mwan khi lah fe der gu phithikhim nah a Bulus dhi mu bukhat nih lep jin der gwar khi lah sih peh ndhi lah feh khi bhilip dhi nih peh sat ngwar. 19 Bhi gu phithikhim feh ya sar lah-eh del shin waji der muk a sisok yakhal tal nder muk nah 'ghi a khi bhilip dhi ne npe sat an eh?' 20 Lah feh nah niyen Yahudawa mu phi dang shi phi ghi nah ghi bwot Bulus ndun dhida'ar shin yah khi peh wuyon; peh ndhi khipe mu phi dem shin tal mu nder muk. 21 A ji a peh sat ghi zak nah tap bhi ghi dem mah pedhi gurum mu met yagurum vel dhi mu phi tang kop muk, mu tuwar sut nah du bhim me sih khi am mah, du dem a thi nih det. Khidetsih mu phi tap a shi phi ghi det deh nghi lap-eh dih. 22 Gwo phithikhim feh sat lah feh del binih tap bhi ghi sat meh gurum nah ghi sat mebih nnan ma." 23 Yakhal yong peh jep liyak mu vel nah, "gu dok niyen liyak mu yakgurum yagurum niyen man shiit mu yagurum vel mu mwan Kaisariya khipeh sar dhi lhi par wu shin nih." 24 Shin sat mu nah nya dok bhizung dhi nih khi mang Bulus, deh mu mwan khi nih thikhim gwo ya yil Filikus shakap. 25 Yakhal ran ran nah, 26 "Ran dhi sih put a sa-ar Kalaudiya Lisiyas shin kom der gwu ya yil Filikus. A tal ghi a wuret, dangkong wuni feh, gwo dhi 27 Yahudawa mu ya nih mu phi dem thi nih sih deh a mwan khi gwu liyak deh mu bam nih peh ndhi a khiling nah nih a gu Roma. 28 Dok an phi dem man bih wubis dhi shin. 29 A mwan a kat mu phi fhilip nih a khi ka'ah diyel fut, dang bhi a kat bih ndhi mu sat nah gwar shin a wureet mah; ret deh mu bukhat nih, mu thi nih mah. 30 Dhi a nah dung dhi mu bhilip khi khah muk bhi a lhi mu mwan khi nih nder ghi deh niyen lang diyel khimuk mu mwan khi diyel feh der ghi. Dang mu khat." 31 Niyen liyak mu mang Bulus khi peeh ndhi mu sat mu shin sih mu mwan khinih Antibatiris lhi par. 32 Dar feh bhi mu yit niyen shiit mu deltikhim khi nih. Niyen liyak mu waak ya bhut peh tong khi mu. 33 Niyen man shiit mu roh nKaisariya mu shin ran feh gwo yil eh yakhal mu mwan khi Bulus nthikhim muk. 34 Dhi tang ran feh bhi tal nder Bulus nah gwar a la yil dhi neh? Dih khiling nah Bulus a la yil Kilikiya, 35 Bhi sat nah "an npe khiling bhilip fhik lat kat niyen diyel fhikmu wul" bhi yakhal sat mu yah nih bhal lhi diyel long Hiridus.