1 Khi dangkong dhi jakar sih sam te'er bhi Bulus yong peh niyen mwan der Naan mu, shin kar mu, duk bhi yakhal sat dang mu kha'at mu deh she del ya khime yil dhi mu khi yong a Makadoniya. 2 Dhi mwan dih khi yil fe bhi shin kar dhi khi bal phizung gurum mu deh she ji rhi me pe dhi mu khi yong a Hellas bhi shin tar kun dih. 3 Dhi Yahudawa mu ben pwo deh khi kha muk bhi dhi nih peh rhi vhing am peh ya me yil dhi mu khi yong a Suriya, bhi me no-ok ji nih nah wak ji wa ba khi yil Makidoniya. 4 Meh gurum dhi mukhi yong sim muk a Subataras Babiriye, lah Barus, shin der muk awukhime khi Aristarkus, khi Sakundar niyen Tasolikawa mu yakhal Gagus Baderbe, khi Timoti khi Tikikus yakhal Tarofimar niyen Asia mu, 5 dhi yeh ten del dhikhim gwe mu mwan khi tap phi muk me yil dhi mu khi yong a Taruwasa. 6 Mun mu yighil Filibi but vhing am khi dangkong sih si-ih bhi ji mu khat mu Taruwasa khi dangkong ter phat. Mu tong dih peh teer pokhovel. 7 Ter wushe but shi nung muos dhi mu kha'at peh si-ih shikhit nguuk bhi Bulus yakhal sat bhilip mu peh dhi nih peh dar yit mu dih, dak koh bhi del bhilip peh deh peh ba rap mu dih. 8 Npeh feh bhi peh bih lhing wus na-ah peh mu dih bwer dhi mu khat dih. 9 Dhi Bulus phi del bhilip fhinih bhi meh laah dhi mu khi yong sim muk a Aftikos khi tong khika mhai lhi khiting bhi sa-am mang nih sam tah yil a kum (mu-ut). 10 Bhi Bulus sam tah yil ji dar nkhaah muk deh yah nih den shishik nih yakhal na niyo nok ehn sih, nih khakam. 11 Dhi Bulus wakah dih lhi khiting bhi wakah tep pak nguk sih, bhi yakhal tong phi lap bhilip khi mu ba bit ji bang (peh sa-an), deh she del dih. 12 Lap sih mu yok khi lah sih wu khakam, shin mu khiling khi shang shishik de a leh ma. 13 Mun mu yak lhikhim shin wak yah vhing am peh del kam Assos deh mun mu mang Bulus dih dhi dok mu ben asih deh nih pet a yil dih. 14 Dhi mu khat nih Assos bhi mu mang nih vhing am mu ji mu pwat me pah dhi mu khi yong a Mitilini. 15 Dih bhi sih mu mwan but vhing am deh dar bhi mu phi yil kiyos, yakhal put bit bhi mu phi yil Sanas, deh she par vhel bhi mu Militas. 16 Dok bhi Bulus mang dhi jin peh del mwan Afisa but vhing am sar yak mu khi yah shi nih Asiya, peh dhi nih a ber-ber deh kot sih ji rhi Urishalima dih par Fentikos, kat yeh khi ret nnhi peh shin asih. 17 A Militas bhi Bulus lep shin kam Afisa deh mu yong niyen nan khi niyen mwan der Naan mu jin dih. 18 Dhi mu ji der muk bhi sat mu nah, "Gun shi kah suk gu man peh tong dhi a tong khi nargu, yakhal nshe dhi a ten kwak nhi khi yil Asiya. 19 An phi dhik yil Na'an khi phizung khime, khi sam khi khaah thikhim mu, khi yit mwa, shin a wukhime khi gakharshik shini-shini dhi a shu khi gwak dhi Yahudawa mu tang npeh nhi. 20 Shin gu man dhi a khiling khi thikhin sat bih dhi nih a wuret gun mah; an phi kham gun shilhi-shilhi a khipeh wu sa-an. 21 An phi nin niyen dhi mu man Na'an khi dhi mu man Na'an mah nah niyo yit shikbis Naan sih deh mu shin ze-en Jesu gu baam fun dih. 22 Khidetsih an peh del-ya Urishalima, dak ko bhi a man bih dhi peh kat an dih ma, a rhi-in wubang khi tap an det. 23 A man dhi rhi-in wubang ten sat gwe nah an peh shu-u je-el, khi rho lhi kwo shini-shini jep yil dhi an peh rho dih. 24 Nder nhi bhi a mang se-en nhi a meh bih mah, shin tal khi phinhi mah, an phi dem deh an a lat a shiit dhi Jesu gu ba'am fum shin an dhi nih a dhi a sat bhilip wureet khi pwo Na'an ngurum mu. 25 Khidet sih bhi gun dhi peh gyet an phi mwan khi nar gu phi kop pwo Na'an sih bhi gu kutdih peh shin nah yit nhi mah. 26 Peh dhi asi bhi an phi sat gun bit wu shini nah kat me gurum lakham khi yarkam Na'an bhi a an mah! 27 Peh dhi a biya pwo sat meh bhilip Naan khi gun mah. 28 Gu tap kha suk, khi niyen dhi rhi-in wubang lhi deh mu lap bhilip Naan dih. Gu bhor niyen tap gurum dhi mu a niyen Naan peh sim khi lah Naan Jesu Kristi dhi shin kha shin npeh mu. 29 A man dhi khat a yit peh sih dih bhi, khar-am mu peh ji rho khinar gu deh mu tar gun dih. 30 Par khi deh dih bhi pak gu mu khi ji gos dung deh pak gu mu (niyen mwander Naan mu) shin ze-en mu deh mu mwan der mu dih. 31 Gu tong khi ehn, gu diye dhi a kham gun pu'u gu tai-tai dih.s khi lhipar peh yi-ih kun khi yitmwa yit nhi. 32 Khidetsih a yit gun khi sar Naan, deh shiit wuret khi Naan khi tap gun, yakhal lhi rhi-in wuret khikha 33 A thilhik shakhal me gurum mah, shin a thilhik leh shishik me gurum mah. 34 Gun shikha suk gu man dhi sar nhi mu shin shiit deh a khat sih dhi a sih khikha san khi gurum dhi mu phi mwan der nhi dih. 35 A nin gun, yarkham shini-shini dhi kat ghi shin shiit khi bal bhi ghi khat bih dhi ghi ba-am niyen sarwen mu, shin ghi leng bih dhi Ndah Jesu sat dhi nah, "Gwo dhi shin bih bhi nih khi phizung piya met gwo dhi lap." 36 Dhi Bulus lat bhi yakhal kurum deh dang Naan dih a wukhime khi mu. 37 Dhi mu phi okhom nih deh mu sat dang mu khaat dih nih bhi mu a yit mwa. 38 Phizung mu thikhok peh dhi sat nah niyo peh kudi khi nah yit nih mah.