1 Par puus sam khi riin wubang bhi khidhing khimu khipe khime. 2 Dhedi le bhi me kokom shi yakal khibi vhivit si, waji villing ndhikin lhi ndhi mukhi tong dhi. 3 Dih det bhi membi shi yakal khibi wus si bhi sam nka mu khime khime. 4 Dih bhi riin wubang sam khika mu, bhi mu lap bhilip shi liis mu dik dik khibi yar ndhi riin shindi mu. 5 Gurum Yahudawa mu ndhi mukhi tong khi yil Jeerusalem, nyen Naan mu ndikin yil. 6 Dhi mu kiling vhivit fe bhi gurum ndhi mu dhi kah mu ohr mpe dhi mu khiling liis kishak de ba ahp pwo mmu. 7 Bi fe fih pwo, bhin wam mu bhi muna "Kambam, nkot nyen ndhi mu phi lap bhilip si aniyen Galili mu eh? 8 Deh anang mun phi kiling liis mhi shak diye? 9 Gurum Parthians mu khi Mades, khi Elamites khi gurum ndhi mu Mesopotamia, khi yil Judea khi Cappadocia khi Pontus khi Asia. 10 Phrggia khi Pamphylia n'Egypt khi pak pe Libya kus Cyrene khi Mhizep mu nRom. 11 Gurum Yahudawa khi Proseltes, Cretans, khi Arabia mu, mu kiling mu phi sat khi liis fun, khi ka khisher bi fhi pwo ndhi Nda Naan shin. 12 Fih pwo mmu, bhi mu sat nshak muna, "Ndhisi ameme asiyeh?" 13 Bhi pak mu tet muna "Mu ihkil khi am ting wu pwo." 14 Bhi Peter yakal nder wu sarpwo-khime fe mu, yakal ep dhikil nhi sat mu nah, "Gun gurum Judea mu khi gun ndhi gu tong nJerusalem yit de ngun gu man dhi; gu lhi engu khika bhilip fhini mu. 15 Mpe ndhi ba niyen si mu ihkil ah ihkil am ting khi bhi ndhi gun phi nah fe sih mah, pe kudi a bit. 16 Mpe ndhi mu khiling bhilip si nphi ngu jakam Joel. 17 "Kot ah nlad khi teer fe mu, Nda Naan nah, la ah dhik riin fhin nkah gurum mu . Jep dass khi jirhap fuk mu khikot khi jakam. Dengmar fuk mu khi nah pe ntikim, nah giya fuk mu khi sukun sukun. 18 Zeen khika niyen shiit fhin mu dass khi shorop ndhikin ter ndhi del si, ah shin riin fhin mmu bhi mu nah bih ndhi ntikim mmu, 19 Ah nhin bhi phi pwo mu khi-ting khi bi nhi nah mu khi yil, thikim, wus, khi ihkin diyel. 20 Puus khi bor ah ljipar, tar khi bor ah thikim dangdeshe bhiga puus mhi Naan si wul dhi. 21 Kot akhibi ndhi duk niyen yong sim ndhi nhi ah mhi Naan bhi mukhi kat se'en' 22 Gun gurum Israel mu gu khiling, Jesu mhi Nazareth ah gurum ndhi Naan lep khi nhi khi simshik wu nan mu, bi fhi pwo mu khi bi nhi nah mu ndhi shin nnar mu khi bi ndhi mu mandi si. 23 Nda Naan lep khi gwo si mpe nah jel khi mang/vwang thikin shikbis fun mu, bhi mun mpe gurum ndhi mukhi shiin khiling, mu niyang nhi bhi mu kaa nhi khika shep cross. 24 Nda Naan yakal khi nhi, put khi nbut shwal khi muut mpe ndhi muut khi si kokorong nkah muk ma. 25 David sat nah, ah nah Nda nyit nhi, mpe ndhi nhi khisar wu sih yak ba membi khi ntung an. 26 Mpe ndhi asi bhizung nhi piya, lis nhi phi ret yit asi a tong nbut mah thikim. 27 Mpe ndhi ghi yit se'en nhi nwus ma, bin ghi yit nwubang ndhi ah mak wam ma, 28 Ghi kam yar seen nnan. Ah khiling khi shang mpe nah yit ghi. 29 Emnhikin nhi mu, nhi nka yar deh nnan a sat ngun khi bal nka Patriaach David ndhi muut yakal mu wum nhi, khisar khimuk nhi dhi khidetsi. 30 Mpe ndhi asi bhi nhi ah ngu jakam, man dhi Naan shwar shini ngin, nhin ji den meeh lah fin de nhi sih kop nhi dhi. 31 Nah bhi ndhi pe tah ntikhim, bhi lap bhilip nka yakal khi Jesu Khristi, nah mukhi yit nhi nwus ko nah waam nghit shik ma. 32 Nda Naan yakal khi Jesu ndhi mwan ah langting. 33 Mpe ndhi asi ndhi mu mang nhi shin ka khiting khi sar wusih mhi Nda Naan, kat gam zukum khi riin wubang nder Nda, ah nhi shin riin mhi bi ndhi man phi khiling fe khi nah fe. 34 David ka khiting shi kashini ma yakal nah Nda wuyon sat nah Nda ghi tong sar nhi wusi. 35 Ah lhi shar fom fhik mu de ape dhi ghi lhi kwak ghi dhi". 36 Mpe wuni fe bhi duk duk niyen Israel mu man ndhi Naan shin nhi a Nda khi Khristi Jesu ndhi gu kah nhi fe". 37 Ndhi mu khiling, bhi sham bhizung mu, bhi mu sat nPeter khi gokoshi niyen shiit mu, "Emnhikin nhi mu, mu shin annang yeh? 38 Bhi Peter sat mmu nah, "Ko aweh thiwap yakal lap batisma ndikin sim khi Jesu Khristi mpe kon khi shikbis fun mu, bhi gu kat zukum riin wubang. 39 Bhilip ndhi si a mpe gu khi Jep for mu, khi niyen ndhi mu njong khi niyen ndhi Naan yong mu khiding. 40 Sat bhilip mu mmu bwer nhi phi kar mu nah, gu pwat khi kah suk nbut ndhi ntikim. 41 Mu shin batisma ngurum ndhi khiling shin mu lap bhilip khimuk mu wak rhi dubu kun (3,000). 42 Mu shin kah sut nkam khi dang Naan mhi niyen shiit khimuk mu, khi lhi wuret khika nguk deshe tarap fe dhi. 43 Lukut ya mu, niyen shiit khimuk mu shin bi fhe pwo. 44 Niyen shin zeen mukhi pe khime mu shin jep bi mu khishak. 45 Mu sarap khi bhilong fut mu, mu ko kishak duk duk mhi mak bal khi koawe. 46 Dhider fe ndhi mu ter ndang Naan khi leng wukhime, bhi mu koh nguk khi bhizung khime ba demka. 47 Mu plang Naan mpe gurum ndhi Naan shin mu ndun. Shi bit mshi bit Nda Naan phi shin gurum nkwa mu mm ndhi mu kat se'en.