1 Ghi Tiyofolas fiyar si ndhi nshe ndhi ah ran, bhim jep bi ndhi Jesu she shin fe shi bi ndhi she kam fe. 2 Ji rhi puus ndhi mu mang nhi shin waka khiting, khidangkong ndhi sat bhilip bdikin riin wubang nshar kam shiit fini ndhi bun mu. 3 Nhin kashin mu nkaham ndangkong ndhi shu wula nwukhime khi nhin bi mu shini shini wu bal mu. Nhin kashin mu nka nka mpe ter yak gurum vhil nhi phi lap bhilip nka wuret khi Nda Naaan khiting. 4 Ndhi nhi a wukhime khi mu bhi sat mu nah tap yak mu khi yikil mu yit yil Urushalima ma nyen diyerem mbisi mpe gam khi bi ndhi Nda sat, ndhi gu khiling shi phi nhi. 5 Mpe ndhi Yahaya shin batisma khi am, ntikim bhi mukhi shin batisma ngun a riin wubang. 6 Mpe ndhi asih mu kur khishak bhi mu tal phi muk muna "Nda, ghi mpe shin yilwuyon nyen Isarila mwa?" 7 Bhi sat mu nna maan mhi peh khi bit ndhi Nda Naan den nbut bal ndhi amhin ah muk ma. 8 Gun mpe kat bal kat riin wubang sam nka gu gun mpe bor ah lanting fhin mu khi yil Urushalima khi yil Yahudiya khi yil Samariya shin kam lang yil. 9 Ndhi sat asi, mu nbut leng det bhi mu mang nhi shin kah kiting, me lhibhin shi mang nhi ka-sikhi nhi khiting bhin shin muna nhi ma. 10 Mu phi nahpe khiting munah nhi phi del kah bhi gurum mu vhil mukhi diyaram kus khi mu khi leh wu piya. 11 Bhi mu sat muna, "Gun gurum Galilee mu, gun phi diyaram nah peh khiting ame diye? Jesu ndhi mu mang nhi ndeergu shin kah kiting nhi mba wawul khi bi ndhi gu nah mang nhi shin kah khiting si." 12 Bhi mu wakya Urushalima mpang dhi mukhi yong ah Pang Zaitun, ndhi kus khi Urushalima jong fe akhibi mel khime si. 13 Ndhi mu roh khi yil eh, bhi mu kah khiting khipe ndhi tong mukhi tong dhi, Bitrus, Yaahaya khi Yakubu khi Andarawus khi Filibus khi Toma, khi Batalamawas, khi Matiu khi Yakubu mhi Kalfa, khi Saminu Zaloti khi Yahuza mhi Yakubu. 14 Duk duk khimu khi leng wukhime mu da'ar dang Naan awukhime khi Mata khi Maryamu nhikin Jesu khi emnikin nhi mu. 15 Nteer simu Bitrus yakal dar khiting na'ar emnikin nhi mu (gurum mu wul yakgurum peme nkaat fe) bhi nah, 16 "Emnhikin nhi mu, ah tiit deh nwar dhi riin wubang sat nphi Dauda khika Yahuza ndhi seet khi Jesu." 17 Giyet mu phi kun nhi nnar mu, mu shin shiit khimuk nhi nbut shiit si fe. 18 (Gwo si khi phishi shiit fin wubis, seet me baga pe, bhi puta khi kah, but muk piyan yimbut muk mu fuu khiting. 19 Bi ndisi ah wumhi man nder gurum ndhi khi yil Urushalima, mu phi yong sim pe fe a yil Akaldama khi liis lhidu, ndhi phishi fe ah pe tikim). 20 Mpe ndhi nhi awurhiran nbut Zabura sina, "Lhimuk bor ah wuniniyang, Tapbhi megwo khi tong dhi ma" Yon khimuk megwo lap. 21 Mpe ndhi asi me gurum ndhi nhi wukhime khi mun ko apenang ndhi Nda Jesu nhi khi mun. 22 Yakal shi batisma ndhi Yahaaya shin ji rhi npus dhi mu mang nhi nder mu shin waka khiting, mme khinaar gurum simu ah langting yakal khimuk ntukun awukhime khi mun. 23 Bhi mu mhin gurum mu vhil, Yisufu ndhi sim muk ah Barsaba ndhi mu shin sim nhi khi Yustus khi Matiyas. 24 Bhi mu dang phi Naan muna, "Nda ngu man bhizung gurum mu duk duk na'ar gurum wu vhil simu ghi mhin gwo ndhi ghi mang nhi mmun. 25 De nhi lap shiit mhi kop bhilip dhi amak ndhi Yahuza kon si nde nhi mang kop muk dhi." 26 Bhi mu kon peel mmu, Matiyas kat, mu den nhi dhi nbut nyen wu sar pwo khime fe mu.