1 Ndhikin teer wuni fe mu, bhi Long Hiridus yah lhi yit khi kah niyen Naan mu deh nhi shin jeel mu dhi. 2 Kwap Yakubu emnhikin Yahaya khi shuk nghar. 3 Khidangkong ndhi nah ret nyit Yahudawa mu, bhi mwan yah Bitrus zak. Nbut retyit mhi yii khi yii. 4 Khidangkong ndhi mu yah nhi, bhi den nhi nlhi kwo, mu shin shiit nsoja wubal bal mu fheer fheer pe fher. Mpe tap phi muk, nhi phi leng waji khinhi nthikim gurum mu khidangkong ret nyit fe. 5 Mpe wuni bhi mu den Bitrus nlhi kwo, bhi nyen Naan mu dang khi bhizung khime mpe muk. 6 Dhi nlhi par ndhi Hiridus mpe daar wawul khinhi mpe deh mu thok diyel nhi dhi, Bitrus phi saam nnar soja mu vhil, ah wu bwakat khi sarka, niyen tap phi pe ndhi nthikim philhi mu phi tap pe nlhi kwo fe. 7 Dhi det bhi lah lep khi Naan mhin kashin shikokop muk, bhi pe bang dhi nlhi kwo fe. Shit Bitrus nkum, mii nhi nah, "ghi jwal leh fhik khi kokop", Bitrus shin asi. Lah lep sat nhi, "ghi yakal nkiyen/la-la, bhi sarka fe puta. 8 Lah lep khi Naan sat nhi na, "ghi bwakat za-al, ghi wup ngado ghi mwan nder nhi," 9 Bitrus put nder lah lep. Nhi man bi ndhi lah lep khi Naan shin si ah zen ma, dennah jin ah phi sukun. 10 Dhi mu del phi ngu tap phi pe ndhi nshe khi wu vhil, mu roh phi lhi wubal ndhi ah yar yah khi yil eeh, bhi ehp shika sat. Mu pwat, mu sam khi yar, bhi lah lep khi Naan yit nhi dhi mbisi. 11 Ndhi Bitrus waji nbut ehn nhi bhi na, "Ah zen-zen, ah man ndhi Nda Naan lep lah lep fhin deh nhi put khi an nsar Hiridus dhi, khi jep bi ndhi gurum Yahudawa mu phi leng shin f khiding". 12 Ndhi del man ndhisi bhi, mwan yah lhi Maryamu nhikhin Yahaya ndhi mukhi yong nhi ah Markus, peh ndhi gurum mu khaat dhi bwer phi dang Naan. 13 Ndhi kwak phi-lhi kuut, bhi meh larep ndhi sim muk ah Roda put nah pe khibang deh nhi man gwo fe dhi. 14 Ndhi man dhikil Bitrus, bhi ehp phi lhi ma, nsar reetyit, bhi si wakam ndhikin lhi, sat mu na "Bitrus khi dar phi lhi kuut. 15 Bhi mu sat nnhi munah, "Kah ghi nkiyet ma". Bhi dar khi ka bhilip fhit, na ah asi. Bhi muna, "Ah lah lep khi muk". 16 Bhi Bitrus wet phi kwak phi lhi, ndhi mu ehp phi lhi, mu nah nhi bhi ahp/fhi pwo mu. 17 Bitrus ehp sar deh mu tong shakat dhi yakal sat yar ndhi Naan put khi jin nlhi kwo dhi. Bhi nah, "Gu sat bisi nYakubu mukhi gokoshi emnhighin mu muh dhi", Bhi yakal del yah khipe wu-kwa. 18 Ndhi bhit bang, bhi peh shikin nnar soja mu khi bi ndhi khat Bitrus. 19 Khidangkong ndhi Hiridus bong nhi de kat nhi ma, bhi tal dhikil niyen tap phi pe mu, na mu tiyo mu. Bhi yakal yit yil Yahudiya dhi waya Kaiseriya tong dhi. 20 Hiridus khiling khi tukurnung khi niyen Taya mukhi Sidon. Mu mwan nder muk khi leng wukhime, mu dhil eehn Bilasta ngu bam khi long wuyon deh nmhi bam dun mpe dang tong shakap mpe ndhi yil khimu phi lap si khi yil long wuyon si. 21 Par meh pus wudhiden bhi Hiridus jwal leh long fhin yakal tong khi kah petong long fini bhi lap bhilip khi mu. 22 Gurum mu fwa oor muna, "du khiling ah dhikhil me naan, amhi gurum ma" 23 Dhi det bhi lah lep khi Naan ji shit nhi mpe ndhi shin wuyon khi plang Naan ma, nhiyet mu arr nhi bhi muut. 24 Bhilip khi Naan shin sim yakal kat yon. 25 Ndhi Barnaba mukhi Shawulu mu lat phi-shi mwan fut, bhi mu wakyah nUrushalima, pak mu wughiyet mu ran nah, awukhime khi Yahaya ndhi mukhi yong nhi ah Markus.