Ep fe 3

1 Dang bhi ghi man ndhisi: nbut teer wulat mu bhi bih mu nphe bis. 2 Nphe ndhi gurum mu nphe deh a nyen dem kasut, nyen dem shagal mu, nyen shai mu, nyen shitzung nnot phishi mu, nyen sat bhilip wu baan nkaa Naan mu, nyen shii khilling nda du khi nighin du mu, nyen nyang nin plang mu, khi nyen ndhi mu nnot bang. 3 Mu khi deh nnot nook nmu demshak ndhi Naan den, nyen dung mu, ndhi mu khi man yaa sut ma, nyen dem lyak mu, nyen ndhi mu phi dem meh bih wuret ma. 4 Mu khi kot a nyen vling dangkong/yit pit ngurum, kaa'bal, bang-shik, nyen ndhi mu phi dem bih khi yil ma dem Naan. 5 Mu khi deh khipe nyen lwaghat Naan mu si, dang bhi mu khi nyang bal fe. Ghi baa nder nyen wuni fe mu. 6 Pak mu a daas ndhi mu khi rho nnaar lih nphe bang shirop ndhi mu nnot seen. Ndhi si a shirop ndhi mu mang shikbis den nkaa du shin leng wubis mu mang en mu. 7 Shirop si mu khi wet a nkam bih mu det, dang bhi mu sham kat man nmu man bhilip zeen ma. 8 Deh a khipe ndhi gyet Yanisu khi Yambirisu mu diram khi jaghar nkaa Musa. Nyen kam wu bis si mu duk mu mang a en wuni fe duk nphe nyang zeen. Mu a nyen ndhi nook mu a wu tihkok, nnot nret nphe shinzeen. 9 Mu nphe mwan sihng peh ma. Nphe ndhi yoghor khi mu nphe put nkaam, khipe nmu nyen ndhi si mu. 10 Kat a nphe ghi bhi a man ndhi ghi phi mang yaar kam-kam fhin, khi yet ndhi an phi shin bih, nook nih, shinzeen, moghor nbut wula, demshak, moghor, 11 but-deet, jel, khi bih ndhi taa khi an khi yil Antakiya, Ikoniya, yaghal Listira. A mang moghor nbut jel si. Nbut bih si mu duk-duk bhi Nda bar an. 12 Duk-duk nyen ndhi mu nphe petong nhi Naan nbut Kristi Jesu mu phe shwa jel. 13 Nyen shikbis khi nyen bang-pe mu nphe shin bih ndhi bis-bis. Mu khi bang gurum mu khi yaar wubis. Nphe ndhi mu khi ka-sut mu bang mu den khi yaar wubis. 14 Nphe ghi zak, ghi dar khi yaar ndhi ghi kam yaghal ghi khi shinzeen bal-bal nbut fe si. Ghi man gwo ndhi ghi kam nder muk. 15 Ghi man ndhi pehgyet ghi kudi la-wule bhi ghi man ran nmhi Naan. Khi baam ghi nphe kat seen ndhi khi bar ghi nyaar shinzeen nKristi Jesu. 16 Ran khi bhilipnaan a nook khi Naan. Nih a wuret nphe waar, nphe sat zeen nbhizung mu, nphe dak en, yaghal nphe kam en wu bang. 17 Ndhisi a nphe deh ngwu Naan man shin bih ndhi khi dak nhi nphe duk-duk shiit wuret mu.