Ep fe 4

1 A shin waar wu bal si nyit Naan khi Kristi Jesu, ndhi nphe tok diyel nyen wu kagham mu khi nyen wu dwam, nphe nin kashin khi tingnaan fini. 2 Ghi kam Bhilipnaan. Ghi tong khi en nbut wuret khi wu bis. Ghi shen, biyal, shin kar, nbut moghor khi kam. 3 nphe ndhi biit nih nwul ndhi gurum mu khi nyang kam wuret. Mu tang a nyen kam ndhi mu phi sat bih ndhi dun phi dem fe. Mu khi bang mu khi bih ndhi mu dem khilling fe. 4 Mu khi viling dangkong du nphe khilling zeen, yaghal mu wakya nkhilling dung. 5 Ndhi a ghi, ghi deh a ngwu leng wu jong nbut bih mu duk-duk. Ghi dar nbut shu-jel; ghi shin shiit ngu kam bhilipnaan; ghi gam shiit fhik. 6 Nphe ndhi an a tong a phi langyit. Biit wa fhin wul gwe. 7 An a lyak-lyak wuret fe gwe; a lat na-sisi fe gwe; a yaa shinzeen fhin. 8 Mu den zung wu bang nnan, nhdi Nda, ngu tokdyel wu bang, khi shin nnan par biit fe, a an det ma, khi gurum mu duk-duk ndhi mu phi dem wawul khi muk. 9 Ghi dar dhe ghi wul der nih lala dih. 10 Nphe ndhi Dimas yit an dih. Nphe dem bih dighinyil si bhi yit an dih mwan ya Tasalonika. Karaska mwan ya Galatiya, yaghal Tiitus mwan ya nDalmatiya. 11 A Luuk det nder nih. Ghi kat Maak yaghal ghi pan nih ndersak nphe ndhi nih a baam nnan nbut shiit fin. 12 A lep Tikikus shin ya Afisa. 13 Kat ghi nwul bhi ghi pan godo ndhi a yitdhi Taruwasa nder Karbus, khi vilipnaan mu, khipe shim ndhi khi ran khi ka fe si. 14 Iskandari ngu kollom nin but bis nnan. Nda khi kwat nih khir khi shiit khimuk. 15 Ghi duk ghi dar ghi yaa kasak nsar muk, nphe ndhi nih nyang bhilip fun. 16 Nbut she khi dyel nkaa nih, bih meh gwo dar ndangkong nih ma. Gurum mu duk-duk mu yit an dhi. Mangye nok deh a langting nkaa mu si. 17 Dang bih Nda Naan dar ndangkong nih yaghal lhi tughurkaham nnan, ndhi lhi bhi bhilip khi muk khi kat gam, shin nyen ndhi mu man Naan ma mu khi kat khilling fe. A kat bar nphi liit. 18 Nda khi shang an nbut meh shiit wu bis yaghal khi bar an nphe tingnaan. Raam a mu muk duk-duk tai-tai. Asiwai. 19 Ghi tal khi Briskila, khi Akila, khi nyen lih Onisafaras mu nnan. 20 Aratas nyang tong bin Koranti, ndih a Tarofimas bhi a yit nih a wu gok khi yil Militas. 21 Ghi daar deh ghi wul deshe lughun dih. Aubulus tal ghi, khi Budis, khi Linuus, khi Kalaudiya, duk-duk emnighin mu. 22 Mang ye Nda Naan yit riin ghi dih ma. Mangye wuretkhinaan mwan nder ghi.