1 Nyen naa peh khi kaa (nyen jagham) wubis mu wul ndeer guurum mu khi nyen kaam wu baan mu duk. Mu khi wul khi kar wubaan nbuospeh tikhok khi sim nda mu ndhi shin kaa-shin nphe mu. Mu nphe bes tikhok khi sut. 2 Mu khi mwan khi deer bhilip ndhi shang khilling ndhi khi zeen ma. 3 Nphe tihlik khi ɗemkaa bhi mu khi gwam gurum mu. Tikhok khi mu khi teer ma nphe dhi nhi nphe bes ji (wawul). 4 Naan tep yit nin baa khi kaa shikbis khi jep lep fini mu ma (ka) bhi shin mu khi saar Tartakus ndhi nhi dyam mu khi gwaar yaghal yit mu nli'hkwo ndhe puus tok dyel ji dang. 5 Asi zak, Naan tep yit shin baa khi kaa yil wugyet ma, dang bhi baar Nuhu ngu zeen khi gurum pohovil ndhi fwan tihyil ndhe laan nyen shik biss mu khiding. 6 Naan shaan yil Sodom khi Gomorrah khi wuus ndhi kuur dhe nhi lilughut nyen shin shikbiss mu dhi. 7 Dang bhi Naan baar tsen Lot ngu shin wuret. 8 Simshiik khi gurum mu khiyil fe deh nLot a bhi kapyan. 9 Naan man yar ndhi ji/khi put khi kaa nyen ndhi mu shinzeen njin yak mu npal nsar sharfom, khi yar ndhi khi byak saar nyen shikbiss mu par yaghal khi yil. 10 Nmhi si a zeen fe nphe nyen ndhi mu deltighim khi tiik mu shopshik ndhi khi phishi ma. Mu khi kaabal shin mu khi lughut yit nphe tikhok khi sim gurum ndhi mu khi zeen. 11 Jep lep khinaan mu khi baal nbut riin khi Naan dang bhi mu khi shin bih tikhok kim sim ndhi a mhi Naan ma. 12 Nphe dhi asi mu dhi khi leng mhi gurum ma bhi mu a nphe kaam. 13 Muut a kwat khi simshiik wubiss khi mu. Kat mu bwot sut npuus bhi a ni a retyit khi mu. Mu a gurum wubis mu. Simshiik wubiss khi mu ret nyit mu kat mu ndeer nyen mwan ndeer Naan. 14 Mu khi tiik nyit nphe tihleet khi shirop mu; mu phe mang een gurum ndhi mu khi shinzeen wu bal khi yaar Naan ma nphe ndhi mu nbut shikbiss, bhizung mu phi leng a tihleet det. Mu a jep ndhe a po yak mu si! 15 Mu kon yar. Mu wakya ndikyil ngurum ndhi khi sim a Balaam laa Beor, ndhi nhi phe dem bikwat kat gurum shin me bhi nlaghar. 16 Dang bhi mu gwak jighir nhi nphe taghat khi muk yaghal me nagham (zaki) sat bhilip nhi khi dighil gurum dhe nhi dak shini dhi. 17 Pak da'as mu a khi peh bwut-bwut dhi wen nnot am si ma bhi a khi peh kwo fwan dhi koghom wu bal-bal si. Kwo wu bis-biss are wu de-den nphe mu. 18 Mu phi lap bhilip khi bak tsen. Mu phi gwam gurum mu khi big tiik mhi shohopshik. Mu phi gwam gurum mu ndhi mu phi ɗemyit shin shikbiis ndhi mu shin bwak wakya ndhi kopsuut. 19 Mu phi gwam gurum mu nphe deltighim khi shikbiss nphe ndhi mu mut a kwaram gwe nbut fe. Bhi a kwaram khi shikbiss kat khi peh ndhi bhi yit dhi ma. 20 Kat ghi yit shin shikbiss nbut sim dhi nhi a mhi Naan deh shin ghi ba nkohop sak bhi dyel fhik khi biss met ngwo ndhi man bih shin nnot nman. 21 Kat ghi man yaar dhikyil Naan ma bhi ghi ret met ngwo ndhi man bhi shin tahkat khi yar fe. 22 Bhi sim bhilip si bor zen mphe gu: "As's shin sih fuut fhit. Leɗeh ndhi mu tsughup shin mwan tsughup bhut bohook."