Ep fa 4

1 Kat a wuni, nphe ndhi asih mun phe shiit bhilip Naan, yahal nphe ndhi mun mu lap riin wuret, mun mu leng bha khi ndankong ma. 2 Ndhe nphe wuni, mun mu nyang bih ndhi nkwo khi bih ndhi khi shin khakuul. Mun phi dem bih ngumbuk mah yahal mun phe tikook khi bhilip Ndah Naan ma. Nphe ndhi mun phe nin zen fe bih mu shin kha sun ngwo ndhi khi nohok ʒen nder Ndah Naan. 3 Dang bhi kat shiit bhilup Naan fuk a nvuhum, mbhi nhi a wu vuhum nder niye ndhi mu khi yar ndhi a mhi dwam. 4 Nkwang mhi mu bih naan ndhi ndhi khin yil sih khi ten vwaham shin ʒen khi leng khi mu. Asih fe bhi mu khi nnah wusaan bhi shiit khi riin mhi Ndah Kristi, ndhi a nih a mhirin Ndah Naan ma. 5 Nphe ndhi mun phi nin a kha sun ma, ndang bhi a Jesu Krist Ndah Naan, yahal mun a jep shiit mhi khi Ndah Jesu Kristi. 6 Nphe ndhi a Ndah Naan sat nna, "phe khi saan khi phe wuthip". Khi ni nbhiʒung mu, nphe shin phebang man khi riin khi Ndah Naan khi yit Jesu Kristi. 10 7 Dang bhi mu khi bih ndilang wan, ndhe nih kot a wu pya ndhi khi bal wuyon ndhi a mhi Ndah Naan ndhi khi kot a mun ma. 8 Mun nbut jeel nyar mu khi ding ndang bhi makah mu ma. Mbhi fe an pwo nmun ndang bhi met nbal fun mah. 9 Mu shin jeel nmun dang bhi mu kon sar mu ma; mu tirap mun ndang bhi mu tihook khi mun mah. Shibit-shibit bhi mun phi mang shep ndhi mu kha Ndah Jesu Kristi. Khi nih nsho hop sun, ndhe nsehen seen khi Ndah Jesu Kristi nin kha shin nding su sun dhi. 11 Nphe ndhi mun ndhi khi sehen tong mu wet shi khasun nmuut nphe Ndah Jesu Kristi, ndhe sehen khi Ndah Jesu Kristi, ndhe sehen khi Ndah Jesu dhe a bih ndhi a wu nin mun Shohopsun dih. 12 Nphe ndhi a sih bhi muut nih phi shiit nshohopsun, ndang bhi sehen nih phi shiit nshohopsuk. 13 Ndang bhi mun khi riin wu khime mhi shinʒen khipe ndhi a wuran sih: "A shinʒen, yahal a sat". Mun mu shinʒen yahal mu sat duk. 14 Nphe ndhi a sih bhi mu man guro ndhi yahaal khi Ndah Jesu Kristi nih nphe yahaal khi mun nder Nda Jesu yahal ji khi mu khi gun ntihim nih. 15 Nphe ndhi bih fe mu khiding a nphe gu dhe wuret fe nnih rii ngurum wukwa mu burer ndhi khi ji khi plang del tihin nbut riin khi Ndah Naan. 16 Tap nbhiʒung gu ntep ma. Dau khi ndhi yit gurm mu phi nah a khiphe ndhi mun phi tihkook, bih mun mu man ndhi Naan phi dik mun shi bit shi bit. 17 Nphe wu khides sih, jeel wule nih phi dak mu nphe riin wuyon ndhi khi mwan tai - tai dih nti khim nkam. 18 Nphe ndhi mun phi lang yit a khi dhel bih ndhi mun phi nah a khi yit mah a khidhel bih ndhi yit nah mah. Bih ndhi mu nah khi yit a bih ndhi khi tihkook, dang bih ndhi mu khi nah khi yit mah a mhi riin ndhi khi lat mah har tai tai.