1 Ghi nok byal gwo ndhi a wuyon si. Wak bhi ghi kar nih khipe nda ghi si. Kar daas wu dyen mu khipe emnikhin mu si. 2 Kar shirop wu nan mu khipe nighin mu si, yaghal shirop wu dyen mu khipe emnang wu shirop nbut yon khi bang. 3 Gu shin yon shirop ka mu, nmu zeen mu. 4 Dang bih kat meh mat kaa nih jep mu ma bhi ningkaam mu, bhi ret ndhi mu khi she nin yong dighin lih du. Yit deh mu kwat nda du khi nighin du, nphe ndhi dih si nih phi ret yit Naan. 5 Bhi gu yit mat kaa wu zeen dih daghat. Den tukurdwan fhit a nkaa Naan. Khi wet phi dang fhit khi dangphinaan fhit a nlipar khi pus dau. 6 Dang bhi meh mat ndhi tong a nphe dem shiit-shik bhi nhi a wu-muut, konshak ndhi nih nkaham ma. 7 Ghi kam bih si mu yak mu khi ndeh nnot shikbis. 8 Kat meh gwo nyang shin bih sar njep'pup finin mu, man bhi a nyen dighin lih khi muk ma, bhi nyang a bhilip zeen yaghal ma gwo ndhi phi shinzeen ma. 9 Meh mat dhi yii khimuk del yakgurum kun bhi mu den nhi a mat kaa, mat mis khime. 10 A tiit deh nmu man nih khi shiit wuret dhi, khipe naa jep mu si ma bhi lap mhizep mu si, ma bhi vwang kwak nyen shinzeen mu, ma bhi baam nyen jel mu, ma bhi shin bhizung nbut shiit wuret mu duk-duk. 11 Nphe shirop kaa wu dyen mu, gu nok tang mu nbut mu si. Nphe dhi kat mu shin shi-shik du nphe dem-shik nyar wuret ma dhi Kristi nyang, bhi mu phi tang a dyak. 12 Nbut wuni fe bhi mu phi jaghal a bhizung du nphe ndhi mu nyang a bih ndhi du lap eh nphe nih wushe. 13 Shin yaghal mu khi loghot khi deh baan nnot shiit shi-shin. Mu khi mwan shi-lih shi-lih. Mu khi deh a nnot shit set ma, mu khi kot a nyen riim khi nyen taa nnaar gurum mu. Tong mu lap bhilip ndhi wal ndhi mu khi sat ma. 14 Nphe ndhi asi bih an phi dem nshirop wu dyen mu mwan dyak dih, deh nmu be'eh jep dhi, nphe yaak dighinlih, yak mu khi shin pong sharfom nphe lang po nkaa mu nphe shikbis. 15 Nphe pak mu viling gwe nkwang mwan nder Sharfom. 16 Kat meh mwan shinzeen nhi khi shirop-kaa mu, bih baam mu, yak ntighin fe khi waya nkaa lihnaan, deh nmu mu shirop kaa wu zeen fe kat baam dih. 17 Yit ngun shin yon yit vhil nyen nan ndhi mu yaa gurum mu a wuret mu, ndhi mu shin shiit khi bhilipnaan yaghal khi kam. 18 Nphe dhi bhilipnaan sat na, "Ghi bwaghat pih nagham ma kat nih phi shiit nmar," yaghal, "Gwo ndhi shin shiit bih ret ndhi mu khi kwat nih." 19 Ghi nok lap meh dyel nka meh gwo wuyon si kat ba khi langting mu vhil ma bih kun. 20 Kar nyen shikbis mu khi yit gurum mu duk-duk deh ngokshi mu lwaghat dih. 21 An phi lang nghi deshe Naan shin deshe Kristi Jesu khi jep lep Naan ndhi mu taghat, deh nghi ghi lap waar si ghi yaa nnot naa yit yaghal ghi nok shin meh bih khi bunyit ma. 22 Ghi nok lhi sar lala nkaa meh gwo si. Ghi nok lap pak shibis khi meh gwo si. Ghi den ka-sak a wu bang. 23 Ghi nok shu am si. Kat asi, bhi ghi shu mwos nlaani nphe but ghi khi gok fhik ndhi khi wet a wet det. 24 Shikbis khi pak gurum a bih man khi bang, shin a nih phi mwan deshe mu dhi nbut tok dyel. Pak shikbis nmu gurum mu phi ji a ndankong. 25 Asi duk, pak shiit wuret mu a bih man khi yit, yaghal pak mu a bih sok ma.