Ep fe 6

1 Yit deh nyen ndhi mu nbut tighin nmu kwerem mu mang nyen ndhi mu kaa du khi yon. Mu khi shin ndhi si a nphe dhe sim Naan khi kam khi muk nok tikhok si dih. 2 Kwerem ndhi mu khi nyen naa dun ndhi mu shinzeen nNaan mu nok shin kaabal nmu si nphe dhi mu emnikhin mu mu. Kat a si, bih wak mu shin shiit nmu a wuret. Nphe ndhi nyen naa mu ndhi shiit khimu phi baam mu a nyen shinzeen mu yaghal shin mu phi dem mu. Gu kam shin ghu sat bih si mu bal-bal. 3 Deh kat meh gwo kam-kam wu dik yaghal nyang kar fun wu ret, dhi a bhilip khi Nda mu Jesu Kristi. Deh kat mu nyang lap kam ndhi khi lhi tong petong wuret nmu Naan. 4 Gwo wu ni fe a ngu mang shin yon-yon shin man meh bih ma. Dang bhi nih a wu gok khi jaghar khi gagharshik khi bhilip. A bhilip wuni fe khi bor tihlik, jaghar, fhilip, langting wu bis, yaghal 5 jaghar shi-bit shi-bit nnaar gurum ndhi mu bhizung wubis. Mu viling mu yit zeen dih. Mu mang nang ghi lhi shin bih khi yar mhi Naan a yar kat bihlong. 6 Khidetsi mwan khi yar mhi Naan khi plang Naan khi bih nmak a kat yon bwer. 7 Nphe ndhi mu wul khi meh bih nbut dighinyil si ma. Shin mun nphe mang meh bih wak khi nih ma. 8 Kat asi, bhi wak mu eghil khi si yaghal leh rwan nsun. 9 Khidetsi pak gurum ndhi mu phi dem kat bihlong mu phi phidik nbut gwak khi sharfom. Mu phi tihk nbut leng shikbis mu bwer, yaghal bih mu ndhi phi lhi ngurum mu pwalep mu dughun. 10 Nphe ndhi dem khi shaghal a kuk shikbis mu khiding. Pak gurum mu ndhi mu den bhizung nphe tang nih mu yit yar shinzeen dih shin mu byang sut khi bhizung tihkok. 11 Nphe ndhi asi, ghi ngu Naan, ghi si nsar bih wuni fe mu. Ghi tang daar khi yarkaam khi Naan, petong mu Naan, shinzeen, demshak, moghor, khi shin bih nbut moghor. 12 Ghi lyak-lyak wuret nmu shinzeen. Ghi yaa sen nmu tai-tai ndhi mu yong ghi nphe nih. A nphe wuni deh ghi dar langting ntighim gurum mu bwer nka bih ndhi a wuret dih. 13 A shin waar si ngun ntighim Naan, ndhi lhi bih mu duk-duk khi sen, ntighim Kristi Jesu, ndhi gyet satzeen nPontius Pilate: 14 ghi yaa waar si a wuret, nnot ngagharshik, dang she wawul khi Nda mu Jesu Kristi. 15 Naan nphe nin kaa-shin nbiit ndhi den-Naan, Wuret Khime, bal ndhi a nih det, Long ndhi nih nkop, Nda ndhi a nih phi yayil. 16 A nih det man muut ma shin a nih khi tong nphe wu san-wus ndhi gurum khi ji kus khi nih ma. Meh gurum mak naa nih ma kot a naa nih khi yit. Yon khi bal mu tai-tai a bih ndhi mu shin nnih. Asiwai. 17 Ghi sat nnyen bihlong ndhi mu dighinyil si mu nok shai si, yaghal mu nok den bhizung nkaa bihlong si nphe ndhi mu khi phishi ma. Wak bih mu den bhizung du nNaan. A ni phi shin bihlong wu zen-zen nmun nphe kat shang fe dih. 18 Ghi sat nmu mu shin ret, mu long nbut shin shiit wuret, mu deh a nyen shin zughum mu, shin tong mu koo bih khi gurum mu. 19 Kat asi, mu khi kur kuk bih wuret mu nkasut ndhi nih ntighim, dhe nmu mu kat sen ndhi khi phishi dhi. 20 Timo, ghi kang bih ndhi mu shin nghi. Ghi nok bhilip yoghor khi gagharshik ndhi nmhi taa jaghar ndhi mu phi bang-peh sina a man. 21 Pak daas mu phi sat bih si yaghal a nih mu man yaar shinzeen zak ma. Mangye wuretkinaan deh nder ghi.