1 Bih riin khi Naan sat khi yit-khi yit na ntighim bhi pak gurum mu khi yit yar zeen nbut Naan dhi yaghal mu khi lhi kaa du nriin gwampe mu khi kam-kam nmu riin wubis mu, 2 nbut taanaan dung. En mu a khi kot a wu bwaghat den. 3 Mu khi dhin dyak khi si-sih mu ndhi Naan gyet dak nphe koo kinaar nyen ndhi mu shinzeen shin mu man zeen. 4 Nphe ndhi bih mu duk-duk ndhi Naan dak a wuret. Tap gu nyang meh bih ndhi mu lap khi plang ma. 5 Nphe ndhi nih a wu bang khi bhilip khi Naan khi dangphinaan. 6 Kat ghi den bih si mu deshe emnikhin mu, bhi ghi bor ngu shiit Jesu Kristi wuret. Nphe ndhi ghi phi kat eghil khi bhilip shinzeen khi kam wuret ndhi ghi phi lap fe yaa. 7 Ghi nyang dramtis ndhi tong khi shang khilling nshirop wu gya mu. Kat asi, bhi ghi kam bih nka-sak nmu shiit Naan. 8 Nphe ndhi kam bih nka-sak nih khi ret nlaani, yaghal shin shiit khi Naan ret nphe bih mu khiding. Nih khi...nphe senn ndhi khidetsi khi senn ndhi ji. 9 Lep si a bih ret lap yaa khi bhizung duk-duk. 10 A nphe ndhi asi deh mun phi daar dih khi shin shiit nnot nok dih. Nphe dhi mun khi tukurdwan nbut Naan ndhi khi senn, ndhi a nih bar gurum mu duk-duk, man ba a nyen shinzeen mu ma. 11 Ghi sat bal-bal yaghal ghi kam bih si mu. 12 Yak meh gwo khi byas yii fhik nmu dengmar ma. Kat asi bih, ghi deh a bih kam nyen ndhi mu shinzeen, nbhilip po, shiit shin, demshak, den bhizung, khi bang. 13 Dang deshe a wawul dhi, ghi daar ntang ran, khi shin kar yaghal kam-kam. 14 Tap ghi byas zughum khi Naan ndhi nhi nbut ghi, ndhi a nyen jagaham mu nin nghi, khi sar ndhi nyen nan mu ling nka ghi. 15 Ghi naa bih si mu. Ghi deh nbut mu deh ngurum mu naa yet ndhi deltighim fhik dih. 16 Ghi den ka ghi nphe ka-sak khi kam fe duk. Ghi deltighim khi bih si mu. Nphe ndhi kat ghi shin asi, bhi ghi bar ka-sak khi nyen ndhi mu khilling ghi.