Ep fe 3

1 Nphe ndhi asi, ndhi mu kat kudi mu yit mbut mu ma, mu leng mu ret dhe a nmun det mu deh ndankong khi yil Athens. 2 Mu lep khi Timoti, emnikhinmu khi shaar shiit fun nbilip khi Naan dhi ni a nbut liis mhi Khiristi, ndhi shin bal khi bhizung samteer ngun mbut shiit shin zen. 3 Mu shin asi yak ba mhe gurum nkhi lughut nphe wula si mu ma. Nphe dhi gun khi man ndhi mu er gun a nphe shiit wuni. 4 Mu zen, ndhi dok mun nder gu, mu sat ngun dang si mu lhi mun nphe shwa jheel, bhe taa asiwai, gu man asi. 5 Nphe dhi asi, ndhi a kat ma kaa nhi, bhi a lep-lep deh nnan a kat man nkha zen fuk dhi. Pak nnot bhi na daahar eh bhim gun, dhe ba shin fung nshaar fom bang gun dhe shiit fun boor nbaan dhi. 6 Dang bhi Timoti tong nder gu ji bhi khi lep wuret mu zen khi bhizung demshak fu. Nhi sat nmun na gun phi tong leng mun a wuret, yaghal gun phe dem naa mun khi phe ndhi mun phe dem naa gun duk si. 7 Nphe dhi asi, emnikhin ni mu, mun bhizung mu samteer khi gun nphe shin zen fuk, bhut duk-duk wula khi jheel ndhi mu shu. 8 Nphe dhi khi det si mu tong, kat gu direm bal-bal bhut Nda. 9 A mhe plang ndhi nang dhi mu shin Naan fun nphe gu ma ye, nphe duk-duk ret yit ndhi mun khi ni nder Naan nphe gu? 10 Lipar khi puus mun phi dang phi Naan bal-bal ndhi mun nnot bhi mu naa gun khi yit yakhal mu shin bhi ndhi wen gun nbut shinzen fuk. 11 Mang ye Naan fun khi Nda mu shi kashin, yakhal Nda mu Jesu, nin yarkaam fun shin ji ndergu. 12 Mang ye Nda myaal gun yakhal lhi ngun gu demshak bwer der shak khi gurum wu kwa mu duk-duk, khiphe ndhi mun phe shin fe ngun si. 13 Mang ye shin bal bhizung ngun, nphe dhe nmu bor nnot lahal nbut bang ntikhim Naan khi Nda mu, par bit wawul khi Nda mu Jesu khi gurum fin mu duk-duk ndhi mu khi riin wu bang.