¹ Nphe ndhi Kristi shu jel nbut nan shohopshik, gu dak suk nyar wunih. Gurum ndhi mu shu jel nbut nan bhi shikbis kat dhi khi phi nmhi muk maa. ² Nphe ndhi asih, nkahan gurum wunih feh nphe gohotshi phitong khi muk, nan shohopshik sih kutdhi nphe lang en muk maa nphe ndhi simshik khimuk nih nphe kot a mhi Naan. ³ Gu mang pong phi shin bi ndhi nyen ndhi mwo phi tik bi ndhi a mhi nan, lang en, shu am ndhi khi ving yit, ret yit ndhi mwo khi sih shin shu yahal mwo mwan tanggat mwo kam ntikhim shin bwak khi dangkong, mkhi sih phe ndhi khi phishi maa, yahal mwo tuhup kha khi simshik nyen dik yil nkum. ⁴ Dhe a khiphe bi wupwo nmwo khat gu shin pak simshik wuban sih nder mwo maa nphe wunih mwo sat bhilip wuban khidhel gu. ⁵ Mwo nphe sat kop simshik fhut ngwo ndhi nih nphe tok dyel nnyen ndhi mwo nkaham khi mwo ndhi mwo dwam. ⁶ A phe wunih dhe mwo kop bhilip Naan nmwo ndhi mwo dwam dhi duk, nphe wunih dau khi ndhi mwo tok diyel nmwo nbut shohopshik mhi gurum bhi mwo khi mak phe khat sehen nbut riin mhi Naan. ⁷ Lat khi bi mwo phi wahji kus. Nphe wunih feh gu twahat khi en gu yahal gu kot a gurum mwo dhi khi leng khi tong shahap nphe dong phi Naan. ⁸ Nlat khi jep bi khiding gu kot a nyen dem shak ndhi nih khi phe dar fhit, nphe ndhi dem shak khi ohot kha shikbis. ⁹ Gu kot a nyen lap mhizep khinar shak nnohot ngwaakshik. ¹⁰ Nphe ndhi gun khiding gun khi tongshahap ndhi nphe dak shak khinih yahal nbut shinzehen bhi gu shin shiit Naan wuret shak nbut yar mwo bwer. ¹¹ Khat mhe gurum lap bhilip, yit dhe nnih kot a khi bhilip mhi Naan. Kat mhe gurum phi shiit, yit dhi dhe nnih kot a nbut bal ndhi Naan shin. Gu shin bhi sih nyar ndhi khi saam Naan nbut sim ndhi nih a mhi Jesu. Yit dhi dhe nsim mhi Jesu Kristi dhe dhi a wusaam khi yon khimuk tai tai - Asih wai. ¹² Nyen dem fhin mwo, tap gu nnah a khi phe bhi wudik khi wupwo ndhi mwo jwal gun nwus. ¹³ Nkop wunih, kat gu khat wulah bwer nphe Kristi bhi gu shin retyit yahal bhizung gu pyah nphe yon phebong ndhi mwo ep nin ngun. ¹⁴ Khat mwo fhilip gun nphe sim ndhi nih a mhi Kristi bhi gun khi wuret nphe ndhi riin mhi phebang yahal riin mhi Naan nih khidhel gu. ¹⁵ Tap nmhe gurum shujel nnaar gu nphe ndhi nih a ngu tihkha, waat, ngu shin wubis khi ngu nah tah nbut bi ndhi a mhi gurum mwo maa. ¹⁶ Kat mhe gurum shu jel bhi a phe ndhi nih a ngu mwan nder Naan, tap nkha muk kuul, phikop wunih bhi saam sim Naan khi sim wunih. ¹⁷ Nphe ndhi pong mhi tok dyel ndhi nshe a khi fungbong mhi Naan. Khat she a khi mun, bhi nih nphe kot a khi phishi ndhi ne nder nyen ndhi mwo shinzehen nbhilip mhi Naan yeh? ¹⁸ Yahal "Kat lahpwo dhe ngu shin wuret khat bar khi sehen, bhi mhi nyen shin shikbis mwo ndhi mwo man Naan mha nphe kot a nang yeh?" ¹⁹ Nphe wunih mwo ndhi mwo shu jel nphe sim khi Naan mwo den bal khi sehen fhut nbut shinzeen khi retyit khi gwo ndhi dak mwo.