¹ An phi kar mwo wunan khi naar gu, an ndhi a gurum wuyon duk anah jel ndhi Kristi shu shin an a nmhe nbut nyen dhi mwo nphe kat wuret ndhi mwo nphe nin feh. ² Gu dhe a nyen tap mhi Naan, tim ndhi mwo shin ngun nphe pan yahal gu tap mwo khiphe nyen khaan phe mwo sih dangbhi a nphe ndhi dhe a tiit ngun mha, yit nnih kot asih a phe ndhi gu shin khasuk khiphe ndhi Naan phe dem ngun gu shin, a phe deltikhim ndhi khi ji khi kakuul bir mha. ³ Tap gu den khasuk a neyn lih nkha gurum ndhi mwo nsar gu maa. Phikop wunih bhi gu dhe a bhi kam ntim ndhi mwo nsar gu. ⁴ Bhi khat mu nin long tap feh bhi gun nphe lap zung khi phebang ndhi nih khi bwar mha. ⁵ Nbut yar wukhimeh, gun dengmar gu lohot ntikhim nyen ndhi mwo nan gun. Yit dhi dhe ngun khiding gu kot a nyen lohot dhe ngun gu shin shiit dhi nshak . Naan nih phi dem nggu ep kha nih khiting maa, dang bhi khi shin tongshahap ngwo ndhi nih khi lohot. ⁶ Nphe wunih gu lohot ntikhim Naan dhe nnih par ep gun shinkha npong mhi muk dhi. ⁷ Gu den rhikit fuk khidhel muk nphe ndhi nih phi dem gun. ⁸ Gu dhe a nyen ndhi mwo khi en, shin gu dhe a nyen Kaan phe. Ngu nyangphe, gwo wubis sih nhi phi khaan phe, nih phi gwar a khiphe Liit ndhi nih phi tang gurum ndhi ji aar. ⁹ Gu dar khi bal nsar muk. Gu dar khi bal nbut shinzehen. Gu man ndhi nyen ndhi mwo khi shinzehen ndhi khin yil sih mwo a phi mohor khi jel. ¹⁰ Khidangkong ndhi gu sham jel nphe lah pong, Naan, ngu shin tongshahap wuret, ndhi yong gun shin wahji nbut phebang khimuk, ndhi tai tai nbut Kristi, khi lih ngun gu tang a wuret, khi tong a wukhimeh khi gun yahal shin bal ngun. ¹¹ Mu yit bih mwo khisar muk tai tai. Asih wai. ¹² A mang Silwanu a emnihin nbut khi shinzehen, yahal a ran vilipnaan a den khisar muk nphe shin ngun. An phi shin kar ngun yahal an phi shin langting ngun ndhi bih ndhi a ran bhi a zehen khidhel tongshahap ndhi nih a mhi Naan. Gu dar khidhel wunih. ¹³ Mat ndhi nih nBabila, ndhi mwo bun nih a wukhimeh khi gun, nih phe tal gun, khi Markus lah nih. ¹⁴ Gu tal shal shi yaksar mhi demshak. Mang yeh tongshahap kot a muk khiding gun ndhi a nyen mwan nder Jesu Kristi.