¹ Nbut yar ndhi sih bhi gun shorop gu sam khi kha gu ntikhim daas fuk mwo. Gu shin det kot pak daas mu phi sam khi kha du nphe bhilip khi Naan mha, bhi nphe simshik wuret fuk bhi gu mak phe dhil en mwo nnohot nphe mu kiling bhilip Naan. ² Nphe ndhi mwo nphe mak nha zehen nbut simshik fuk. ³ Gu nok yit ngyarap fuk dhe a bhi nha khibang sha dhet khi phe kha ndhi mu tep nhi khi dakshik khi zinanya yahal lhe ret nha nyit ndhi gu jwal mha. ⁴ Yit dhi dhe ngyarap fuk kot a dikhim, bih ndhi yahal a bhizung shihir put khibang yahal ret ndhi khi dyer yahal lhen nbut riin ndhi kot khi sim ntikhim Naan. ⁵ A nhi a bih ndhi shop wugyet ndhi mwo nbut bang khi riin, mu lingyit du nphe jwal shikhasut ndhi lhi dhe mwo lohot ntikhim daas mwo dhi. ⁶ Asih dhe Saratu lohot ntikhim Ibrahim yahal yong nih a Nda fhit. Gun a jirap khi muk khidetsih khat gu shin bih dhi a wuret yahal gu lwahat wulha mha. ⁷ Nbut yar wunhi fhe, gun daas gu twahat khi shorop gu mwo nbut khi khiling nshak, nphe ndhi mat a bih wulehen khiphe ehe sih. Gu shin tikhin nmwo khiphe jep kop mhi wuret khi sehen. Gu shin asih yak nNaan nyang khiling dang fuk. ⁸ Nlat, gun khiding gu ji shishak nbut nha jel, khi demshak khiphe emnikhin shak sih, khi bhizung wuret yahal lohot. ⁹ Tap gu kwat wubis khi wubis kot a fhilip khi flilip mha. Nphe wunhi bhi gu lhi wuret nphe ndhi mu yong phe ngun a phe dhe ngun gu shin kop wuret dhi ¹⁰ Ngu dem sehen yahal nha teer wuret bhi nok shin bih wubis, shin bih wuret yahal nok dhe a ngu bhilip wubis. ¹¹ Yit ngwo wunih nok shin wubis yahal shin a bi wuret mu. Yit nnih dem a tong shahap yahal vihiit yit nih shipwo. ¹² Yit Naan a khidhel ngu shin wuret yahal khom muk phi khiling dang khi mwo. Dangbhi Naan nyang ngu shin wubis. ¹³ A weh khi tikhok khi ghi khat ghi a ngu bes shin wuret yeh? ¹⁴ Khat ghi shu jel nphe shin wuret bhi ghi khi wuret. Tap gu lwahat bih ndhi nhi phi lhi luhut nmwo maa. Tap nbhizung gu tikhot. ¹⁵ Dang bhi gu den yit gu a khidhel Nda Jesu Kristi yahal bhizung gu dhe a wubang. Gu tong khi yit gu a wu ap nphe lap taal nder gurum mwo khiding ndhi phi dem man phishi lang yit fuk nphe bih ndhi ntikhim. ¹⁶ Gu kot khi en wuret dhe khat gurum mwo phi fhilip gun nphe phitong fuk nyar mhi Naan bhi kha mwo khi kuul nphe ndhi mwo phi sat bhilip khidhel gu a khiphe ndhi gun a nyen shin wubis. ¹⁷ Ret khat Naan dem ndhi gu shu jel nphe shin wuret met ndhi gu kot a nyen shin wubis. ¹⁸ Jesu Kristi shu jel asih nphe shikbis fun. Nhi ndhi a ngu shin wuret bhi shu jel nphe mu, ndhi mun a nyen shin wubis dhe nnih waji khi mun nder Naan dhi. Mwotih nih nbut shohopshik ndhi a nan sih, dangbhi mwo yahal khi nhi khi sehen shi riin wubang. ¹⁹ Nbut riin, mwan kop bhilip Naan nriin ndhi mwo nlhi kwoo. ²⁰ Mwo lap lohot mha ndhi mohor khi Naan nhi phi tap phi mwo ndeer mhi Nuhu ndhi nhi phi dak shii yahal Naan bar gurum mwo bwer maa - sehen pohokun - nbut am. ²¹ A nhi a kamshik mhi Baptisma ndhi nhi phi shin bar khi sehen khi detsih - a nphe vwang raap khi shohopshik shin bha dhet mha a nphe dhil en wuret shin waji nder Naan nphe yahal khi Jesu Kristi. ²² Jesu nih nsar seh khi Naan. Wahkba khi ting Naan. Jep Lep khi Naan yahal mwo ndhi khi yon mu shin kha sut a tiit ntikhim muk.