¹ Nphe wunhi, gu bwak khi butdhet, gwamshik, khi sat pwo ba birip, tihlik, yahal nwang shin nshak. ² Khipe jep jiu ndhi mwo phi tang yuhur, ndhi a nbut nhi bhi gu nan nbut yar ndhi a mhi kat sehen, ³ ndhi gu sham nbut zuhum mhi Naan. ⁴ Gu jih nder muk ndhi nhi a pang ndhi khi sehen ndhi gurum mwo nyang, dangbhi Naan mang a nhi zak a bhi wuret. ⁵ Gun duk a khi phe pang ndhi mwo khi sehen ndhi mu phi dyak mwo shinkha nphe dhe mwo kot a lhi ndhi khi riin dhe mwo kot a wubang nbut shiit Naan ndhi khi put phi yar bizuhum Naan ndhi Nda Naan khi lap nbut sim ndhi nih a mhi Jesu. ⁶ Ran bhilip khi Naan nhi khi bhisih, "Gu nah maa, an phi jwal pang wubal khi phe kwang viling nSihiyona ndhi mwo khi sim yahal mwo khi phishi, Gwo ndhi shinzehen nnhi bhi khi shu kakul mha." ⁷ Tikin fhe dhe a gun dhi gu shinzehen. Dangbhi mwo ndhi nnohot shinzehen, "Pang ndhi niyen dik lhi mwo nyang a nhi dhe a pang ndhi lhi den bal fhit shishik," ⁸ Shin dhe a "pang gap shii khi pang pwalap." Mwo phi pwalap a phe ndhi mwo phi lohot khi bhilip Naan ndhi mu yong mwo nphe nhi mha. ⁹ Dang bhi gun a gurum mwo ndhi a yong, jep long mwo nbut bhilip fhin, yil phe wubang, gurum ndhi a man mwo, dhe gun gu pher bhi fhii pwo ndhi an a yong gun shinpwat nbut kwoo shinwajih but phebang ndhi gu sham man mha. ¹⁰ Mu sham man gun a gurum sim mha, dang khidetsih bhi gun a jep khi Naan mwo. Mu nha jel fuk mha, dang khidetsih gu khat ngu nah jel fuk. ¹¹ Nyen dem fhin mwo, a yong gun a mhizeb ndhi mu kok gun shephe khi nih dhe ngun gu kon simshik ndhi a mhi nan, ndhi nhi phi lyak sat khi sehen fuk. ¹² Yit simshik fuk khinhar nyen ndhi mwo man Naan mha kot khi nhin yon kakder ndhi kat mu yong sim gu khidhel bhi ndhi a wuret mha bhi mwo nphe nha a wuret fuk kha lang khiting yahal sam sim ndhi a mhi Naan par puus ndhi nhi nphe wul. ¹³ Gu lap lohot ntikhim nyen ndhi a phitikhim mwo nphe Naan. Gu lap lohot ntikhim daskaham yil mwo nphe yon khi mwo, ¹⁴ yahal ntikhim daskham wunan ndhi mu lep mwo nphe dil kom nyen ndhi mwo phi shin simshik wubis yahal mu saam nyen ndhi mwo phi shin bhi wuret. ¹⁵ Nphe ndhi a nih a bhi ndhi Naan phi dem yahal nbut shin wuret bhi phi nyen ndhi mwo phi shin bhi wuban khi shin bhi nnohot man bhi phi mwo khi samsihir. ¹⁶ Khi phe gurum mwo ndhi a kwaram mha, tap gu nshin shiit khi wunhi nphe butdhet, yit dhi dhe mun mu dhe a kwaram mhi Naan. ¹⁷ Gu shin yon ngurum mwo khiding, yahal gu demshak khi phe emnikhin shak sih. Gu luhut Naan. Gu shin yon ndaskaham fuk mwo. ¹⁸ Kwaram mu, gu lohot ntikhim nyen ndhi mu phi pan gun. Gu lohot a tikhim nyen ndhi mwo phi shin wuret khi man pan gun det mha, gu shin a sih khi nyen ndhi mwo khi but dhet duk. ¹⁹ Nphe ndhi a bhi saam sim khat nbut man Naan bhi gurum yha shinhi a wukhimhe khi mohor nphe ndhi shu jel nphe bhi ndhi nhi shin mha. ²⁰ Nphe ndhi wuret dhi mha khat ghi shin shikbis yahal ghi shin mohor khat mu dhil kom nghi. Dang bhi khat ghi shin wuret yahal ghi shu jel ndhi mu phi dhil kom ghi bhi wunhi a bhi dhi Naan khi saam gurum. ²¹ A nphe wuni dhe mu yong gun khi phe Kristi ndhi shu jel nphe gu. Nhi yit vungshi nhi nphe dhe nmun mu shin a khi phe nhi sih zak. ²² Nhi shin shikbis mha, shin mu khat nih khi mhe lahar nphi nhi mha. ²³ Shu fhilip bhi ep phinhi mha, shu jel bhi yhafwom mha, dangbhi shin khashin ntikhim gu tok dyel phe nhi khi zehen. ²⁴ Nhi mang shikbis fhun gurum nshohopshin nhi yahal mu pwas nhi khidhel shep dhe shikbis fun wayha nkha mu dhe nmun mu kot a nyen shin wuret dhi. Nbut shwal ndhi mu shin nnhi bhi mun mu khat sehen. ²⁵ Gun khiding phi tanko khi phe tim ndhi mwo lihim, dang bhi khidhetsih gu wakji nder ngutap ndhi a ngu tap khi sehen fuk.